Go Back

1 Samueli Chapter 20

• 1. Ningĩ Daudi agĩkĩũra akiuma Naiothu, kũu Rama, agĩthiĩ kuonana na Jonathani, akĩmũũria atĩrĩ, Kaĩ ndĩgĩĩkĩte atĩa? Ningĩ-rĩ, ũũru wakwa nĩ ũrĩkũ? Wĩhia ũrĩa ndĩkĩĩhĩtie thoguo, tondũ aragĩcaria kũnduta muoyo-rĩ, nĩ ũrĩkũ?
• 2. Nake akĩmũcokeria atĩrĩ, Ũndũ ũcio ũroaga gwĩkwo! Ndũrĩ hĩndĩ ũngĩkua. Atĩrĩrĩ, baba ndarĩ ũndũ o na ũmwe ekaga mũnene kana mũnyinyi, ataambĩte kũnyumbũrĩra; nĩ kĩ kĩngĩgĩtũma hihi baba a’hithe ũndũ ũcio? Ũguo tiguo.
• 3. Daudi agĩgĩcoka akĩĩhĩta akiuga atĩrĩ, Thoguo nĩoĩ mũno atĩ nĩnjĩtĩkĩrĩkĩte nĩwe, agakiuga atĩrĩ, Menyai mũmenyithie Jonathani ũhoro ũyũ, ndakaigue ũũru. No rĩrĩ, ti-itherũ o ta ũrĩa Jehova atũũraga muoyo, o na ta ũrĩa wee mwene ũtũũraga muoyo-rĩ, no ikinya rĩmwe rĩndiganĩrĩirie na gĩkuũ.
• 4. Ningĩ Jonathani akĩĩra Daudi atĩrĩ, Ũndũ ũrĩa wothe ngoro yaku ĩkwĩrirĩria-rĩ, nĩngũgwĩka guo.
• 5. Daudi agĩkĩĩra Jonathani ũũ: Atĩrĩrĩ, rũciũ nĩ karũgamo ka mweri, na ndirĩ hĩndĩ itaagĩrĩirũo nĩ gũikara irio-inĩ tũrĩanĩre na mũthamaki; no rĩrĩ, nĩ kaba ũreke ’thiĩ nĩguo ngehithe gĩthaka-inĩ o nginya mũthenya wa ĩtatũ hwaĩ-inĩ.
• 6. Na thoguo angĩnjũria-rĩ, ũgakĩmwĩra atĩrĩ, Daudi ara’thaithire ndĩmwĩtĩkĩrie athiĩ abataire mũno, nĩguo ateng’ere akinye Bethi-lehemu, itũũra rĩao; nĩ ũndũ kwĩ igongona rĩkũrutwo rĩa mwaka o mwaka rĩkoniĩ andũ othe a nyũmba yao.
• 7. Nake angĩgĩcokia oige, Nĩ wega, ndungata yaku nĩĩgũkĩgĩa na thayũ; no aarakara, ũkĩmenye nĩ ũũru acirĩire.
• 8. Tondũ ũcio njiguĩra tha ũnjĩke ũndũ ũcio, niĩ ndungata yaku; nĩ ũndũ nĩtũrĩkanĩrĩte kĩrĩkanĩro nawe tũkĩgwetaga rĩĩtwa rĩa Jehova; no rĩrĩ, hangĩkorũo he ũũru ndĩ naguo-rĩ, njũraga arĩ wee, wee mwene; nĩ ũndũ-rĩ, ũkũndwara gwĩ thoguo nĩ ũndũ kĩ?
• 9. Jonathani agĩkiuga atĩrĩ, Ũndũ ũcio ũrokũraihĩrĩria! Nĩ ũndũ ingĩmenya atĩ he ũũru ũcirĩirũo nĩ baba agwĩke o na atĩa-rĩ, githĩ ndingĩkũhe ũhoro waguo?
• 10. Daudi agĩkĩĩra Jonathani atĩrĩ, Ĩ hihi thoguo angĩgĩgũcokeria ũhoro ehĩĩte-rĩ, ndĩrĩkĩheo ũhoro nũ?
• 11. Nake Jonathani agĩkĩĩra Daudi atĩrĩ, Ta ũka tũthiĩ na kũrĩa werũ-inĩ. Magĩgĩthiĩ o erĩ na kũu werũ-inĩ.
• 12. Jonathani agĩkĩĩra Daudi atĩrĩ, Jehova, Ngai wa Isiraeli, arotuĩka mũira wa atĩ rũciũ, ihinda ta rĩrĩ, kana mũthenya wa ĩtatũ, rĩrĩa ngakorũo nduĩrĩtie ũhoro waku kwĩ baba-rĩ, hangĩgakorũo harĩ ũndũ mwega ũkũrorete, wee Daudi, githĩ ndigagĩkũrekeria mũndũ, nguumbũrĩre ũhoro ũcio?
• 13. Jehova aro’thũũra niĩ, Jonathani, o na anjĩke ũũru makĩria, kũngĩkorũo nĩ ũndũ mũũru baba endete gũgwĩka, na niĩ njage gũkuumbũrĩra ũndũ ũcio, ngwĩre wĩeherere, nĩguo wĩthiĩre na thayũ; Jehova aroikara hamwe nawe, o ta ũrĩa aikarĩte na baba!
• 14. Ndagũthaitha ũnjiguagĩre tha ta cia Jehova; na ti o hĩndĩ ĩrĩa ndĩ muoyo iiki, atĩ nĩguo ndige gũkua;
• 15. no rĩrĩ, atĩ ndũkananjehererie tha icio ciaku thĩinĩ wa nyũmba yakwa tene na tene; aca-ni, ndũkanacieherie o na hĩndĩ ĩrĩa Jehova agakorũo aninĩte thũ ciaku ciothe, wee Daudi, gũkũ thĩ guothe.
• 16. Tondũ ũcio Jonathani agĩkĩgĩa kĩrĩkanĩro na nyũmba ya Daudi, akiuga atĩrĩ, Jehova nĩakeyũrĩria ũhoro ũcio he thũ cia Daudi.
• 17. Ningĩ Jonathani agĩtũma Daudi ehĩte rĩngĩ, nĩ ũndũ wa ũrĩa aamwendete mũno o ta ũrĩa eyendete we mwene.
• 18. Nake Jonathani agĩkĩmwĩra atĩrĩ, Rũciũ nĩ karũgamo ka mweri, nawe nĩũkorio harĩa ũrĩ, nĩ ũndũ gĩtĩ gĩaku gĩgakorũo kĩrĩ gĩtheri.
• 19. Na wanina mĩthenya ĩtatũ, nĩũgacoka ũikũrũke na ihenya ũthiĩ harĩa wehithĩte rĩrĩa ũhoro waku waaragio, ũikare ihiga-inĩ rĩa Ezeli.
• 20. Na niĩ nĩngaikia mĩguĩ ĩtatũ na mwena-inĩ warĩo ta arĩ wathi ngwĩgera.
• 21. Na atĩrĩrĩ, nĩngarekia kahĩĩ ndĩkere atĩrĩ, Thiĩ ũgacarie mĩguĩ ĩo. Na ingĩkera kahĩĩ kau ũũ: Atĩrĩrĩ, mĩguĩ ĩĩ mwena-inĩ ũyũ waku, ũmĩoe ũgĩũke, nĩ ũndũ o ta ũrĩa Jehova atũũraga muoyo, ndũrĩ ũũru ũkona, no thayũ.
• 22. No rĩrĩ, ingĩkera kahĩĩ kau ũũ: Atĩrĩrĩ, mĩguĩ ĩĩ mbere yaku, nĩũgethiĩra, nĩ ũndũ Jehova nĩakũrekete wĩyũrĩre.
• 23. Naho ha ũhoro ũrĩa twaranĩirie nawe-rĩ, atĩrĩrĩ, Jehova nĩwe ũgũtũũra e gatagatĩ-inĩ gaitũ nawe tene na tene.
• 24. Nake Daudi agĩkĩĩhitha gĩthaka-inĩ, na mweri warũgama mũthamaki agĩikara thĩ arĩe irio.
• 25. Agĩikarĩra gĩtĩ gĩake o ta mahinda marĩa mangĩ, o gĩtĩ kĩrĩa kĩarĩ rũthingo-inĩ; nake Jonathani akĩrũgama ho, nake Abineri agĩikara thĩ arigainie na Saulu; no handũ ha Daudi haarĩ hatheri.
• 26. No rĩrĩ, Saulu ndaigana kuuga ũndũ o na ũmwe mũthenya ũcio, nĩ ũndũ egereirie atĩrĩ, Nĩ kuona onete ũndũ, na hihi e na thahu; ĩĩ nĩguo, ti-itherũ e na thahu.
• 27. Na gũgĩkinya atĩrĩ, atĩ rũciũ rũrũ rũngĩ thutha wa mweri warũgama, mũthenya wa ĩĩrĩ wa gĩathĩ-rĩ, handũ ha Daudi hagĩkorũo harĩ o hatheri; nake Saulu agĩkĩũria Jonathani, mũriũ, atĩrĩ, Nĩ kĩ kĩgirĩtie mũrũ wa Jesii oke irio-inĩ ira o na kana ũmũthĩ?
• 28. Jonathani agĩgĩcokeria Saulu atĩrĩ, Daudi nĩaa’thaithire mũno atĩ ndĩmwĩtĩkĩrie athiĩ Bethilehemu;
• 29. akĩnjĩra atĩrĩ, Reka ’thiĩ, nĩ ũndũ andũ a nyũmba iitũ me na igongona itũũra-inĩ riitũ, na mũrũ wa baba aanjĩrire ngakorũo ho; ingĩgĩkorũo nĩnjĩtĩkĩrĩkĩte nĩwe-rĩ, reka ’thiĩ ngonane na ariũ a awa. Tondũ ũcio ndanagĩũka metha-inĩ ya mũthamaki.
• 30. Saulu agĩgĩcinwo nĩ marakara mũno nĩ ũndũ wa Jonathani, akĩmwĩra atĩrĩ, Wee mũrũ wa mũndũ mũka mũremu ũtangĩathĩka, githĩ ndiũĩ atĩ ũthurĩte mũrũ wa Jesii nĩguo agũconorithie wee mwene, na aconorithie nyũkwa nĩ ũndũ wa gũgũciara?
• 31. Nĩ ũndũ-rĩ, hĩndĩ ĩrĩa yothe mũrũ wa Jesii egũtũũra gũkũ thĩ, wee ndũkehanda, o na kana ũthamaki waku wĩhande. Gĩũkĩre ũmũgĩrithie o ro rĩu oke harĩ niĩ, nĩ ũndũ ndarĩ hingo ategũkua.
• 32. Jonathani agĩgĩcokeria Saulu, ithe, akĩmũũria atĩrĩ, Kĩrĩa gĩgũgĩtũma oragwo-rĩ, nĩ kĩ? Kaĩ ekĩte atĩa?
• 33. Nake Saulu akĩmũikĩria itimũ rĩake, amũthece narĩo, na tondũ ũcio Jonathani agĩkĩmenya atĩ ithe nĩaacirĩire kũũraga Daudi.
• 34. Jonathani agĩgĩũkĩra akiuma hau metha-inĩ, arakarĩte mũno mũno, na ndaigana kũrĩa irio mũthenya ũcio wa kerĩ wa mweri ũcio, nĩ ũndũ nĩaaiguire ũũru mũno nĩ ũndũ wa Daudi, nĩ gũkorũo ithe nĩaamũconorithĩtie.
• 35. Na gũgĩkinya atĩrĩ, atĩ rũcinĩ rũrũ rũngĩ Jonathani akiumagara agĩthiĩ na hau gĩthaka-inĩ, o ihinda rĩrĩa rĩatuĩtwo nĩwe na Daudi, agĩgĩthiĩ na kahĩĩ.
• 36. Agĩkĩĩra kahĩĩ kau gake atĩrĩ, Ta teng’era ũgacarie mĩguĩ ĩo ngũikia. Kahĩĩ gaagĩteng’era, agĩikia mũguĩ na mbere yako.
• 37. Na rĩrĩ, kahĩĩ kau gaakinya harĩa mũguĩ ũcio waikĩtio nĩ Jonathani ũrĩ-rĩ, Jonathani akĩanĩrĩra kahĩĩ kau, agĩkoria atĩrĩ, Githĩ mũguĩ ndũrĩ na hau mbere yaku?
• 38. Ningĩ Jonathani akĩanĩrĩra akĩĩra kahĩĩ kau atĩrĩ, Teng’era ũhiũhe, na ndũgaikare. Nako kahĩĩ kau ka Jonathani gakĩũngania mĩguĩ ĩo, gagĩthiĩ he mwathi wako.
• 39. No rĩrĩ, kahĩĩ kau gatiamenyire thundo ĩrĩa ndutane, tiga o Jonathani na Daudi maamenyaga ũhoro ũcio.
• 40. Jonathani agĩkĩnengera kahĩĩ kau indo ciake cia mbaara, agĩkera atĩrĩ, Thiaga nacio kũu itũũra-inĩ.
• 41. Na rĩrĩ, o rĩmwe kahĩĩ kau kaarĩkia gũthiĩ-rĩ, Daudi agĩũkĩra akiuma na mwena wa Gũthini, agĩkĩĩgũithia, agĩturumithia ũthiũ thĩ, akĩinamĩrĩra mahinda matatũ; nao erĩ, Jonathani na Daudi, magĩkĩmumunyana, na makĩrĩranĩra, o nginya Daudi agĩkĩrĩrĩria kũrĩra.
• 42. Jonathani agĩkĩĩra Daudi atĩrĩ, Thiĩ na thayũ, kuona atĩ nĩtwehĩtanĩire tũkĩgwetaga rĩĩtwa rĩa Jehova tũkiugaga ũũ: Jehova nĩwe ũgũtũũra e mũira gatagatĩ-inĩ gaitũ nawe, o na gatagatĩ-inĩ ka mbeũ yakwa na yaku tene na tene. Daudi agĩgĩũkĩra agĩĩthiĩra; nake Jonathani agĩcoka kũu itũũra-inĩ.

Home