Go Back

1 Samueli Chapter 12

• 1. Nake Samueli agĩkĩĩra Aisiraeli othe ũũ: Atĩrĩrĩ, nĩnjiguĩte uuge wanyu maũndũ-inĩ mothe marĩa mwanjĩrire, na ngamũhe mũthamaki amũthamakagĩre.
• 2. Na rĩu ta onei, mũthamaki wanyu nĩwe ũcio wathiĩ mbere yanyu; niĩ rĩu ndĩ gũkũra, ndagĩa mbuĩ; na atĩrĩrĩ, ariũ akwa me hamwe na inyuĩ, na niĩ ndũire ’thiaga mbere yanyu kuuma ndĩ o mũnyinyi gwata ũmũthĩ.
• 3. Niĩ ũyũ haha; ta umbũrĩrai o gũkũ tũrĩ, mbere ya Jehova, o na mbere ya mũndũ ũyũ wake ũitĩrĩirio maguta, ũrĩa ndaneka. Nĩ ng’ombe ya ũ ndĩ ndathiĩ nayo? Kana nĩ ndigiri ya ũ ndĩ ndathiĩ nayo? Kana nĩ mũndũ ũrĩkũ ndĩ ndatunya kĩndũ gĩake na wara? Kana nĩ mũndũ ũrĩkũ ndanahinyĩrĩria? Kana nĩ mũndũ ũrĩkũ ndĩ ndaamũkĩra ihaki rĩake, ngiuna maitho nĩ ũndũ warĩo? Ta njĩrai, na nĩngũmũcokeria.
• 4. Nao magĩkiuga atĩrĩ, Wee ndũrĩ watũtunya indo ciitũ na wara, kana ũgĩtũhinyĩrĩria, kana ũkĩoya kĩndũ kĩa mũndũ o na ũmwe.
• 5. Ningĩ akĩmera atĩrĩ, Jehova nĩwe mũira ũhoro-inĩ wanyu, o nake mũndũ ũyũ wake ũitĩrĩirio maguta nĩ mũira ũmũthĩ, atĩ mũtirĩ mwona kĩndũ o na kĩmwe gĩĩ guoko-inĩ gwakwa. Nao magĩkiuga atĩrĩ, Ĩĩ, nĩwe mũira.
• 6. Ningĩ Samueli agĩkĩĩra andũ acio atĩrĩ, Jehova nĩwe watuire Musa na Haruni anene anyu, na nĩwe waambatirie maithe manyu, akĩmaruta bũrũri wa Misiri.
• 7. Na tondũ ũcio ta rũgamai o ro ũguo rĩu nĩ getha tũcire, ndĩmũheere ũhoro o haha mbere ya Jehova, wa maũndũ mothe ma ũthingu ma Jehova marĩa aanamwĩka inyuene, o na maithe manyu.
• 8. Atĩrĩrĩ, hĩndĩ ĩrĩa Jakubu aathiire Misiri, namo maithe manyu magĩkaĩra Jehova-rĩ, Jehova nĩaarekirie Musa na Haruni, magĩkĩruta maithe manyu kũu Misiri, na magĩtũma matũũre kũndũ gũkũ.
• 9. No nĩmaariganĩirũo nĩ Jehova Ngai wao, nake agĩkĩmendia moko-inĩ ma Sisera, mũnene wa ita ya Hazoru, na moko-inĩ ma Afilisiti, na moko-inĩ ma mũthamaki wa Moabi, magĩkĩhũrana nao.
• 10. Ningĩ magĩkaĩra Jehova, makiuga atĩrĩ, Nĩtwĩhĩtie, nĩ ũndũ nĩtũtiganĩte na Jehova, tũgatungatĩra Mabaali na Maashitarothu; no rĩrĩ, rĩu tũhonokie harĩ thũ ciitũ, na nĩtũrĩgũtungatagĩra.
• 11. Nake Jehova agĩkĩrekia Jerub-baali, na Bedani, na Jefitha, na Samueli, magĩkĩmũhonokia makĩmũruta moko-inĩ ma thũ cianyu na ndwere ciothe, mũgĩgĩikara mũtarĩ na ũgwati.
• 12. Na rĩrĩa mwonire atĩ Nahashu, mũthamaki wa ciana cia Amoni, nĩokĩte kũmũũkĩrĩra, mũkĩnjĩra atĩrĩ, Aca, no rĩrĩ, gũtirĩ hingo tũtekũgĩa na mũthamaki atũthamakagĩre; na nĩ Jehova Ngai wanyu warĩ mũthamaki wanyu.
• 13. Na rĩrĩ, rĩu ta kĩonei mũthamaki ũrĩa mũthurĩte, na ũrĩa mwĩtĩtie, atĩ nĩwe ũyũ; atĩrĩrĩ, Jehova nĩaakĩmũhe mũthamaki, amũthamakagĩre.
• 14. Mũngĩkorũo nĩmũrĩĩtigagĩra Jehova, na mũmũtungatagĩre, na mũiguage uuge wake, na mũtikanareme mũrege kũigua maathani ma Jehova, na inyuĩ inyuene, o na mũthamaki ũrĩa ũmũthamakagĩra, mũrũmagĩrĩre Jehova Ngai wanyu-rĩ, nĩgũkwagĩra;
• 15. no rĩrĩ, mwaaga kũigua uuge wa Jehova, no mũrege kũigua maathani ma Jehova, guoko kwa Jehova nĩgũkũmũũkĩrĩra o ta ũrĩa gwokĩrĩire maithe manyu.
• 16. Tondũ ũcio, rĩu ta rũgamai mwĩhandĩte o ro ũguo, muone ũndũ ũyũ mũnene Jehova egwĩka haha mũkĩĩonagĩra na maitho manyu.
• 17. Githĩ rĩu ti ihinda rĩa magetha ma ngano? Nĩngũkaĩra Jehova arehithie marurumĩ na mbura; na nĩmũkũmenya, na muone, atĩ waganu nĩ mũnene ũrĩa mwĩkĩte mũkĩonagwo nĩ Jehova, nĩ ũndũ wa kwĩĩtĩria mũthamaki.
• 18. Nake Samueli agĩgĩkaĩra Jehova, nake akĩrehithie marurumĩ na mbura mũthenya ũcio; nao andũ othe magĩĩtigĩra Jehova mũno, o na Samueli.
• 19. Nao andũ acio othe makĩĩra Samueli atĩrĩ, Hoya Jehova Ngai waku nĩ ũndũ witũ, ithuĩ ndungata ciaku, nĩguo tũtigakue nĩ ũndũ mehia maitũ mothe nĩtũmongereire ũũru ũyũ ũngĩ wa kwĩĩtĩria mũthamaki.
• 20. Nake Samueli akĩĩra andũ acio atĩrĩ, Tigai gwĩtigĩra; ti-itherũ nĩmwĩkĩte ũũru ũcio wothe, no rĩu menyai mũcoke kũgarũrũka mũtige kũrũmĩrĩra Jehova, no tungatĩrai Jehova na ngoro yanyu yothe;
• 21. na mũtikagarũrũke na mwena ũngĩ, nĩ gũkorũo mũngĩĩka ũguo, mwarũmĩrĩra maũndũ ma tũhũ, marĩa matangĩguna mũndũ, kana mamũhonokie, nĩ ũndũ nĩ ma tũhũ.
• 22. Nĩ gũkorũo Jehova ndangĩtiga andũ ake, nĩ ũndũ wa ũrĩa rĩĩtwa rĩake rĩnenehete; nĩ gũkorũo Jehova nĩonire arĩ wega kũmũtua inyuĩ andũ ake kĩũmbe.
• 23. O na ningĩ atĩrĩ, ha ũhoro wakwa niĩ mwene-rĩ, ndĩroaga gũkanehia Jehova ngĩtiga kũmũhoera; no nĩngũmũruta gũthiaga na njĩra njega, o ĩrĩa yerekereire.
• 24. Gĩtai o gwĩtigĩra Jehova, na mũmũtungatagĩre na ma o ma na ngoro yanyu yothe; nĩ ũndũ-rĩ, ta wĩciriei ũrĩa maũndũ manenehete marĩa aanamwĩka.
• 25. No rĩrĩ, mũngĩrũmanĩria o gwĩka maũndũ ma waganu-rĩ, nĩ kũninwo mũkaninwo biũ inyuene, na mũthamaki wanyu.

Home