Go Back

1 Samueli Chapter 7

• 1. Nao andũ a Kiriathu-jearimu magĩthiĩ makĩgĩra ithandũkũ rĩu rĩa Jehova, makĩrĩtwara mũciĩ wa Abinadabu, gĩthũngũri-inĩ, nao makĩamũra Eleazaru, mũrũwe, makĩmũtheria, atuĩke mũikaria wa ithandũkũ rĩu rĩa Jehova.
• 2. Na gũgĩkinya atĩrĩ, atĩ ihinda rĩrĩa ithandũkũ rĩu rĩaikarire Kiriathu-jearimu, kuuma mũthenya ũcio rĩaigirũo kuo, rĩarĩ iraya; rĩarĩ mĩaka mĩrongo ĩĩrĩ; nao andũ othe a nyũmba ya Isiraeli makĩĩrirĩria gũcokerera Jehova.
• 3. Nake Samueli akĩaria na andũ acio othe a nyũmba ya Isiraeli, akĩmera atĩrĩ, Mũngĩkorũo nĩmũkwenda gũcokerera Jehova na ngoro yanyu yothe, eheriai ngai cianyu cia kũngĩ, o na Maashitarothu, mũhaarĩrie ngoro cianyu cierekere Jehova, mũmũtungatĩre we wiki, na nĩekũmũhonokia amũrute moko-inĩ ma Afilisiti.
• 4. Nacio ciana cia Isiraeli igĩkĩeheria Mabaali na Maashitarothu, igĩtungatĩra Jehova wiki.
• 5. Ningĩ Samueli agĩkiuga atĩrĩ, Cokanĩrĩriai Aisiraeli othe mathiĩ Mizipa, na nĩngũmũhoera kwĩ Jehova.
• 6. Nao makĩũngana kũu Mizipa, magĩtaha maĩ, makĩmaita mbere ya Jehova, magĩkĩĩhinga kũrĩa irio mũthenya ũcio, ningĩ makiugĩra kũu atĩrĩ, Nĩtwĩhĩtie Jehova. Na rĩrĩ, Samueli aaciragĩra ciana cia Isiraeli arĩ kũu Mizipa.
• 7. Nao Afilisiti maaigua atĩ ciana cia Isiraeli nĩciũnganĩte kũu Mizipa, anene a Afilisiti makĩambata nĩguo makahũrane na Isiraeli. Nacio ciana cia Isiraeli ciaigua ũguo, igĩĩtigĩra Afilisiti.
• 8. Ciana icio cia Isiraeli igĩkĩĩra Samueli atĩrĩ, Menya ũtige gũkaĩra Jehova Ngai witũ nĩ ũndũ witũ, nĩ getha atũhonokie atũrute moko-inĩ ma Afilisiti.
• 9. Nake Samueli agĩkĩnyita kagondu ka nyondo-inĩ agĩkaruta gatuĩke ihaki rĩa gũcinĩrũo Jehova karĩ kagima o ro ũguo; ningĩ Samueli agĩkaĩra Jehova nĩ ũndũ wa Isiraeli, nake Jehova akĩmũcokeria ũhoro.
• 10. Na rĩrĩa Samueli aarutaga ihaki rĩu rĩa njino-rĩ, Afilisiti magĩthengerera hakuhĩ, nĩguo mahũrane na Isiraeli, no Jehova akĩrurumĩria Afilisiti marurumĩ manene mũno mũthenya ũcio, akĩmanyaririthia mũno; nao makĩhũrũo magĩtorio mũno nĩ Aisiraeli.
• 11. Nao andũ a Isiraeli makiuma Mizipa, makĩrũmĩrĩra Afilisiti na ihenya, makĩmahũra, makĩmakinyia mũhuro wa Bethi-kari.
• 12. Hĩndĩ ĩo Samueli agĩkĩoya ihiga, akĩrĩhanda gatagatĩ-inĩ ka Mizipa na Sheni, akĩrĩtua Ebeni-ezeri, akiuga atĩrĩ, O na gwata rĩu Jehova no atũteithĩtie.
• 13. Afilisiti magĩgĩtorio o gũtorio biũ, nao matiacokire gũkĩra mĩhaka ya Isiraeli; nakuo guoko kwa Jehova gũgĩtũũra kũũmĩire Afilisiti matukũ mothe ma Samueli.
• 14. Namo matũũra ma Isiraeli marĩa maatunyanĩtwo nĩ Afilisiti magĩcokithio harĩ Isiraeli, kuuma Ekironi o nginya Gathu; ningĩ bũrũri wao ũrĩa wahakaine nao ũkĩrutwo moko-inĩ ma Afilisiti nĩ Aisiraeli. Ningĩ gũgĩkĩgĩa thayũ thĩinĩ wa Aisiraeli na Aamori.
• 15. Nake Samueli agĩtiirĩrĩra Isiraeli matukũ mothe ma muoyo wake.
• 16. Na agathiaga Beth-eli, na Giligali, o na Mizipa, mwaka o mwaka, agĩcanga kũu aakoragwo na ciathĩ, agagĩtuithanagia Aisiraeli macira mao kũndũ kũu guothe.
• 17. Nakuo kũndũ gwake kũrĩa aacokaga kũinũka nĩ Rama, nĩ ũndũ kũu nĩkuo mũciĩ wake warĩ: na arĩ kũu agatiiragĩrĩra Isiraeli, na agĩakĩra Jehova kĩgongona kuo.

Home