Go Back

1 Samueli Chapter 23

• 1. Hĩndĩ ĩo andũ magĩkĩhe Daudi ũhoro, makiuga ũũ: Atĩrĩrĩ, Afilisiti nimarahũrana na itũũra rĩa Keila, na nĩmatunyanĩte ngano ĩrĩa ĩrĩ ihuhĩro-inĩ cia kuo.
• 2. Tondũ ũcio Daudi agĩgĩtuĩria ũhoro he Jehova, akĩũria atĩrĩ, ’Thiĩ ngahũre Afilisiti acio kana aca? Nake Jehova agĩkĩĩra Daudi atĩrĩ, Thiĩ ũhũre Afilisiti acio, ũhonokie Keila.
• 3. Nao andũ a Daudi makĩmwĩra ũũ: Atĩrĩrĩ, rĩu tondũ no tũgwĩtigĩra o na tũkĩrĩ o gũkũ Juda-rĩ, githĩ tũtigagĩĩtigĩra makĩria twathiĩ kũhũranĩra Keila na itungati cia ita cia Afilisiti?
• 4. Daudi agĩgĩtuĩria ũhoro he Jehova ihinda rĩa kerĩ. Nake Jehova akĩmũcokeria, akĩmwĩra atĩrĩ, Ũkĩra, ũikũrũke ũthiĩ Keila; nĩ ũndũ nĩngũrekereria Afilisiti ndĩmaneane moko-inĩ maku.
• 5. Nake Daudi na andũ ake magĩgĩthiĩ Keila, makĩhũrana na Afilisiti, makĩmataha ũhiũ wao mũingĩ, na makĩmoraga rĩũragana inene mũno. Ũguo nĩguo Daudi aahonokirie andũ acio maatũũraga Keila.
• 6. Na gũgĩkinya atĩrĩ, atĩ hĩndĩ ĩrĩa Abiatharu, mũrũ wa Ahimeleku, orĩire kwĩ Daudi kũu Keila, aaikũrũkire kuo anyitĩte ebodi na guoko.
• 7. Ningĩ Saulu agĩkĩheo ũhoro, atĩ Daudi nĩathiĩte Keila. Saulu agĩkiuga atĩrĩ, Ngai nĩamũrekereirie akamũneana moko-inĩ makwa; nĩ gũkorũo rĩu nĩ ta ahingĩirũo nĩ ũndũ wa gũtonya itũũra rĩĩ na ihingo, o na igera cia gũcihinga.
• 8. Nake Saulu agĩgĩĩta andũ othe mathiĩ ita, nĩguo maikũrũke makinye Keila, makarigicĩrie Daudi na andũ ake kuo.
• 9. Nake Daudi akĩmenya atĩ Saulu nĩaacirĩire kũmwĩka ũũru; agĩkĩĩra Abiatharu ũcio mũthĩnjĩri-Ngai atĩrĩ, Rehe ebodi ĩo haha.
• 10. Hĩndĩ ĩo Daudi agĩkĩhoya, akiuga atĩrĩ, Wee Jehova Ngai wa Isiraeli, ti-itherũ, niĩ ndungata yaku, nĩnjiguĩte atĩ Saulu nĩacarĩtie njĩra ya gũkinya gũkũ Keila, anine itũũra rĩrĩ nĩ ũndũ wakwa.
• 11. Rĩu-rĩ, andũ a Keila nĩmekũndekereria ma’neane moko-inĩ make? Ningĩ-rĩ, Saulu nĩegũikũrũka, oke gũkũ, o ta ũrĩa niĩ ndungata yaku njiguĩte? Atĩrĩrĩ, Jehova, Ngai wa Isiraeli, ndagũthaitha ũnjĩre, niĩ ndungata yaku. Nake Jehova akĩmwĩra atĩrĩ, Nĩegũikũrũka.
• 12. Ningĩ Daudi agĩkĩũria atĩrĩ, Andũ a Keila nĩmekũndekereria, twĩ na andũ akwa, ma’neane moko-inĩ wa Saulu? Jehova agĩkiuga atĩrĩ, Nĩmegũkũneana.
• 13. Hĩndĩ ĩo Daudi na andũ acio ake magana matandatũ magĩgĩũkĩra makĩehera kũu Keila, magĩthiĩ kũndũ kũrĩa guothe maahotaga. Naguo ũndũ ũcio ũgĩkĩĩrũo Saulu, atĩ Daudi nĩehonoketie akoima Keila agĩkĩũraga rũgendo rũake.
• 14. Nake Daudi agĩgĩtũũra werũ wa Zifu, bũrũri wĩ irĩma, agĩikara werũ-inĩ kũndũ kwĩ ihingo cia hinya. Nake Saulu akamũcaragia mĩthenya yothe; no rĩrĩ, Ngai ndaigana kũmũneana moko-inĩ make.
• 15. Daudi agĩkĩona atĩ Saulu oimagarĩte agacarie kũmũruta muoyo. Nake Daudi agĩkorũo arĩ o kũu mũtitũ-inĩ wa werũ wa Zifu.
• 16. Na rĩrĩ, Jonathani wa Saulu agĩgĩũkĩra, agĩthiĩ kwĩ Daudi kũu mũtitũ-inĩ, akĩmũũmĩrĩria agĩage na hinya nĩ ũrĩa ehokete Ngai.
• 17. Agĩkĩmwĩra atĩrĩ, Tiga gwĩtigĩra, nĩ ũndũ guoko kwa baba, Saulu, gũtigakuona, na nĩũgatuĩka mũthamaki wa gũthamakĩra Isiraeli, na niĩ nduĩke wa thutha waku; naguo ũndũ ũcio o na baba Saulu nĩaũũĩ.
• 18. Nao magĩkĩrĩkanĩra kĩrĩkanĩro mbere ya Jehova; nake Daudi agĩtũũra o kũu mũtitũ-inĩ, nake Jonathani akĩĩinũkĩra gwake mũciĩ.
• 19. Hĩndĩ ĩo Azifu makĩambata Gibea gwĩ Saulu, makĩmwĩra atĩrĩ, Githĩ Daudi ndehithĩte ng’ongo ciitũ ihingo-inĩ cia hinya mũtitũ-inĩ, kĩrĩma-inĩ kĩa Hakila, kĩrĩa kĩrĩ mwena wa gũthini wa werũ?
• 20. Tondũ ũcio, mũthamaki, ikũrũka o ta ũrĩa maũndũ mothe matariĩ marĩa ũkwĩrirĩria na ngoro yaku, na ithuĩ tũgatuĩke a kũmũneana moko-inĩ ma mũthamaki.
• 21. Saulu agĩkiuga atĩrĩ, Jehova aromũrathima; nĩ ũndũ nĩmũnjiguĩrĩire tha.
• 22. Ta gĩthiĩi mũtĩtĩrithie ũhoro ũcio wega, mũmenye na muone harĩa aikarĩte, na ũrĩa ũmuonete ho; nĩ ũndũ nĩnjĩrĩtwo atĩ nĩekaga maũndũ make na wara mũno.
• 23. Tondũ ũcio, tuĩriai ũhoro ũcio, mũmenye wega kũndũ guothe kũrĩa ehithaga, mũcoke mũũke harĩ niĩ, na mũtigatĩre, tũcoke tũthiĩ na inyuĩ; na gũgakinya atĩrĩ, atĩ angĩkorũo e bũrũri ũyũ, ndĩmũcarie thĩinĩ wa ngiri ciothe cia andũ a Juda o nginya ndĩmuone.
• 24. Nao magĩgĩũkĩra magĩthiĩ, magĩkinya Zifu, Saulu ataanakinya kuo; no rĩrĩ, Daudi na andũ ake magĩkorũo me werũ wa Maoni, o kũu Araba, mwena wa gũthini wa werũ ũcio.
• 25. Nake Saulu na andũ ake magĩthiĩ kũmũcaria. Nao andũ makĩhe Daudi ũhoro ũcio, na tondũ ũcio agĩikũrũka agĩkinya handũ haarĩ rũaro rũa ihiga, agĩikara werũ-inĩ ũcio wa Maoni. Na rĩrĩ, Saulu aaigua ũguo, akĩrũmĩrĩra Daudi na ihenya o kũu werũ-inĩ ũcio wa Maoni.
• 26. Saulu akĩgera mwena ũyũ wa kĩrĩma, nake Daudi na andũ ake makĩgera mwena ũrĩa ũngĩ wa kĩrĩma o ro kĩu; nake Daudi akĩhiũha nĩguo eyeherere kũu nĩ ũndũ wa gwĩtigĩra Saulu; no Saulu na andũ ake makĩrigicĩria Daudi na andũ ake na mĩena yothe mamanyite.
• 27. No hagĩgĩũka mũndũ wareketio gwĩ Saulu amwĩre atĩrĩ, Wĩhĩke mũno ũũke, nĩ ũndũ Afilisiti nĩmatharĩkĩte bũrũri.
• 28. Saulu agĩkĩhũndũka, agĩtiga gũteng’eria Daudi, agĩthiĩ kũhũrana na Afilisiti; na tondũ ũcio magĩgĩĩta handũ hau Sela-hamalekothu.
• 29. Nake Daudi agĩkĩambata akiuma kũu, agĩthiĩ gũtũũra kũndũ kwĩ ihingo cia hinya Eni-gedi.

Home