Go Back

1 Samueli Chapter 28

• 1. Na gũgĩkinya atĩrĩ matukũ macio, atĩ Afilisiti makĩũngania mbũtũ ciao makahũrane mbaara na Isiraeli. Akishi agĩkĩĩra Daudi atĩrĩ, Menya mũno atĩ ndũrĩ hingo ũtegũtwarana na niĩ ita-inĩ mwĩ na andũ aku.
• 2. Daudi agĩkĩĩra Akishi atĩrĩ, Tondũ ũcio nĩũrĩmenya ũrĩa niĩ ndungata yaku ndĩrĩĩka. Nake Akishi akĩĩra Daudi atĩrĩ, Niĩ o na niĩ nĩngũgũtua mũnangĩri wa hingo ciothe.
• 3. Na rĩrĩ, hĩndĩ ĩo Samueli nĩaakuĩte, na Aisiraeli othe makamũrĩrĩra mũno, na makamũthika o kũu Rama, itũũra-inĩ rĩake we mwene. Nake Saulu agĩgĩkorũo nĩaarutũrũrĩte andũ arĩa maarĩ na roho ũragũraga, na ago, makoima bũrũri wake.
• 4. Nao Afilisiti magĩkĩũngana makĩamba hema ciao Shunemu; nake Saulu akĩũngania Isiraeli othe, makĩamba hema ciao Giliboa.
• 5. Na rĩrĩ, Saulu ona mbũtũ cia ita ya Afilisiti, agĩĩtigĩra mũno, akĩinaina ngoro yake mũno mũno.
• 6. Na rĩrĩa Saulu aatuĩririe ũhoro he Jehova, ndaamũcokeirie ũndũ o na ũrĩkũ, na ũndũ wa kĩroto, kana ũndũ wa Urimu, o na kana wa anabii.
• 7. Saulu agĩkĩĩra ndungata ciake atĩrĩ, Njarĩriai mũndũ-wa-nja wĩ na roho ũragũraga, ’thiĩ harĩ we, ngatuĩrie ũhoro. Nacio ndungata ciake ĩkĩmwĩra ũũ: Atĩrĩrĩ, he mũndũ-wa-nja wĩ na roho ũragũraga kũrĩa Eni-dori.
• 8. Saulu agĩkĩĩgarũra ndakamenyeke, akĩĩhumba nguo ingĩ, agĩthiĩ kuo na andũ angĩ erĩ, magĩkinya he mũndũ-wa-nja ũcio ũtukũ; Saulu agĩkĩmwĩra atĩrĩ, Ta ndagũrĩra na roho ũrĩa ũragũraga ũndehithĩrie ngoma ya mũndũ o wothe ũrĩa ndĩrĩkũgwetera.
• 9. Nake mũndũ-wa-nja ũcio agĩkĩmwĩra ũũ: Atĩrĩrĩ, wee nĩũũĩ ũrĩa Saulu ekĩte, ũrĩa aninĩte arĩa maarĩ na maroho maragũraga, na ago, akamahukia bũrũri ũyũ; ũgũkĩnyambĩra mũtego wa kũndutithia muoyo ũtũme ngue nĩ ũndũ kĩ?
• 10. Nake Saulu agĩkĩĩhĩtĩra harĩ we akĩgwetaga rĩĩtwa rĩa Jehova, akiuga ũũ: Atĩrĩrĩ, o ta ũrĩa Jehova atũũraga muoyo-rĩ, hatirĩ ihũra o na rĩmwe rĩrĩgũkora nĩ ũndũ wa ũndũ ũcio.
• 11. Mũndũ-wa-nja ũcio agĩkiuga atĩrĩ, Ngũkũrehithĩrie ũ? Agĩkiuga atĩrĩ, Ndehithĩrie Samueli.
• 12. Na rĩrĩa mũndũ-wa-nja ũcio onire Samueli, akĩanĩrĩra na mũgambo mũnene; ningĩ mũndũ-wa-nja ũcio akĩarĩria Saulu, akiuga atĩrĩ, Wa’henia nĩkĩ? Akĩrĩ wee Saulu.
• 13. Mũthamaki ũcio agĩkĩmwĩra atĩrĩ, Tiga gwĩtigĩra; kaĩ ũkuona kĩ? Nake mũndũ-wa-nja ũcio agĩkĩĩra Saulu atĩrĩ, Nĩ ngai nguona ĩkiuma na thĩ.
• 14. Agĩkĩmũũria atĩrĩ, Ĩhaana ta kĩ? Akiuga atĩrĩ, Nĩ mũndũ mũkũrũ ũraambata ehumbĩte nguo ndaya. Saulu agĩkĩmenya atĩ nĩ Samueli, agĩkĩinamĩrĩra agĩturumithia ũthiũ thĩ, akĩmwĩnyihĩria.
• 15. Samueli agĩkĩĩra Saulu atĩrĩ, Nĩ kĩ gĩgũtũma ũ’nyarire ũkĩndehithie gũkũ? Saulu agĩcokia atĩrĩ, Ndĩ mũnyarirĩku mũno mũno; nĩ ũndũ Afilisiti nĩmarehaarĩria mahũrane mbaara na niĩ, na Ngai nĩanjehereire akaaga kũnjokeria ũhoro o na hanini na ũndũ wa anabii, kana wa iroto; nĩkĩo ndĩgĩgwĩtĩte ũ’menyithie ũrĩa ngwĩka.
• 16. Samueli agĩkiuga atĩrĩ, Niĩ ũgũkĩhoya ũhoro nĩkĩ, Jehova agĩgũtigĩte agakweherera, akagĩa muku nawe?
• 17. Jehova nĩ gwĩka ekĩte o ta ũrĩa oigire na kanua gakwa; ningĩ Jehova nĩagũtunyĩte ũthamaki uume moko-inĩ maku, akaũhe mũndũ ũngĩ wa kwanyu, na nĩ Daudi,
• 18. nĩ ũndũ wee ndwaiguire uuge wa Jehova, na ndũigana kũreka Aamaleki makinyĩrĩrũo nĩ marakara make manene mũno marĩa aamarakarĩire; ũndũ ũcio nĩguo ũtũmĩte Jehova agwĩke ũndũ ũyũ ũmũthĩ.
• 19. O na ningĩ-rĩ, Jehova nĩakarekereria Aisiraeli o nao amaneane guoko-inĩ kwa Afilisiti me hamwe nawe; na rũciũ wee mwene mwĩ na ariũ aku mũgakorũo mwĩ hamwe na niĩ; ningĩ Jehova nĩakarekereria mbũtũ cia ita cia Isiraeli o nacio, acineane moko-inĩ ma Afilisiti.
• 20. Hĩndĩ ĩo Saulu agĩgĩtungumana akĩaragana thĩ, agĩĩtigĩra mũno nĩ ũndũ wa ndeto icio aaheirũo nĩ Samueli; na ndaigana gũtigwo na kahinya o na kanini, nĩ gũkorũo mũthenya ũcio wothe o na ũtukũ ndaarĩĩte irio.
• 21. Nake mũndũ-wa-nja ũcio agĩthengerera Saulu, akĩona arĩ na kĩeha mũno, akĩmwĩra ũũ: Atĩrĩrĩ, niĩ ndungata yaku ya mũndũ-wa-nja nĩnjiguĩte uuge waku, na ndinarega gwĩtwarĩrĩra ũgwati-inĩ wa gĩkuũ, o naguo ũhoro ũrĩa ũnjarĩirie nĩndĩũiguire.
• 22. Na tondũ ũcio, o nawe ta igua uuge wakwa, niĩ ndungata yaku ya mũndũ-wa-nja, ũreke ngũrehere tũirio hau ũrĩ, ũrĩe, nĩguo ũgĩe na hinya rĩrĩa ũrĩgwata gwĩthiĩra.
• 23. No we akĩrega, akiuga atĩrĩ, Ndikũrĩa. No rĩrĩ, ndungata ciake, o na mũndũ-wa-nja ũcio, makĩmũringĩrĩria, akĩya kũigua uuge wao. Tondũ ũcio agĩgĩũkĩra hau thĩ, agĩikarĩra ũrĩrĩ igũrũ.
• 24. Nake mũndũ-wa-nja ũcio agĩkorũo aarĩ na njaũ noru ya gĩcegũ nyũmba thĩinĩ; nake akĩhĩkĩrĩria akĩmĩthĩnjithia, agĩcoka akĩoya mũtu, akĩũmanda, agĩthondeka mĩgate ĩtarĩ mĩimbie naguo,
• 25. akĩmĩtwarĩra Saulu na ndungata ciake, nao makĩrĩa. Magĩgĩcoka makĩarahũka, magĩĩthiĩra ũtukũ o ro ũcio.

Home