Go Back

1 Samueli Chapter 5

• 1. Na rĩrĩ, Afilisiti nĩmaatahĩte ithandũkũ rĩa Ngai, nao makĩrĩruta kũu Ebeni-ezeri, rĩgĩtwarũo Ashidodu.
• 2. Ningĩ Afilisiti makĩoya ithandũkũ rĩu rĩa Ngai, makĩrĩtwara nyũmba ya Dagoni thĩinĩ, makĩrĩiga hakuhĩ na Dagoni.
• 3. Na rĩrĩ, hĩndĩ ĩrĩa andũ a Ashidodu maarokire gũũkĩra rũcinĩ tene rũciũ rũrũ rũngĩ-rĩ, magĩkĩona Dagoni ĩgũĩte, ũthiũ ũgatheca thĩ mbere ya ithandũkũ rĩa Jehova. Magĩgĩcoka makĩoya Dagoni ĩo, makĩmĩhanda handũ hayo rĩngĩ.
• 4. Ningĩ rĩrĩa maarokire gũũkĩra rũcinĩ tene rũciũ rũrũ rũngĩ-rĩ, makĩona Dagoni ĩgũĩte, ũthiũ ũgatheca thĩ mbere ya ithandũkũ rĩa Jehova; naguo mũtwe wa Dagoni, na hĩ cia moko mayo cierĩ, igĩkorũo itinĩkĩte irĩ o hau hingĩro-inĩ ya mũrango wa nyũmba; Dagoni ndĩrĩ kĩndũ kĩngĩ yatigĩirio tiga o gĩcunjĩ kĩu kĩngĩ kĩa mwĩrĩ wayo;
• 5. tondũ ũcio hatirĩ o na athĩnjĩri-Ngai a Dagoni, o na kana mũndũ ũngĩ o na ũrĩkũ wa arĩa matonyaga nyũmba ĩo ya Dagoni, ũngĩkinya hingĩro-inĩ ĩo ya Dagoni kũu Ashidodu o na ũmũthĩ.
• 6. No rĩrĩ, guoko kwa Jehova gũgĩkĩũmĩra andũ a Ashidodu mũno, akĩmanina, na akĩmahũra na mũrimũ wa ngai kũu itũũra-inĩ rĩa Ashidodu rĩo rĩene, o na mĩhaka-inĩ yarĩo yothe.
• 7. Na rĩrĩ, andũ a Ashidodu mona atĩ ũguo nĩguo gwaikara, magĩkiuga atĩrĩ, Ithandũkũ rĩa Ngai wa Isiraeli rĩtigũikara gũkũ na ithuĩ; nĩ ũndũ guoko gwake nĩgũgũtũũmĩra mũno, o na gũkomĩra Dagoni, ngai iitũ.
• 8. Tondũ ũcio magĩkĩrekania makĩũnganithia anene othe a Afilisiti mathiĩ kũrĩ o, makĩũria atĩrĩ, Ithandũkũ rĩrĩ rĩa Ngai wa Isiraeli, tũkũrĩĩka atĩa? Nao magĩcokia atĩrĩ, Rekei ithandũkũ rĩu rĩa Ngai wa Isiraeli rĩkuuo rĩthamĩrio Gathu. Nao magĩkĩoya ithandũkũ rĩu rĩa Ngai wa Isiraeli, makĩrĩthamĩria kuo.
• 9. Na gũgĩkinya atĩrĩ, atĩ maarĩkia kũrĩthamĩria kuo, guoko kwa Jehova gũkĩũmĩra andũ a itũũra rĩu mũno mũno; akĩhũra andũ a itũũra rĩu, arĩa anyinyi, o na arĩa anene, nao makiumĩrĩrũo nĩ mũrimũ ũcio wa ngaĩ.
• 10. Tondũ ũcio magĩcoka magĩthamĩria ithandũkũ rĩu rĩa Ngai Ekironi. Na gũgĩkinya atĩrĩ, atĩ ithandũkũ rĩu rĩa Ngai rĩakinya Ekironi, Aekironi makĩanĩrĩra na mĩgambo mĩnene, makiuga atĩrĩ, Hĩ! Mekũrehe ithandũkũ rĩa Ngai wa Isiraeli gũkũ gwitũ, nĩguo matũũragithie ithuene, o na andũ aitũ.
• 11. Tondũ ũcio, magĩkĩrekania makĩũnganithia anene othe a Afilisiti, makĩmera atĩrĩ, Twarithiai ithandũkũ rĩrĩ rĩa Ngai wa Isiraeli riume gũkũ, rĩcokio handũ harĩo kĩũmbe, nĩguo rĩtigatũũrage ithuene, o na andũ aitũ; nĩ gũkorũo andũ othe a itũũra rĩu nĩmaaiguire ta manyarirĩkĩte mũno nĩ kĩmako gĩa gĩkuũ; nĩ ũndũ guoko kwa Ngai nĩkwamomĩire mũno kũu.
• 12. O nao andũ arĩa mataigana gũkua, no maagwatirũo nĩ mũrimũ wa ngaĩ, nakĩo kĩrĩro gĩa itũũra rĩu gĩgĩkinya o igũrũ matu-inĩ.

Home