526. ARIITHI ATHERU EHOKEKU THIKIRIRIAI

1.
Arĩithi atheru ehokeku thikĩrĩriai
Iguai mwarahũke
Mũkĩre mũtige toro
Inyuĩ mũrĩithagia ng’ondu
Cia Jesu menyai na ma
Caitani acangacangaga
Ta mũrũthi agĩcaria
Mĩoyo ya andũ arĩa ega ahĩtithie

Arĩithi a mĩoyo ya andũ
Inyuothe arahũkai
Na ihenya mũũkĩre mũtige toro
Mũrĩithi akĩrĩithia bũrũri wĩ nyamũ
Ndakomaga toro meciria-inĩ
Nyamu itikarĩe mbũri

2.
Caitani ahũũragwo na kĩhooto
Na mahoya na ciĩko cia ũthingu
Amakagio biũ nĩ andũ
Athingu na andũ a ma
Inyuĩ arĩithi rũmiai kĩhooto
Na mũrũmie ũhoro wa ma
Caitani aingatagwo thĩinĩ wa ngoro
Cia andũ nĩ wendani na ũhoro wa ma

3.
Mũrĩithi mũtheru mwĩhokeku
E rũũru akĩrĩithia mbũri
Ehumbaga thiaka ciande ta nguo
Atarĩ na itherũ ngoro yake
E na indo cia mbaara iria ciothe
Ciĩhumbagwo nĩ mũrĩithi arũe
Na hiti ciothe itikarĩe mbũri
Nacio hiti ihũragwo na mahoya

4.
Rũcinĩ aarahũka nĩekagĩra
Iraatũ magũrũ make
Akoha rũhiũ rwa njora njohero
Atarĩ na itherũ omĩrĩirie
Oigagĩra ng’ondu ciake mĩrũri
Agaciumagaria ikarĩe
Njũgũma na ngo anyitĩte akarũmia
Na ma atarĩ na itherũ kana mathangania

5.
Akĩrĩithia nĩonagia andũ othe
Nĩ wa ma nĩ ciĩko iria ekaga
Guoko gwake anyitĩte
Rũthanju na itimũ na ndotono
Nĩ Mũrĩithi mũũgĩ mũno
Ndahurũkaga ndaikaraga thĩ
Athiũrũrũkaga ng’ondu
Ciake mwene mbere na thutha.