Go Back

1 Samueli Chapter 11

• 1. Na rĩrĩ, Nahashu, Mũamoni, akĩambata, akĩamba hema ciake ahũrane na itũũra rĩa Jabeshi-gileadi; nao andũ othe a Jabeshi magĩkĩĩra Nahashu atĩrĩ, Ta gĩa kĩrĩkanĩro na ithuĩ, na nĩtũrĩgũtungatagĩra.
• 2. Nake Nahashu, ũcio Mũamoni, akĩmera atĩrĩ, Ũndũ ũyũ wiki noguo ũngĩtũma ndĩkanĩre na inyuĩ, atĩ mũkũũrũo maitho manyu mothe ma ũrĩo; na ũndũ ũcio ndĩũtue wa kũmenithia Aisiraeli othe.
• 3. Nao athuri acio a Jabeshi magĩkĩmwĩra atĩrĩ, Tũhe mĩthenya mũgwanja wambe ũkirĩrĩrie, tũrekie andũ mĩhaka-inĩ yothe ya bũrũri wa Isiraeli; na twaaga wa gũtũhonokia, tũgakiumagara tũũke kũrĩ wee.
• 4. Nao andũ acio maareketio magĩgĩthiĩ magĩkinya Gibea, itũũra rĩa Saulu, makĩhe andũ ũhoro ũcio; nao andũ othe makĩanĩrĩra, makĩrĩra.
• 5. Na atĩrĩrĩ, Saulu agĩgĩũka oimĩte na mũgũnda arũmĩrĩire ndegwa cia kũrĩma; akĩũria atĩrĩ, Kaĩ andũ aya monete atĩa tondũ marakĩrĩra ũũ? Nao magĩkĩmũhe ũhoro wa andũ a Jabeahi.
• 6. Na rĩrĩ, roho wa Ngai ũgĩkora Saulu na hinya mũno aaigua ndeto icio, agĩcinwo nĩ marakara mũno mũno.
• 7. Agĩkĩnyita ndegwa cia icoki rĩmwe agĩcitinangia icunjĩ, agĩcitwarithia na andũ mĩhaka-inĩ yothe ya bũrũri wa Isiraeli, akiuga atĩrĩ, Mũndũ o wothe ũrĩa ũtariumagara arũmĩrĩre Saulu na Samueli, ũguo noguo ndegwa ciake igwĩkwo. Nao andũ makĩgwatwo nĩ guoya uumĩte he Jehova, magĩkiumagara ta marĩ o mũndũ ũmwe.
• 8. Nake Saulu akĩmatarĩra Bezeki; nacio ciana cia Isiraeli ikĩonwo irĩ ngiri magana matatũ; na andũ a Juda ngiri mĩrongo ĩtatũ.
• 9. Nao magĩkĩĩra andũ acio maareketio kũrĩ o atĩrĩ, Ĩrai andũ a Jabeshi-gileadi ũũ: Rũciũ rĩrĩa riũa rĩgakorũo rĩhiũhĩte-rĩ, nĩguo mũkahonokio. Nao arekio acio magĩgĩthiĩ, makĩhe andũ a Jabeshi ũhoro ũcio, nao magĩgĩkena.
• 10. Tondũ ũcio andũ acio a Jabeshi magĩkiuga atĩrĩ, Rũciũ nĩtũkũroka kuumagara tũũke kũrĩ inyuĩ, mũtwĩke o ta ũrĩa mũkona kwagĩrĩire.
• 11. Na gũgĩtuĩka atĩrĩ, atĩ Saulu akĩroka kũnuna ita agayanĩtie andũ ikundi ithatũ; nao magĩgĩthiĩ, magĩkinya kĩraaro-inĩ kĩa Aamoni thĩinĩ, hĩndĩ ya ituanĩra rĩa arangĩri ao rĩa rũcinĩ, makĩmahũra o nginya hĩndĩ ĩrĩa riũa rĩakorirũo rĩhiũhĩte; na gũgĩkinya atĩrĩ, atĩ andũ arĩa maatigarire makĩharaganio o nginya hakĩaga andũ erĩ ao me hamwe.
• 12. Nao andũ magĩkĩĩra Samueli atĩrĩ, Ũrĩa woigire atĩ, Anga Saulu nĩwe ũgũgĩtũthamakĩra-rĩ, nũ na ũ? Ta rehei andũ acio tũmorage.
• 13. Nowe Saulu akiuga atĩrĩ, Hatirĩ mũndũ ũngĩũragwo ũmũthĩ; nĩ gũkorũo ũmũthĩ Jehova nĩekĩte ũndũ, akahonokania thĩinĩ wa Isiraeli.
• 14. Hĩndĩ ĩo Samueli agĩkĩĩra andũ atĩrĩ, Ũkĩrai tũthiĩ Giligali, tũkerũhĩrie ũthamaki kuo.
• 15. Nao andũ othe magĩgĩthiĩ Giligali, magĩtuĩra Saulu mũthamaki kũu Giligali mbere ya Jehova, na makĩrutĩra magongona ma ũiguano kuo o mbere ya Jehova; nake Saulu, o na andũ othe a Isiraeli, magĩgĩkena mũno mũno marĩ kuo.

Home