Go Back

1 Samueli Chapter 22

• 1. Tondũ ũcio Daudi agĩkiuma kũu, akĩĩhonokeria ngurunga-inĩ ya Adulamu; na rĩrĩa ariũ a ithe, na andũ othe a nyũmba ya ithe, maaiguire ũhoro ũcio, magĩikũrũka kũu kũrĩ we.
• 2. Na mũndũ o wothe ũrĩa warĩ na mĩnyamaro, na ũrĩa wothe warĩ na thirĩ, na ũrĩa wothe waiguaga ũũru na ngoro, makĩũngana harĩ we; agĩgĩtuĩka mũnene wao amaathage; nao andũ arĩa aarĩ nao kũu maarĩ ta magana mana.
• 3. Ningĩ Daudi agĩkiumagara agĩthiĩ Mizipa ya Moabi, akĩĩra mũthamaki wa Moabi atĩrĩ, Ta reka baba na maitũ moime kũrĩa matũire rĩu, moke matũũranie nawe, o nginya rĩrĩa ngamenya ũrĩa Ngai ekũnjĩka.
• 4. Agĩkĩmatwara harĩ mũthamaki wa Moabi; magĩikarania nake ihinda rĩrĩa rĩothe Daudi aarĩ kĩhingo-inĩ kĩu.
• 5. Nake mũnabii, ti Gadi, agĩkĩĩra Daudi atĩrĩ, Tiga gũikara kĩhingo-inĩ gĩkĩ; ehera gũkũ wĩthiĩre bũrũri wa Juda. Daudi agĩkiuma kũu, agĩthiĩ mũtitũ-inĩ wa Merethu.
• 6. Nake Saulu akĩigua atĩ Daudi na andũ arĩa maarĩ nake nĩmonetwo. Na rĩrĩ, Saulu aarĩ Gibea, na aaikarĩte thĩ gĩtina-inĩ kĩa mũbinde, o kũu Rama, anyitĩte itimũ rĩake na guoko; nacio ndungata ciake ciothe ikamũrũgama na ndwere ciothe.
• 7. Nake Saulu agĩkĩĩra ndungata ciake icio ciamũrũgamĩte na ndwere ciothe atĩrĩ, Ta thikĩrĩriai rĩu, inyuĩ Abenjamini aya; anga mũrũ wa Jesii aamũhe o mũndũ wanyu mĩgũnda ya irio, na ya mĩthabibu; ningĩ githĩ inyuothe aakĩmũtua anene a gwathaga mbũtũ cia athigari ngiri, o na cia athigari igana,
• 8. atĩ nĩkĩo inyuothe mũgĩĩte ndundu ya kũnjũkĩrĩra, na hakaaga mũndũ o na ũmwe ũngĩnyumbũrĩra rĩrĩa mũrũ wakwa mekũrĩa karĩko na mũrũ wa Jesii; ningĩ hakaaga mũndũ o na ũmwe wanyu ũngĩnjakaĩra, kana anyumbũrĩre ũhoro wa atĩ mũrũ wakwa nĩaikĩrĩirie ndungata yakwa ĩnjũkĩrĩre, na atĩ ĩikarage ĩnjoheirie, o ta ũrĩa gũtariĩ ũmũthĩ?
• 9. Hĩndĩ ĩo Doegu, ũcio Mũedomu warũgamĩte hamwe na ndungata cia Saulu, agĩgĩcokia atĩrĩ, Niĩ nĩndonire mũrũ wa Jesii okĩte Nobu kũrĩ Ahimeleku, mũrũ wa Ahitubu;
• 10. nake akĩmũtuĩrĩria ũhoro he Jehova, na akĩmũhe irio, ningĩ akĩmũnengera rũhiũ rũa njora rũa Goliathu, ũrĩa Mũfilisiti.
• 11. Nake mũthamaki agĩkĩrekania Ahimeleku, mũthĩnjĩri-Ngai, mũrũ wa Ahitubu, agetwo, na andũ othe a nyũmba ya ithe, arĩa maarĩ athĩnjĩri-Ngai kũu Nobu; nao othe magĩthiĩ kwĩ mũthamaki.
• 12. Saulu agĩkiuga atĩrĩ, Ta thikĩrĩria wee, mũrũ wa Ahitubu. Nake Ahimeleku agĩcokia atĩrĩ, Niĩ ũyũ haha, mwathi wakwa.
• 13. Saulu agĩkĩmũũria atĩrĩ, Nĩ kĩ gĩtũmĩte mũgĩe ndundu ya kũnjũkĩrĩra na mũrũ wa Jesii, kuona atĩ nĩwamũheire irio, na ũkĩmũhe rũhiũ rũa njora, na ũkĩmũtuĩrĩria ũhoro he Ngai, nĩguo anjũkĩrĩre aikare anjoheirie, o ta ũrĩa gũtariĩ ũmũthĩ?
• 14. Nake Ahimeleku agĩcokeria mũthamaki, akĩmũũria atĩrĩ, Rĩu mũthamaki witũ-rĩ, thĩinĩ wa ndungata ciaku ciothe nĩ ĩrĩkũ ĩĩhokekete ta Daudi, mũthoniguo, ũrĩa ũtuĩtwo wa cira-inĩ waku, na agatĩĩka thĩinĩ wa nyũmba yaku?
• 15. Kaĩ ũmũthĩ arĩ guo ndakĩambĩrĩria kũmũtuĩrĩria ũhoro he Ngai? Kũroaga gũtuĩka ũguo! Mũthamaki witũ, tiga kũnjokereria ũndũ o na ũrĩkũ niĩ ndungata yaku, kana andũ othe a nyũmba ya baba, nĩ ũndũ niĩ, ndungata yaku, ndiũĩ ũndũ o na ũmwe wa maũndũ macio mothe, mũnyinyi kana mũnene.
• 16. Mũthamaki agĩkiuga atĩrĩ, Wee Ahimeleku ti-itherũ nĩũgũkua, we mwene, o na andũ othe a nyũmba ya thoguo.
• 17. Ningĩ mũthamaki akĩĩra amũrangĩri acio maamũrũgamĩte na ndwere ciothe atĩrĩ, Ta hũgũkai, mũũrage athĩnjĩri-Ngai aya a Jehova, nĩ ũndũ o nao marĩ o rũmwe na Daudi; ningĩ nĩ ũndũ nĩmaamenyete atĩ nĩ kũũra oraga, na makĩaga kũnyumbũrĩra ũhoro ũcio. No rĩrĩ, ndungata cia mũthamaki nĩciaregire gũtambũrũkia moko ma cio iguthũkĩre athĩnjĩri-Ngai a Jehova.
• 18. Mũthamaki agĩkĩĩra Doegu atĩrĩ, Hũgũka arĩ wee, ũũrage athĩnjĩri-Ngai aya. Nake Doegu, ũcio Mũedomu, agĩkĩhũgũka, akĩmaguthũkĩra, akĩũraga athĩnjĩri-Ngai acio; na mũthenya o ro ũcio akĩũraga andũ mĩrongo ĩnana na atano arĩa mehumbĩte ebodi ya gatani.
• 19. Narĩo Nobu, itũũra rĩa athĩnjĩri-Ngai, akĩrĩhũra na hiũ cia njora, akĩũraga arũme, na andũ-a-nja, na ciana, na ngenge ikuonga, na ng’ombe, na ndigiri, na mbũri, acihũrĩte na hiũ cia njora.
• 20. Na mũndũ ũmwe wa ariũ a Ahimeleku, mũrũ wa Ahitubu, wetagwo Abiatharu, akĩhonoka, akĩũra, akĩrũmĩrĩra Daudi.
• 21. Nake Abiatharu ũcio agĩkĩĩra Daudi atĩ Saulu nĩoragĩte athĩnjĩri-Ngai a Jehova.
• 22. Daudi agĩkĩĩra Abiatharu atĩrĩ, Mũthenya o ro ũcio rĩrĩa ndonire Doegu Mũedomu e ho-rĩ, nĩndamenyire atĩ ndarĩ hingo atekwĩra Saulu. Hĩ! Ti-itherũ nĩ niĩ ndakĩrehereire andũ othe a nyũmba ya thoguo gĩkuũ!
• 23. Wee gĩikare hamwe na niĩ, na ndũgetigĩre; nĩ gũkorũo mũndũ ũrĩa ũgũcaria kũnduta muoyo nowe ũracaria gũkũruta muoyo o nawe; nĩ ũndũ wĩ na niĩ nĩũgũtũũra wĩ mũmenyerere wega.

Home