Go Back

1 Samueli Chapter 31

• 1. Na rĩrĩ, Afilisiti magĩkĩhũrana na Isiraeli, nao andũ a Isiraeli makĩũrĩra Afilisiti, makĩgũa kũu kĩrĩma-inĩ kĩa Giliboa moragĩtwo.
• 2. Ningĩ Afilisiti makĩrũmĩrĩra Saulu, na ariũ ake, na ihenya mũno; Afilisiti acio magĩkĩũraga Jonathani, na Abinadabu, na Malikishua, ariũ a Saulu.
• 3. Nayo mbaara ĩo ĩgĩkĩrũrĩra Saulu mũno mũno, nao arĩa maarathanaga na mĩguĩ makĩmũkinyĩrĩra na mĩguĩ yao; nake agĩkĩnyarirĩka mũno nĩ ũndũ wa acio maarathanaga.
• 4. Hĩndĩ ĩo Saulu agĩkĩĩra mũmũkuuĩri indo ciake cia mbaara atĩrĩ, Comora rũhiũ rũaku rũa njora, ũ’thece ũndũrĩkanie naruo; nĩ getha andũ aya mataruaga matiga’thece mandũrĩkanie, ma’nyararithie. No rĩrĩ, mũndũ ũcio mũmũkuuĩri indo ciake cia mbaara ndetĩkĩrire, nĩ ũndũ nĩetigĩrire mũno. Tondũ ũcio Saulu agĩkĩoya rũhiũ rũake rũa njora, akĩrũgũĩra.
• 5. Na rĩrĩ, mũndũ ũcio mũmũkuuĩri indo ciake cia mbaara ona atĩ Saulu e gũkua, o nake akĩĩgũithĩria rũhiũ rũake rũa njora o ro ũguo, agĩkuĩra ho hamwe na Saulu.
• 6. Tondũ ũcio Saulu, na ariũ ake atatũ, na mũndũ ũcio mũmũkuuĩri indo ciake cia mbaara, na andũ ake othe, magĩgĩkua o hamwe mũthenya o ro ũcio.
• 7. Na rĩrĩ, andũ a Isiraeli arĩa maarĩ mbarĩ ĩrĩa ĩngĩ ya kĩanda, o na arĩa maarĩ mũrĩmo ũrĩa ũngĩ wa Jorodani, mona atĩ andũ a Isiraeli mekũũra, na atĩ Saulu na ariũ ake nĩmakuĩte, makiunĩka, makiuma matũũra mao, makĩũra; nao Afilisiti magĩthiĩ kuo makĩmatũũra.
• 8. Na gũgĩkinya atĩrĩ, atĩ rũciũ rũrũ rũngĩ, rĩrĩa Afilisiti maathiire gũcuma andũ arĩa moragĩtwo-rĩ, magĩkĩona Saulu, na ariũ ake atatũ, magũĩte kĩrĩma-inĩ kĩu kĩa Giliboa.
• 9. Makĩmũtinia mũtwe, makĩmũcuma indo ciake cia mbaara, magĩcoka makĩrekania kũndũ guothe bũrũri wa Afilisiti, nĩguo makahunjanĩrie ũhoro ũcio me nyũmba-inĩ ya ngai ciao cia mĩhianano, o na harĩ andũ.
• 10. Nacio nguo ciake cia kĩgera cia mbaara magĩciiga nyũmba ya Ashitarothu; nakĩo kĩimba gĩake magĩkĩoherera rũthingo-inĩ rũa Bethi-shani.
• 11. Na rĩrĩ, andũ arĩa maatũũraga Jabeshi-gileadi maaigua ũhoro wa ũrĩa Afilisiti mekĩte Saulu-rĩ,
• 12. andũ othe arĩa maarĩ njamba magĩũkĩra, makĩraara magĩthiĩ ũtukũ ũcio wothe, makĩruta kĩimba gĩa Saulu na ciimba cia ariũ ake rũthingo-inĩ rũu rũa Bethi-shani, magĩthiĩ magĩkinya Jabeshi, magĩcicinĩra kuo.
• 13. Namo mahĩndĩ mao makĩmoya, magĩthiĩ makĩmathika gĩtina-inĩ kĩa mũbinde ũrĩa wĩ kũu Jabeshi, magĩkĩĩhinga kũrĩa irio mĩthenya mũgwanja.

Home