Go Back

1 Samueli Chapter 21

• 1. Nake Daudi agĩgĩthiĩ Nobu kwĩ Ahimeleku, mũthĩnjĩri-Ngai; nake Ahimeleku agĩthiĩ gũtũnga Daudi akĩinainaga, akĩmũũria atĩrĩ, Kaĩ wĩ wiki nĩ ũndũ kĩ, na hakaaga mũndũ mwĩ nake?
• 2. Nake Daudi agĩkĩĩra Ahimeleku, mũthĩnjĩri-Ngai, atĩrĩ, Nĩ mũthamaki ũnjathĩte ngeke ũndũ, agakĩnjĩra atĩrĩ, Menya ũmenyithie mũndũ o na ũrĩkũ ũndũ ũrĩa ũtũmĩte ngũrekie, na ũrĩa ngwathĩte; na niĩ ndaathĩrĩra aanake a thiritũ yakwa harĩa tũgũcemania.
• 3. Rĩu-rĩ, nĩ kĩ ũkĩrĩ nakĩo ũngĩĩgwatwo? Ta ’he mĩgate ĩtano ’thiĩ nayo, kana o kĩrĩa kĩrĩ ho.
• 4. Nake mũthĩnjĩri-Ngai ũcio agĩcokeria Daudi, akiuga atĩrĩ, Ndirĩ na mĩgate ĩrĩa ĩhũthĩire kũrĩo, no nĩharĩ mĩgate ĩrĩa mĩamũre; kũngĩkorũo aanake acio nĩmehatĩte andũ-a-nja!
• 5. Daudi agĩgĩcokeria mũthĩnjĩri-Ngai ũcio, akĩmwĩra atĩrĩ, Ti-itherũ nĩtũhatanĩtwo na andũ-a-nja matukũ maya matatũ; hĩndĩ ĩrĩa ndoimagarire-rĩ, indo iria ii na aanake akwa ciarĩ nyamũre, o na harĩa rũarĩ rũgendo o ro ũguo ta rũa ndũire; githĩ ũmũthĩ indo icio itingĩgĩkorũo irĩ nyamũre makĩria?
• 6. Mũthĩnjĩri-Ngai agĩkĩmũhe mĩgate ĩo mĩamũre; nĩ ũndũ gũtiarĩ mĩgate ĩngĩ tiga o ĩrĩa yaigagwo mbere ya Jehova, ĩrĩa yeheragio mũthenya ũrĩa hekũigwo mĩgate ĩngĩ mĩhiũ.
• 7. Na rĩrĩ, mũthenya ũcio-rĩ, hau hagĩgĩkorũo he mũndũ ũmwe wa ndungata cia Saulu waikarĩtio ho mbere ya Jehova akagirio athiĩ, na etagwo Doegu, Mũedomu, warĩ mũnene wa arĩithi a Saulu.
• 8. Nake Daudi agĩkĩũria Ahimeleku atĩrĩ, Kaĩ haha hatakĩrĩ itimũ wĩ narĩo, kana rũhiũ rũa njora? Nĩ ũndũ-rĩ, ndiokire na rũhiũ rũakwa rũa njora, kana indo ciakwa cia mbaara, nĩ gũkorũo ũndũ ũcio wa mũthamaki wendaga gwĩkwo na ihenya.
• 9. Mũthĩnjĩri-Ngai akiuga atĩrĩ, Rũhiũ rũa njora rũa Goliathu, Mũfilisiti ũrĩa woragĩire kĩanda kĩa Ela, rũĩ haha, rũthaĩtwo na tama, na rũigĩtwo na mbarĩ ĩrĩa ĩngĩ ya ebodi; ũngĩkĩenda kuoya rũu-rĩ, kĩruoe; nĩ ũndũ haha hatirĩ rũngĩ tiga o ruo. Daudi agĩkiuga atĩrĩ, Hatirĩ rũngĩ rũega ta rũu, kĩrũ’nengere.
• 10. Daudi agĩgĩũkĩra, akĩĩũrĩra mũthenya ũcio nĩ ũndũ wa gwĩtigĩra Saulu, agĩthiĩ kwĩ Akishi, mũthamaki wa Gathu.
• 11. Nake Akishi akĩĩrũo nĩ ndungata ciake atĩrĩ, Githĩ ũyũ tiwe Daudi, mũthamaki wa bũrũri wao? Nao andũ a kwao-rĩ, githĩ matiainanĩire nyĩmbo-inĩ ciao ũũ: Saulu nĩoragĩte andũ ngiri nyingĩ, Nake Daudi akoraga andũ ngiri makũmi maingĩ?
• 12. Nake Daudi agĩkĩiga ũhoro ũcio ngoro-inĩ yake, agĩĩtigĩra Akishi, mũthamaki wa Gathu, mũno.
• 13. Agĩkĩĩgarũra mũthiĩre wake arĩ o harĩ andũ acio, agĩĩtua ta mũgũrũki e thĩinĩ wao, akĩhara mĩrango ya kĩhingo, ningĩ agĩita rũta rũkĩnyũrũrũkĩra nderu ciake.
• 14. Akishi agĩkĩĩra ndungata ciake atĩrĩ, Hĩ! Kaĩ mũtekuona mũndũ ũyũ nĩ mũgũrũku; mũmũrehete harĩ niĩ nĩkĩ?
• 15. Anga nĩ kwaga njagĩte agũrũki, atĩ nĩkĩo mũndeheire mũndũ ũyũ oke eke maũndũ ma ũgũrũki e mbere yakwa? Ĩ mũndũ ũyũ aagĩtonya nyũmba yakwa hihi?

Home