Go Back

1 Samueli Chapter 24

• 1. Na gũgĩkinya atĩrĩ, atĩ hĩndĩ ĩrĩa Saulu aahũndũkire oimĩte kũrũmĩrĩra Afilisiti-rĩ, agĩkĩheo ũhoro akĩĩrũo ũũ: Atĩrĩrĩ, Daudi arĩ werũ wa Eni-gedi.
• 2. Nake agĩkĩoya andũ ngiri ithatũ mathurĩtwo thĩinĩ wa andũ othe a Isiraeli, agĩthiĩ nao gũcaria Daudi, na andũ ake, ndwaro-inĩ cia mahiga marĩa matũũragwo nĩ mbũri cia werũ.
• 3. Agĩgĩkinya handũ haarĩ ciugũ cia mbũri njĩra-inĩ, naho haarĩ ngurunga; Saulu agĩgĩtonya thĩinĩ eteithie. Nake Daudi na andũ ake magĩkorũo maaikarĩte na kũu thĩinĩ mũno ngurunga-inĩ ĩo.
• 4. Andũ a Daudi magĩkĩmwĩra ũũ: Atĩrĩrĩ, ũmũthĩ nĩguo mũthenya ũrĩa Jehova aakwĩrire ũũ: Nĩngũrekereria thũ yaku ndĩmĩneane moko-inĩ maku, ũmĩĩke o ta ũrĩa ũkuona kwagĩrĩire. Nake Daudi agĩkĩarahũka, agĩtinia gĩcoora kĩa nguo ĩrĩa ndaya ya Saulu na hitho.
• 5. Na gũgĩkinya atĩrĩ, atĩ thutha-inĩ Daudi agĩthecwo nĩ ngoro nĩ ũndũ wa gũtinia gĩcoora kĩa nguo ya Saulu.
• 6. Agĩkĩĩra andũ ake atĩrĩ, Jehova aro’thũũra ingĩĩka mwathi wakwa, ũcio mũitĩrĩrie maguta wa Jehova, ũndũ ta ũcio wa kũmũtambũrũkĩria guoko gwakwa ndĩmũũkĩrĩre, kuona atĩ nĩwe mũndũ wa Jehova mũitĩrĩrie maguta.
• 7. Tondũ ũcio Daudi agĩgĩkaania andũ ake na kũmera ciugo icio, na ndaigana kũreka mokĩrĩre Saulu. Saulu agĩgĩũkĩra akiuma ngurunga-inĩ ĩo, agĩĩthiĩra.
• 8. Thutha ũcio Daudi o nake agĩũkĩra akiuma ngurunga-inĩ ĩo, akĩanĩrĩra Saulu na thutha wake, akiuga atĩrĩ, Mwathi wakwa, mũthamaki. Na rĩrĩa Saulu ehũgũrire na thutha wake-rĩ, Daudi akĩinamĩrĩra agĩturumithia ũthiũ thĩ, amwĩnyihĩrie.
• 9. Daudi agĩkĩĩra Saulu atĩrĩ, Ũiguaga ndeto cia andũ nĩkĩ rĩrĩa mekuuga ũũ: Atĩrĩrĩ, Daudi nĩacaragia gũkũgera ngero?
• 10. Atĩrĩrĩ, mũthenya wa ũmũthĩ-rĩ, nĩwakĩĩonera na maitho maku ũrĩa Jehova egũkũrekereirie agakũneana moko-inĩ makwa kũu ngurunga-inĩ; na andũ amwe makanjĩra ngũũrage; no rĩrĩ, ndakuona nĩngũcaĩire, ndoiga atĩrĩ, Ndingĩtambũrũkĩria mwathi wakwa guoko gwakwa ndĩmũũkĩrĩre, nĩ ũndũ nĩwe mũndũ wa Jehova ũitĩrĩirio maguta.
• 11. Ningĩ-rĩ, baba, ta kĩrore, ndũkuona gĩcoora kĩa nguo yaku nĩkĩo gĩkĩ gĩĩ guoko gwakwa? Na tondũ nĩndinirie gĩcoora kĩa nguo yaku na ndikũũrage-rĩ, ndũkĩmenye na wone atĩ hatirĩ ũũru, kana ihĩtia, ndĩ narĩo; ndirĩ kwĩhia ngwĩhĩtie, o na harĩa ũracaria kũnduta muoyo.
• 12. Jehova arotũtuithania cira niĩ nawe! Ningĩ Jehova arondĩhĩria harĩ wee; no rĩrĩ, guoko gwakwa kĩũmbe gũtikanagũũkĩrĩre.
• 13. O ta ũrĩa thimo ya andũ a tene yugaga atĩrĩ, Waganu uumaga o harĩ arĩa aaganu; no rĩrĩ, guoko gwakwa gũtĩgagũũkĩrĩra.
• 14. Rĩu-rĩ, mũthamaki wa Isiraeli oimagarĩte arũmĩrĩre ũ? Nũ ũrũmĩrĩire ũmũteng’eretie na ihenya? No ngui nguũ, kana gathuya.
• 15. Tondũ ũcio Jehova nĩatuĩke mũciri atũtuithanie niĩ nawe, one ũhoro ũcio andũĩrĩre, a’honokie guoko-inĩ gwaku.
• 16. Na rĩrĩ, Daudi aarĩkia kwarĩria Saulu ndeto icio-rĩ, Saulu agĩkĩũria atĩrĩ, Ĩ mũgambo ũcio nĩ waku, mũrũ wakwa, Daudi? Saulu agĩkĩanĩrĩra na mũgambo mũnene akĩrĩra.
• 17. Agĩkĩĩra Daudi atĩrĩ, Wee wĩ mũthingu kũngĩra, nĩ ũndũ nĩũnjĩkĩte maũndũ mega, no niĩ ngwĩkĩte maũndũ moru.
• 18. Ningĩ ũmũthĩ nĩwonanĩtie ũrĩa wananjĩka maũndũ mega; nĩ gũkorũo rĩrĩa Jehova andekereirie aa’neana moko-inĩ maku, ndũnanjũraga.
• 19. Nĩ ũndũ-rĩ, nĩ mũndũ ũrĩkũ hihi ũngĩkĩona thũ yake na amĩrekererie ĩĩthiĩre o ro ũguo na wega? Tondũ ũcio Jehova arogwĩka maũndũ mega nĩ ũndũ wa ũguo ũnjĩkĩte ũmũthĩ.
• 20. Atĩrĩrĩ, rĩu nĩnjũĩ na ma o ma atĩ nĩũgatuĩka mũthamaki; na atĩ ũthamaki wa Isiraeli nĩũkehanda wĩ moko-inĩ maku.
• 21. Tondũ ũcio wĩhĩte rĩu, mbere ya Jehova, uuge ndũkanina mbeũ yakwa ĩrĩa ĩgoka thutha wakwa o kũmĩnina biũ, na atĩ ndũkanina rĩĩtwa rĩakwa rĩthire thĩinĩ wa nyũmba ya baba.
• 22. Nake Daudi agĩkĩĩra Saulu o ro ũguo na mwĩhĩtwa. Nake Saulu agĩkĩĩinũkĩra; no rĩrĩ, Daudi na andũ ake makĩambata magĩcoka kĩhingo-inĩ kĩao kĩa hinya.

Home