Go Back

1 Samueli Chapter 3

• 1. Nake mwana ũcio, ti Samueli, agĩgĩtungatĩra Jehova arĩ he Eli. Nayo ndũmĩrĩri ya Jehova yonagwo ta ĩrĩ ũndũ mũnene mũno matukũ macio, nĩ ũndũ gũtiagĩaga cioneki kaingĩ.
• 2. Na matukũ-inĩ macio gũgĩkinya atĩrĩ, atĩ rĩrĩa Eli aakorirũo akomete handũ hake harĩa aakomaga, (na hĩndĩ ĩo maitho make magĩkorũo nĩmaitĩkĩte kũũra, akaaga kuona,)
• 3. naguo tawa wa Ngai ũgĩkorũo ũtarĩ ũrahora, ningĩ Samueli agĩkorũo akomete kũu hekarũ-inĩ ya Jehova thĩinĩ, ĩo yaigĩtwo ithandũkũ rĩa Jehova-rĩ,
• 4. Jehova agĩgĩĩta Samueli, nake agĩcokia atĩrĩ, Niĩ ũyũ haha.
• 5. Agĩgĩteng’era kwĩ Eli, akiuga atĩrĩ, Niĩ ũyũ haha tondũ nĩwanjĩta. Nake akiuga atĩrĩ, Ndiĩtanĩte; coka ũgakome. Agĩgĩthiĩ, agĩkoma.
• 6. Ningĩ Jehova agĩĩtana o rĩngĩ atĩrĩ, Samueli. Nake Samueli agĩkĩarahũka, agĩthiĩ kwĩ Eli, akiuga atĩrĩ, Niĩ ũyũ haha, tondũ nĩwanjĩta. Agĩgĩcokia atĩrĩ, Ndiĩtanĩte, mũrũ wakwa; coka ũgakome.
• 7. Na rĩrĩ, Samueli ndaakorirũo amenyete Jehova hĩndĩ ĩo, kana akaguũrĩrio ũhoro wa Jehova.
• 8. Ningĩ Jehova agĩgĩĩta Samueli rĩngĩ hĩndĩ ya gatatũ, nake agĩkĩarahũka, agĩthiĩ kwĩ Eli, akĩmwĩra atĩrĩ, Niĩ ũyũ haha, tondũ nĩwanjĩta. Eli agĩkĩmenya atĩ nĩ Jehova wetaga mwana ũcio.
• 9. Tondũ ũcio Eli agĩkĩĩra Samueli atĩrĩ, Thiĩ ũgakome, na gũgakinya atĩrĩ, atĩ aagwĩta, uuge atĩrĩ, Aria, Jehova; nĩ ũndũ ndungata yaku nĩĩraigua. Samueli agĩgĩcoka agĩthiĩ, agĩkoma handũ hake hau aakomaga.
• 10. Nake Jehova agĩthiĩ, akĩrũgama, agĩĩtana o ta mahinda marĩa mangĩ, ũũ: Samueli! Samueli! Nake Samueli agĩkiuga atĩrĩ, Aria, nĩ ũndũ ndungata yaku nĩĩraigua.
• 11. Jehova agĩkĩĩra Samueli ũũ: Atĩrĩrĩ, nĩngwĩka ũndũ thĩinĩ wa Isiraeli, na mũndũ o wothe ũrĩa ũrĩũigua, nĩarĩrarakwo nĩ matũ make merĩ.
• 12. Mũthenya ũcio-rĩ, nĩguo ngahingĩria Eli maũndũ mothe marĩa njarĩtie makoniĩ nyũmba yake, ndĩmarutie kĩambĩrĩria-inĩ kĩamo nginya ithirĩro.
• 13. Nĩ gũkorũo nĩndĩmwĩrĩte atĩ ngũtũũra ’herithagia nyũmba yake tene na tene, nĩ ũndũ wa waganu ũrĩa aamenyete ũhoro waguo; nĩ gũkorũo ariũ ake nĩmerehereire kĩrumi o ene, nake akĩaga kũmagiria.
• 14. Tondũ ũcio nĩndĩĩhĩtĩire nyũmba ya Eli, ngoiga atĩ waganu wa nyũmba ĩo ya Eli ndũngĩhoroheka nĩ igongona, kana kĩndũ o na kĩ kĩrĩa kĩngĩrutwo, tene na tene.
• 15. Samueli agĩgĩkoma nginya o rũcinĩ, agĩcoka akĩhingũra mĩrango ya nyũmba ya Jehova; nake agĩĩtigĩra kũmenyithia Eli ũndũ ũcio onete.
• 16. Hĩndĩ ĩo Eli agĩgĩĩta Samueli, akiuga ũũ: Samueli, mũrũ wakwa. Agĩgĩcokia atĩrĩ, Niĩ ũyũ haha.
• 17. Agĩkĩmũũria atĩrĩ, Nĩ ũhoro ũrĩkũ Jehova arakũheaga? Menya ũ’hithe ũndũ ũcio; Ngai arogũthũũra, o na agwĩke ũũru makĩria, ũngĩ’hitha ũndũ o na ũmwe wa maũndũ mothe marĩa arakwĩrire.
• 18. Samueli agĩkĩmwĩra maũndũ macio mothe biũ, na ndamũhithe ũndũ o na ũmwe. Nake agĩkiuga atĩrĩ, Ũcio nĩ Jehova; nĩeke o ta ũrĩa ekuona kwagĩrĩire.
• 19. Samueli agĩgĩkũra, nake Jehova aarĩ hamwe nake, akĩaga kũreka kiugo o na kĩmwe gĩake kĩage kũhingio.
• 20. Nao Aisiraeli othe, kuuma Dani o nginya Biri-shiba, magĩkĩmenya atĩ Samueli nĩ mũhande nĩ Jehova atuĩke mũnabii wake.
• 21. Ningĩ Jehova akĩrũmanĩria gũcoka kuonwo rĩngĩ kũu Shilo; nĩ gũkorũo Jehova nĩeguũragĩria Samueli, o kũu Shilo, na ũndũ wa kũmũhe ndũmĩrĩri ya Jehova.

Home