Go Back

1 Samueli Chapter 2

• 1. Hana agĩkĩhoya, akiuga atĩrĩ: Ngoro yakwa ĩracanjamũkĩra Jehova, Na rũhĩa rũakwa rũkaambarario nĩ ũndũ wa Jehova; Kanua gakwa gatumũrĩtwo mũno njarĩrie thũ ciakwa, Nĩ gũkorũo ngenete nĩ ũndũ wa ũrĩa ũ’honoketie.
• 2. Gũtirĩ ũngĩ mũtheru ta Jehova, Nĩ ũndũ gũtirĩ ũngĩ tiga o we wiki, Kana gũkagĩa Rũaro rũngĩ rũa Ihiga o na rũrĩkũ rũtariĩ ta Ngai witũ.
• 3. Mũtikanacoke kwaria na mwĩĩkĩrĩro mũnene ũguo, Naguo mwĩtĩo menyai mũreke ũmuume tũnua-inĩ twanyu; Nĩ gũkorũo Jehova nĩwe Ngai ũrĩa ũũĩ maũndũ, Nacio ciĩko cia andũ ecũranagia ũhoro wacio o wega.
• 4. Mota ma andũ arĩa marĩ hinya-rĩ, nĩ moinangĩku, O nao arĩa maahĩngĩtwo nĩmohetwo hinya njohero-inĩ ciao.
• 5. Arĩa maarĩ ahũnu-rĩ, nĩmeandĩkithĩtie nĩ ũndũ wa irio, Nao arĩa maarĩ ahũtu, nĩmathirĩtwo nĩ mĩhang’o; Ĩĩ, ti-itherũ thata nĩ njiaru ciana mũgwanja, Nake ũrĩa wĩ na ciana nyingĩ akorũo nĩ hinya.
• 6. Jehova nĩwe ũũraganaga, na agatũma gũtũũrũo muoyo; Nĩwe ũikũrũkagia mũndũ Kwa-Ngoma, na nĩwe wambatagia mũndũ oime kuo.
• 7. Jehova nĩwe ũkĩaranagia, na nĩwe ũtonganagia; Nĩwe ũnyihanagia, na nĩwe ũtũũganagĩria.
• 8. Oyaga mũthĩni na igũrũ, akamũruta rũkũngũ-inĩ, Mwagi amuoyaga na igũrũ akamũruta kĩara-inĩ kĩa mahuti, Nĩ getha maikaranagie na anene, Na magayage ũikarĩri wa gĩtĩ kĩa ũnene; Nĩ gũkorũo itugĩ iria itiirĩte thĩ nĩ cia Jehova, Na nĩwe ũigĩrĩire thĩ ĩno igũrũ rĩacio.
• 9. Magũrũ ma andũ ake arĩa atheru-rĩ, nĩwe ũrĩmamenyagĩrĩra, No rĩrĩ, arĩa aaganu magakirĩrio nduma-inĩ, Nĩ gũkorũo gũtirĩ mũndũ ũngĩhootana nĩ kũgĩa hinya.
• 10. Arĩa matetanagia na Jehova nĩ gũthuthwo magathuthangwo; Akamarurumĩria marurumĩ arĩ o igũrũ amokĩrĩre. Jehova nĩwe ũgacirithia ituri cia thĩ; Na mũndũ wake ũrĩa atuĩte mũthamaki amũhe hinya, Atũũgĩrie rũhĩa rũa mũndũ wake ũrĩa ũitĩrĩirio maguta.
• 11. Nake Elikana agĩgĩcoka Rama akĩinũka gwake mũciĩ. Nako kaana kau gagĩtungatĩra Jehova, karĩ he Eli ũcio mũthĩnjĩri-Ngai.
• 12. Na rĩrĩ, ariũ a Eli maarĩ aaganu mũno; matioĩ Jehova.
• 13. Tondũ-rĩ, ũrĩa athĩnjĩri-Ngai acio maamenyerete gwĩka maũndũ makoniĩ andũ arĩa mokaga kuo, nĩ atĩ rĩrĩa mũndũ o wothe aathiĩ kũruta igongona, ndungata ya mũthĩnjĩri-Ngai ĩgathiĩ nyama-inĩ ikĩrugwo, ĩĩ na njibe ya mĩthece ĩtatũ guoko,
• 14. ĩgakĩmĩtobokia nyũngũ-inĩ ya kĩgera, kana thuburia, kana gĩteng’ũ, kana nyũngũ ya rĩũmba, nayo nyama o yothe ĩrĩa ĩrĩthecwo na njibe io ĩkarutwo nayo, mũthĩnjĩri-Ngai agethiĩra nayo. Ũguo nĩguo mekaga kũu Shilo, mageka Aisiraeli othe arĩa maathiaga kuo.
• 15. Ningĩ-rĩ, o na maguta matanacinwo, ndungata ya mũthĩnjĩri-Ngai ĩgathiĩ, ĩkera mũndũ ũrĩa ũkũruta igongona atĩrĩ, Heana nyama ĩkarangĩrũo mũthĩnjĩri-Ngai, nĩ ũndũ ndangĩoya nyama yaku ya ndugo, tiga o njĩthĩ.
• 16. Na rĩrĩ, mũndũ ũcio angĩmĩĩra ũũ: Amba ũrũgame hanini mũira wa macine maguta, na thutha ũcio ũcoke woe o ta ũrĩa ũkwenda, ndungata ĩo ĩkamũcokeria atĩrĩ, Aca, ũkũ’nengera o ro rĩu; kwaaga ũguo, ngũmĩĩyoera na hinya.
• 17. Naguo wĩhia wa aanake acio wakĩrĩ mũnene mũno mbere ya Jehova; nĩ gũkorũo andũ nĩmaanyararaga ũhoro ũcio wa kũrutĩra Jehova igongona.
• 18. No rĩrĩ, Samueli nĩ gũtungata aatungataga mbere ya Jehova arĩ o mwana mũnyinyi, ehotorete ebodi ya gatani.
• 19. O na ningĩ nyina nĩaamũtumagĩra gakanjũ, akamũtwaragĩra mwaka o mwaka, hĩndĩ ĩrĩa maambatania na mũthuriwe, makarute igongona rĩrĩa rĩarutagwo mwaka o mwaka.
• 20. Nake Eli agĩkĩrathima Elikana, na mũtumia wake, akiuga atĩrĩ, Jehova arokũhe mbeũ na mũndũ-wa-nja ũyũ ya gũcoka ithenya rĩa mwana ũyũ wamũrĩirũo Jehova. Nao magĩkĩinũka kwao mũciĩ.
• 21. Nake Jehova agĩkĩng’ethera Hana, nake akĩgĩa ihu, agĩgĩciara ihĩĩ ithatũ, na airĩtu erĩ. Nake mwana ũcio, ti Samueli, agĩkũrĩra kũu mbere ya Jehova.
• 22. Na rĩrĩ, hĩndĩ ĩo Eli aarĩ mũkũrũ mũno, na nĩaaiguaga maũndũ mothe marĩa ariũ ake mekaga Aisiraeli othe, na ũrĩa maakomaga na aka arĩa maarutagĩra wĩra mũromo-inĩ wa hema-ya-gũtũnganwo.
• 23. Nake akĩmoria atĩrĩ, Mwĩkaga maũndũ ta macio nĩ ũndũ kĩ? Nĩ ũndũ-rĩ, nĩndĩraigua ũhoro wanyu na andũ aya othe, wa ũrĩa mwĩkaga maũndũ moru.
• 24. Aca, ũguo tiguo, ariũ akwa; nĩ ũndũ-rĩ, ũhoro ũcio ndĩraigua ti mwega; nĩ kũhĩtithia mũrahĩtithia andũ a Jehova.
• 25. Mũndũ ũmwe angĩĩhia mũndũ ũrĩa ũngĩ-rĩ, Ngai nĩakamũcirithia; no rĩrĩ, mũndũ angĩkĩĩhia Jehova-rĩ, nũ ũgakĩmuthaithanĩrĩra? No rĩrĩ, o na gwatuĩka ũguo, matiigana kũigua uuge wa ithe wao, nĩ ũndũ Jehova nĩaacirĩire kũmoraga.
• 26. Nake mwana ũcio, ti Samueli, agĩkĩrĩrĩria gũkũra, akĩendeka nĩ Jehova o na andũ.
• 27. Na rĩrĩ, hagĩgĩthiĩ mũndũ wa Ngai he Eli, akĩmwĩra atĩrĩ, Jehova ekuuga ũũ: Atĩrĩrĩ, githĩ ndieguũrĩirie nyũmba ya thoguo, hĩndĩ ĩrĩa maarĩ ũkombo-inĩ Misiri mũciĩ kwa Firauni?
• 28. Ningĩ-rĩ, githĩ ndiathurire thoguo ngĩmwamũra mĩhĩrĩga-inĩ yothe ya Isiraeli, atuĩke mũthĩnjĩri-Ngai wakwa, nĩ getha ahaicage kĩgongona-inĩ gĩakwa, acinĩre ũbumba ho, na ehumbage ebodi, arĩ mbere yakwa? Ningĩ-rĩ, githĩ ndiaheire nyũmba ya thoguo indo ciothe iria irutagwo nĩ ciana cia Isiraeli cia mahaki ma gũcinwo na mwaki?
• 29. Rĩu-rĩ, nĩ kĩ gĩtũmĩte mũgũthe igongona rĩrĩa ndutagĩrũo na hati, o na indo iria irutagwo cia magongona, o icio ndaathanire irutagĩrũo gĩikaro-inĩ gĩakwa; nao ariũ aku ũkamatĩa kũngĩra, nĩ ũndũ wa ũrĩa mwĩnoragia na indo iria njega mũno makĩria cia magongona mothe ma andũ akwa Aisiraeli?
• 30. Tondũ ũcio Jehova, Ngai wa Isiraeli, ekuuga atĩrĩ, Ti-itherũ nĩndoigire o kuuga na ma atĩ andũ a nyũmba yaku, o na a nyũmba ya thoguo, megũtũũra mathiaga mbere yakwa tene na tene; no rĩrĩ, rĩu Jehova ekuuga atĩrĩ, Ũndũ ũcio ũrondaihĩrĩria! Nĩ ũndũ-rĩ, arĩa mandĩyaga, nĩo o na niĩ ndĩrĩtĩaga; na arĩa ma’menete, nĩmarĩonagwo ta matarĩ bata.
• 31. Atĩrĩrĩ, matukũ nĩmagoka marĩa ngakũnina hinya, o na ’nine hinya wa andũ a nyũmba ya thoguo, o nginya hakaaga mũndũ o na ũmwe mũkũrũ thĩinĩ wa nyũmba yaku.
• 32. Nawe nĩũkona thĩna ũrĩa ũkoneka gĩikaro-inĩ gĩakwa, o na harĩa Ngai akahe Isiraeli ũtonga wa mĩthemba yothe; na hatikagĩa mũndũ o na ũmwe mũkũrũ thĩinĩ wa nyũmba yaku tene na tene.
• 33. O nake mũndũ waku ũrĩa itakeheria biũ kĩgongona-inĩ gĩakwa-rĩ, agatuĩka o wa gũtũma maitho maku mabicĩrĩre more, na wa kũiguithagia ngoro yaku ũũru; ningĩ andũ othe arĩa marĩongererekaga thĩinĩ wa nyũmba yaku-rĩ, marĩkuaga maatuĩka andũ agima.
• 34. Naguo ũndũ ũrĩa ũgakora ariũ aku erĩ, Hofini na Finehasi, nĩguo ũgatuĩka kĩmenyithia harĩ wee, naguo nĩ ũyũ, atĩ o erĩ magakua o mũthenya ũmwe.
• 35. Na niĩ nĩngearahũrĩra mũthĩnjĩri-Ngai mwĩhokeku, ũrĩa ũgekaga maũndũ marĩa me ngoro-inĩ yakwa, o na marĩa ndĩĩcirĩtie; na nĩngahanda nyũmba yake itũũre ĩrũmĩte; na nĩagatũũra athiaga mbere ya mũndũ wakwa ũrĩa ũgaitĩrĩrio maguta, tene na tene.
• 36. Na nĩgũgakinya atĩrĩ, atĩ mũndũ o wothe ũrĩa ũgatigara wa nyũmba yaku, nĩagathiĩ kũmũturĩria ndu nĩguo aheo gathumuni, o na kamũgate, na acoke oige atĩrĩ, Ta ’he wĩra ũmwe wa mawĩra ma athĩnjĩri-Ngai, nĩ getha nũmage kenyũ ka mũgate.

Home