Go Back

1 Samueli Chapter 14

• 1. Na rĩrĩ, mũthenya ũmwe gũgĩkĩoneka atĩrĩ, atĩ Jonathani wa Saulu akĩĩra mwanake ũrĩa wamũkuuagĩra indo ciake cia mbaara atĩrĩ, Ũka tũringe mũrĩmo ũrĩa, tũkinye kĩhingo-inĩ kĩu kĩa Afilisiti, o kũu mũrĩmo. No ndaigana kwĩra ithe.
• 2. Nake Saulu aaikarĩte mwena wa mũthia mũno wa Gibea, gĩtina-inĩ kĩa mũkomamanga ũrĩa ũrĩ Migironi, nao andũ arĩa maarĩ nake maarĩ ta andũ magana matandatũ;
• 3. ningĩ Ahija, o ũcio mũrũ wa Ahitubu, mũrũ wa nyina na Ikabodu wa Finehasi, mũrũ wa Eli mũthĩnjĩri-Ngai wa Jehova ũrĩa warĩ Shilo, aarĩ hamwe nake; nake nĩehumbĩte ebodi. Nao andũ acio matiamenyete atĩ Jonathani nĩaathiĩte.
• 4. Na rĩrĩ, gatagatĩ-inĩ ka mĩkuru ĩrĩa Jonathani endaga kũgera akinye kĩhingo-inĩ kĩa Afilisiti-rĩ, haarĩ rũaro rũnene rũa ihiga rũcomokete mũthia ta igego mwena ũmwe, o na hakagĩa rũaro rũngĩ rũnene rũa ihiga, rũcomokete mũthia ta igego o ro ũguo mwena ũrĩa ũngĩ; nacio ndwaro icio cierĩ-rĩ, rũmwe rũetagwo Bozezi, na rũrĩa rũngĩ Senehe.
• 5. Ningĩ ndwaro icio cierĩ, rũmwe rũehandĩte mwena wa gathigathini rũng’etheire Mikimashi, na rũrĩa rũngĩ rũkehanda mwena wa gũthini rũng’etheire Geba.
• 6. Jonathani agĩkĩĩra mwanake ũcio wamũkuuagĩra indo ciake cia mbaara atĩrĩ, Ũka tũringe mũrĩmo ũrĩa, tũkinye kĩhingo-inĩ kĩa andũ arĩa mataruaga; hihi no gũkorũo Jehova nĩegwĩka kaũndũ nĩ ũndũ witũ, nĩ gũkorũo Jehova ndarĩ kĩgiria kĩngĩgiria ahonokanie na andũ aingĩ, kana na anyinyi.
• 7. Nake mũndũ ũcio wamũkuuagĩra indo cia mbaara akĩmwĩra atĩrĩ; Ĩka maũndũ mothe marĩa marĩ ngoro-inĩ yaku, ũgĩthiĩ; atĩrĩrĩ, ndĩ hamwe nawe kũndũ kũrĩa guothe ngoro yaku ĩrĩenda gũthiĩ.
• 8. Nake Jonathani agĩkiuga atĩrĩ, Tũkũringa mũrĩmo harĩ andũ arĩa, tũmeonithie.
• 9. Nao mangĩgĩtwĩra atĩrĩ, Twetererei o nginya tũmũkore hau, tũkĩrũgame twĩhandĩte o ro ũguo harĩa tũrĩ, na tũtiambate harĩ o.
• 10. No mangĩtwĩra ũũ: Ambatai gũkũ tũrĩ; tũkiambate, nĩ gũkorũo Jehova nĩamaneanĩte moko-inĩ maitũ; ũndũ ũcio nĩguo ũgũtuĩka kĩmenyithia harĩ ithuĩ.
• 11. Nao erĩ makĩĩonithia gĩtungati gĩa athigari kĩa Afilisiti; nao Afilisiti makiuga atĩrĩ, Hĩ! Ta onei Ahibirania makiuma marima-inĩ kũrĩa mehithĩte!
• 12. Nao andũ a gĩtungati kĩu makĩgwata kwaria na Jonathani na mũndũ ũcio wamũkuuagĩra indo cia mbaara, makĩmera atĩrĩ, Ta ambatai mũũke gũkũ tũrĩ, na nĩtũkũmuonia kaũndũ. Nake Jonathani akĩĩra mũndũ ũcio wamũkuuagĩra indo cia mbaara atĩrĩ, Nũmĩrĩra twambate, nĩ ũndũ Jehova nĩamaneanĩte moko-inĩ ma Isiraeli.
• 13. Nake Jonathani akĩhaica atambĩte na moko na magũrũ, mũndũ ũcio wamũkuuagĩra indo cia mbaara arĩ thutha wake; nao Afilisiti magĩkĩgũa moragĩtwo nĩ Jonathani, o nake mũndũ ũcio wamũkuuagĩra indo cia mbaara akĩmoraga arĩ thutha wake.
• 14. Narĩo rĩũragana rĩu rĩa mbere rĩa Jonathani na mũndũ ũcio wamũkuuagĩra indo cia mbaara, rĩarĩ ta andũ mĩrongo ĩĩrĩ, na rĩoraganirũo handũ ha nuthu ya eka ĩmwe.
• 15. Gũgĩkĩgĩa kĩmako kĩnene kũu kĩraaro-inĩ, na mĩgũnda-inĩ, o na harĩ andũ othe; o na gĩtungati kĩu gĩothe, o na acio maathiaga kũninana, o nao makĩinaina; nayo thĩ ĩgĩthingitha; gũgĩkĩgĩa kĩmako kĩnene mũno.
• 16. Nao arangĩri a Saulu me kũu Gibea ya Benjamini magĩcũthĩrĩria, magĩkĩona kĩrĩndĩ kĩu gĩothe kĩharaganĩtie, gĩgathiĩ ũũ na ũũ.
• 17. Hĩndĩ ĩo Saulu agĩkĩĩra andũ arĩa maarĩ hamwe nake atĩrĩ, Ta tarai andũ rĩu, mũmenye mũndũ ũrĩa ũtarĩ ho. Na rĩrĩa maamatarire, makĩona atĩ nĩ Jonathani na mũndũ wake ũcio wamũkuuagĩra indo cia mbaara matarĩ ho.
• 18. Nake Saulu akĩĩra Ahija atĩrĩ, Rehe ithandũkũ rĩa Ngai haha. Nĩ gũkorũo ithandũkũ rĩu rĩa Ngai rĩarĩ kũu hamwe na ciana cia Isiraeli hĩndĩ ĩo.
• 19. Na gũgĩkinya atĩrĩ, atĩ hĩndĩ ĩrĩa Saulu aaragia na mũthĩnjĩri-Ngai, ngũĩ ĩrĩa yarĩ kĩraaro-inĩ kĩa Afilisiti ĩgĩkĩrĩrĩria kũneneha; nake Saulu agĩkĩĩra mũthĩnjĩri-Ngai atĩrĩ, Ruta guoko gwaku.
• 20. Nake Saulu na andũ othe arĩa maarĩ hamwe nake magĩkĩũngana, magĩthiĩ ita-inĩ; na atĩrĩrĩ, magĩkora andũ othe magĩtemengana; gũgĩkĩgĩa ininana inene mũno.
• 21. Nao Ahibirania arĩa maarĩ na Afilisiti mbere ĩo, arĩa maambatanĩtie nao kĩraaro-inĩ moimĩte ndwere ciothe kũu bũrũri ũcio, makĩgarũrũka magĩcoka mwena wa Aisiraeli arĩa maarĩ na Saulu na Jonathani.
• 22. O nao andũ othe a Isiraeli arĩa mehithĩte bũrũri ũrĩa wĩ irĩma nyingĩ wa Efiraimu, rĩrĩa maaiguire atĩ Afilisiti nĩmorĩte, o nao makĩmarũmĩrĩra na ihenya mũno mbaara-inĩ ĩo.
• 23. Ũguo nĩguo Jehova aahonokirie Isiraeli mũthenya ũcio; nayo mbaara ĩo ĩgĩthiĩ ĩgĩkinya gũkuhĩ na Bethi-aveni.
• 24. Nao andũ a Isiraeli makĩnoga mũno mũthenya ũcio; no Saulu nĩehĩtithirie andũ akiuga atĩrĩ, Mũndũ ũrĩa ũrĩrĩa irio o na irĩkũ gũtanatuka na niĩ ngorũo ndĩĩrĩhĩirie harĩ thũ ciakwa-rĩ, arogwatwo nĩ kĩrumi. Tondũ ũcio hatikĩrĩ mũndũ o na ũmwe wa andũ acio wacamire irio.
• 25. Nao andũ acio othe magĩgĩtonya mũtitũ-inĩ, makĩona ũũkĩ wa hako handũ thĩ.
• 26. Na rĩrĩa andũ maagĩtonyire mũtitũ-inĩ ũcio, makĩona ũũkĩ ũcio wa hako ũgĩtaata thĩ, no gũtirĩ mũndũ o na ũmwe waikĩrie guoko kanua, nĩ ũndũ nĩmetigagĩra mwĩhĩtwa ũcio mehĩtithĩtio.
• 27. No rĩrĩ, Jonathani ndaaiguĩte rĩrĩa ithe ehĩtithagia andũ mwĩhĩtwa ũcio; na tondũ ũcio, agĩtambararia guoko, agĩtobokia mũthia wa rũthanju rũrĩa aanyitĩte igua-inĩ rĩa ũũkĩ, agĩcoka agĩikia guoko gwake kanua; namo maitho make magĩthera.
• 28. Hĩndĩ ĩo mũndũ ũmwe wa acio maarĩ ho agĩcokia, akiuga atĩrĩ, Thoguo nĩehĩtithirie andũ mwĩhĩtwa agwatĩirie mũno, oiga atĩrĩ, Kũgwatwo nĩ kĩrumi-rĩ, nĩ mũndũ ũrĩa ũrĩrũma irio ũmũthĩ. Nao andũ magĩgĩkorũo morĩtwo nĩ hinya mũno.
• 29. Jonathani agĩkiuga atĩrĩ, Hĩ, kaĩ baba nĩakĩnyarirĩte bũrũri-ĩ! Ta kĩonei ũrĩa maitho makwa maathera nĩ ũndũ wa ũrĩa njamĩte kaũũkĩ kanini ka ũũkĩ ũyũ.
• 30. Githĩ gũtingĩkĩagĩrĩte makĩria korũo andũ aya nĩ kũrĩa mekũrĩa ũmũthĩ matekũhatwo indo imwe thĩinĩ wa iria matahĩte cia thũ ciao, o iria monete? Nĩ ũndũ-rĩ, rĩũragana rĩrĩa rĩũraganĩtwo thĩinĩ wa Afilisiti rĩu ti rĩnene mũno.
• 31. Magĩkĩhũra Afilisiti mũthenya ũcio mamarutĩtie Mikimashi, makĩmakinyia Aijaloni; nao andũ magĩkĩũrũo nĩ hinya mũno.
• 32. Nao andũ makĩrũũgĩrĩra indo iria maatahĩte, makĩnyita mbũri, na ng’ombe, na tũcaũ, magĩcithĩnjĩra o hau thĩ; nao andũ acio magĩcirĩanĩria na thakame.
• 33. Nake Saulu akĩheo ũhoro, akĩĩrũo ũũ: Atĩrĩrĩ, andũ aya nĩmarehia Jehova, nĩ ũndũ nĩmararĩanĩria nyama na thakame. Nake agĩkiuga atĩrĩ, Nĩmũraagarara watho; ta ngaragarĩriai ihiga inene, mũrĩrehe harĩ niĩ rĩu.
• 34. Ningĩ Saulu akiuga atĩrĩ, Haraganĩriai kũrĩ andũ, mũmere atĩrĩ, Mũndũ o mũndũ ta nĩandehere ndegwa yake haha, o na ndũrũme, mũcithĩnjĩre haha, mũrĩe; na mũtige kwĩhia Jehova mũkĩrĩanĩria nyama na thakame. Nao andũ acio othe, mũndũ o mũndũ agĩgĩtwara ndegwa yake, agĩthiĩ nayo ũtukũ ũcio, magĩcithĩnjĩra hau.
• 35. Nake Saulu agĩgĩakĩra Jehova kĩgongona; nakĩo kĩgongona kĩu nĩkĩo kĩa mbere kĩrĩa aakĩire Jehova.
• 36. Nake Saulu akiuga atĩrĩ, Nĩtũikũrũkei tũrũmĩrĩre Afilisiti ũtukũ, tũmatahe indo ciao o nginya rũcinĩ gwathera, na tũtigatigie mũndũ o na ũmwe wao. Nao magĩkiuga atĩrĩ, Ĩka ũndũ o wothe ũrĩa ũkuona ũrĩ mwega. Nake mũthĩnjĩri-Ngai akiuga atĩrĩ, Nĩtwambei tũthengerere Ngai haha.
• 37. Saulu agĩkĩhoya kĩrĩra harĩ Ngai atĩrĩ, Njikũrũke nũmĩrĩre Afilisiti? Ningĩ-rĩ, nĩũkũmaneana moko-inĩ ma Isiraeli? No rĩrĩ, ndaigana kũmũcokeria ũhoro mũthenya ũcio.
• 38. Hĩndĩ ĩo Saulu agĩkiuga atĩrĩ, Ta kuhĩhĩriai haha, inyuĩ anene a andũ inyuothe, mũmenye na muone harĩa wĩhia ũyũ wa ũmũthĩ ũrĩ.
• 39. Nĩ gũkorũo o ta ũrĩa Jehova ũrĩa ũhonokagia Isiraeli atũũraga muoyo-rĩ, o na ũngĩtuĩka wĩ na Jonathani mũrũ wakwa, ti-itherũ ndarĩ hingo ategũkua. No rĩrĩ, hatirĩ mũndũ o na ũmwe thĩinĩ wa andũ acio othe wamũcokeirie ũndũ.
• 40. Agĩkĩĩra Aisiraeli othe atĩrĩ, Inyuĩ ta gĩai mwena ũmwe, na niĩ na mũrũ wakwa Jonathani tũgĩe mwena ũrĩa ũngĩ. Nao magĩkĩĩra Saulu atĩrĩ, Ĩka o ta ũrĩa ũkuona arĩ wega.
• 41. Tondũ ũcio Saulu agĩkĩĩra Jehova Ngai wa Isiraeli atĩrĩ, Onania harĩa kĩhooto kĩrĩ. Nao Jonathani na Saulu makĩoyũo mĩtĩ yacukwo, andũ arĩa angĩ makĩhonoka.
• 42. Ningĩ Saulu akiuga atĩrĩ, Ta tũcukĩrei mĩtĩ niĩ na Jonathani, mũrũ wakwa. Nake Jonathani agĩkĩoyũo.
• 43. Saulu agĩkĩĩra Jonathani atĩrĩ, Ta njĩra ũrĩa wĩkĩte. Nake Jonathani akĩmũhe ũhoro, akiuga atĩrĩ, Ti-itherũ nĩnjamire kaũũkĩ kanini na mũthia wa rũthanju rũakwa rũrĩa ngũnyitĩte na guoko; na rĩu anga no mũhaka ngĩkue.
• 44. Ningĩ Saulu akiuga atĩrĩ, Ngai aro’thũũra o na anjĩke ũũru makĩria, nĩ ũndũ ndũrĩ hingo ũtegũkua, Jonathani!
• 45. Nao andũ magĩkĩĩra Saulu atĩrĩ, Hĩ! Atĩ atĩa? Jonathani akue ekĩte ũndũ mũnene ũũ wa kũhonokia Isiraeli! Kũroaga gũtuĩka ũguo! O ta ũrĩa Jehova atũũraga muoyo-rĩ, hatirĩ rũcuĩrĩ o na rũmwe rũa mũtwe wake rũngĩgũa thĩ; nĩ gũkorũo ũndũ ũrĩa ekĩte ũmũthĩ awĩkĩte me na Ngai. Ũguo nĩguo andũ acio maakĩhonokirie Jonathani ndagakue.
• 46. Thutha ũcio Saulu agĩkĩambata agĩtiga kũrũmĩrĩra Afilisiti; nao Afilisiti magĩĩthiĩra kwao.
• 47. Na rĩrĩ, Saulu aarĩkia kwĩgwatĩra ũthamaki, athamakĩre Isiraeli-rĩ, nĩaahũranire na thũ ciake ciothe na ndwere ciothe. Agĩkĩhũrana na Amoabi, na ciana cia Amoni, na Aedomu, na athamaki a Zoba, na Afilisiti; na kũrĩa guothe erekagĩra, akĩhootana.
• 48. Nake agĩĩka maũndũ ma ũcamba, agĩkĩhũra Aamaleki, akĩhonokia Aisiraeli harĩ andũ arĩa maamatahaga indo ciao.
• 49. Na rĩrĩ, ariũ a Saulu nĩ Jonathani, na Ishivi, na Maliki-shua; namo marĩĩtwa ma airĩtu ake erĩ nĩ maya: ũrĩa mũkũrũ etagwo Merabu, na ũrĩa mũnyinyi agetwo Mikali.
• 50. Nake mũtumia wa Saulu etagwo Ahinoamu, mwarĩ wa Ahimaazu; na mũnene wa ita yake etagwo Ahineri wa Neri, ithe mũnyinyi wa Saulu.
• 51. Ningĩ Kishu nĩwe warĩ ithe wa Saulu; o nake Neri, ithe wa Abineri, aarĩ mũrũ wa Abieli.
• 52. Na rĩrĩ, matukũ mothe ma Saulu nĩkwonekaga mbaara njũru cia kũhũranwo na Afilisiti; nake Saulu, o hĩndĩ ĩrĩa ona mũndũ o na ũrĩkũ wĩ hinya, kana njamba, akamuoya agathiĩ nake.

Home