Go Back

Atiirĩrĩri Bũrũri Chapter 7

1. Thutha wa ũguo Jerub-baali, nake nĩwe Gideoni, o na andũ othe arĩa maarĩ hamwe nake, makĩroka gũũkĩra rũcinĩ tene, magĩkĩamba hema ciao gĩthima-inĩ kĩa Harodi; nakĩo kĩraaro kĩa Amidiani kĩarĩ mwena wao wa gathigathini kĩrĩma-inĩ kĩa More o kũu gĩtuamba-inĩ.
2. Nake Jehova agĩkĩĩra Gideoni atĩrĩ, Andũ aya wĩ nao nĩ aingĩ mũno magakĩra arĩa ngwenda, nĩguo ndekererie Amidiani ndĩmaneane moko-inĩ mao, nĩ getha Aisiraeli matigetĩe ma’mene, moige atĩrĩ, Moko maitũ ithuene nĩmo matũhonoketie.
3. Tondũ ũcio thiĩ ũheane ũhoro ũiguwo nĩ andũ othe, ũmere atĩrĩ, Mũndũ o wothe ũrĩa ũkũigua ta ekũinaina nĩ guoya nĩahũndũke, oime gũkũ kĩrĩma-inĩ kĩa Gileadi. Gũgĩkĩhũndũka andũ ngiri mĩrongo ĩĩrĩ na igĩrĩ; magĩtigara ngiri ikũmi.
4. Ningĩ Jehova agĩkĩĩra Gideoni atĩrĩ, O na rĩu andũ no aingĩ mũno; maikũrũkie maĩ-inĩ, nĩ getha ngagũthurĩre andũ mwĩ ho; na gũgatuĩka atĩrĩ, atĩ mũndũ ũrĩa ndĩrĩkũhe ũhoro wake, ngwĩre ũũ: Ũyũ nĩwe ũgũthiĩ nawe, ũcio nowe ũrĩthiĩ nawe; na ũrĩa wothe ndĩrĩkũhe ũhoro wake ngwĩre ũũ: Ũyũ ndegũthiĩ nawe, ũcio ndethiĩ nawe.
5. Agĩgĩikũrũkia andũ acio maĩ-inĩ; nake Jehova agĩkĩĩra Gideoni atĩrĩ, Ũrĩa wothe ũrĩnyua maĩ na rũrĩmĩ ta ũrĩa ngui ĩnyuaga-rĩ, ũcio ũmũige mwanya; o nake ũrĩa wothe ũrĩinamĩrĩra anyue maĩ aturĩtie ndu, ũmũige mwanya.
6. Nao andũ arĩa maanyuire maĩ na rũrĩmĩ mamatwarĩte kanua na hĩ, maarĩ magana matatũ; no andũ acio angĩ othe nĩmaainamĩrĩire magĩturia ndu makĩnyua maĩ.
7. Jehova agĩkĩĩra Gideoni atĩrĩ, Ngũmũhonokia na ũndũ wa andũ acio magana matatũ manyuire maĩ na rũrĩmĩ, na nĩngũrekereria Amidiani ndĩmaneane moko-inĩ manyu; reka andũ aya angĩ othe o mũndũ ainũke kwao.
8. Andũ acio magĩkĩoya irio cia rĩĩgu na moko mao, o na macoro mao, nake Gideoni agĩkĩĩra andũ acio othe a Isiraeli o mũndũ ainũke hema-inĩ yake; no andũ acio magana matatũ akĩmera maikare nake; nakĩo kĩraaro kĩa Amidiani gĩgĩkorũo kĩrĩ o kũu gĩtuamba-inĩ mũhuro wa hau aarĩ.
9. Na gũgĩkinya atĩrĩ, atĩ ũtukũ o ro ũcio, Jehova akĩmwĩra atĩrĩ, Arahũka ũikũrũke ũtharĩke kĩraaro kĩu kĩa Amidiani; nĩ gũkorũo nĩndĩkĩrekereirie ngakĩneana moko-inĩ maku.
10. No rĩrĩ, ũngĩkorũo nĩũgwĩtigĩra gũikũrũka-rĩ, thiĩi na Pura ndungata yaku, mũikũrũke mũkinye kĩraaro-inĩ kĩu kĩa Amidiani,
11. na nĩũkũigua ũrĩa andũ arĩa me kuo mekuuga; na thutha wa ũguo nĩũkũũmĩrĩrio ũgĩe na hinya wa gũikũrũka ũgatharĩke kĩraaro kĩu. Agĩgĩikũrũka marĩ na Pura, ndungata yake, magĩgĩkinya o harĩa andũ a kĩraaro kĩu arĩa meohete indo ciao cia mbaara maakinyĩte.
12. Nao Amidiani, na Aamaleki, o na ciana ciothe cia mwena wa irathĩro, acio othe magĩkorũo maarahĩte hau gĩtuamba-inĩ kĩu o ta ngigĩ nĩ ũndũ wa ũrĩa maingĩhĩte; nacio ngamĩra ciao itiatarĩkaga nĩ ũndũ ciatariĩ o ta mũthanga ũrĩa ũrĩ hũgũrũrũ-inĩ cia iria nĩ ũndũ wa ũrĩa ciingĩhĩte.
13. Na rĩrĩ, hĩndĩ ĩrĩa Gideoni aakinyire ho-rĩ, hagĩkorũo he mũndũ waheaga ũrĩa ũngĩ kĩroto kĩrĩa aarotete, akiuga ũũ: Atĩrĩrĩ, ndotete kĩroto, ngona kamũgate kanini ga cairi kagũĩte kĩraaro-inĩ gĩkĩ kĩa Amidiani, nako gagatonya hema-inĩ ĩmwe, gakamĩgũtha ĩkagũa, gakamĩng’aũrania na mũnduru, nayo ĩgaikara o ro ũguo thĩ.
14. Nake mũndũ ũcio ũngĩ akĩmũcokeria, akĩmwĩra atĩrĩ, Hĩ, ti-itherũ hau hatirĩ ũndũ ũngĩ tiga o rũhiũ rũa njora rũa Gideoni wa Joashu, mũndũ wa Isiraeli, nĩ Ngai ũrekereirie Amidiani na mbũtũ yao yothe ya ita akamĩneana moko-inĩ make.
15. Na gũgĩkinya atĩrĩ, atĩ hĩndĩ ĩrĩa Gideoni aaiguire kĩroto kĩu o na ũtaũri wakĩo, akĩinamĩrĩra akĩhoya Ngai; agĩkĩhũndũka o kĩraaro-inĩ gĩa Isiraeli, akiuga atĩrĩ, Ũkĩrai, amu Jehova nĩarekereirie mbũtũ ya ita ya Midiani akamĩneana moko-inĩ manyu.
16. Nao andũ acio magana matatũ akĩmagayũkania ikundi ithatũ, akĩmanengera othe o mũndũ coro anyite na guoko, o na nyũngũ theri ĩĩkĩrĩtwo gĩcinga thĩinĩ.
17. Agĩkĩmera atĩrĩ, Nĩmũkanjũthĩrĩria mwĩke o ta ũrĩa ndĩrĩĩka; na atĩrĩrĩ, hĩndĩ ĩrĩa ndĩrĩkinya o mũthia-inĩ kũna wa kĩraaro-rĩ, nĩgũgatuĩka atĩrĩ, atĩ o ta ũrĩa mũrĩona ngĩĩka, o na inyuĩ mwĩke o taguo.
18. Hĩndĩ ĩrĩa ndĩrĩhuha coro wakwa niĩ mwene o hamwe na arĩa othe twĩ nao, o na inyuĩ huhai macoro manyu na mĩena yothe ya kĩraaro kĩa Amidiani, muuge atĩrĩ, Nĩ ũndũ wa Jehova, o na wa Gideoni.
19. Tondũ ũcio Gideoni, o na andũ igana arĩa maarĩ hamwe nake, magĩgĩkinya o mũthia-inĩ kũna wa kĩraaro kĩa Amidiani ihinda rĩrĩa andũ a ituanĩra rĩa ũtukũ gatagatĩ maambĩrĩirie kũranga, narĩo nĩ ihinda rĩrĩa maakorirũo o maarĩkia kũgarũranĩra; nao aa Gideoni magĩkĩhuha macoro, na makĩũraganga nyũngũ iria ciarĩ moko mao.
20. Andũ a ikundi icio ithatũ magĩkĩhuha macoro, na makĩũraganga nyũngũ ciao, magĩkĩrũgama manyitĩte icinga ciao na moko mao ma ũmotho, na macoro me moko mao ma ũrĩo, nĩguo mamahuhage mamanyitĩte; magĩkĩanĩrĩra makiuga atĩrĩ, Nĩ rũhiũ rũa Jehova, o na rũa Gideoni.
21. Nao magĩkĩrũgama o mũndũ handũ hake mathiũrũrũkĩirie kĩraaro kĩu na ndwere ciothe, nayo mbũtũ yothe ya ita ya Amidiani ĩgĩkĩũra; nao aa Gideoni makĩanĩrĩra mũno, makĩmĩingata.
22. Macoro macio magana matatũ maahuhwo-rĩ, Jehova agĩtũma andũ othe a mbũtũ ĩo matemengane o mũndũ na mũndũ ũrĩa ũngĩ, nayo mbũtũ ĩo yothe ĩkĩũra, ĩgĩkinya o Bethi-shita ĩrorete Zerera, ĩgĩgĩkinya o mũhaka-inĩ wa Abeli-mehola, gũkuhĩ na Tabathu.
23. Nao andũ a Isiraeli magĩkĩũngana moimĩte Nafitali, na Asheri, o na Manase guothe, magĩkĩrũmĩrĩra Amidiani na ihenya.
24. Nake Gideoni akĩrekania bũrũri wothe ũrĩa wĩ irĩma nyingĩ wa Efiraimu, akiuga atĩrĩ, Ikũrũkai mũhũrane na Midiani, mũnyite mariũko ma maĩ matanaringa mũrĩmo, o nginya Bethi-bara, o kũu Jorodani. Tondũ ũcio andũ othe a Efiraimu makĩũngana makĩnyita mariũko macio o nginya Bethi-bara, o kũu Jorodani.
25. Nao magĩkĩnyita anene erĩ a Midiani, nao nĩo Orebu na Zeebu; nake Orebu makĩmũũragĩra ihiga-inĩ rĩa Orebu, o nake Zeebu makĩmũũragĩra kĩhihĩro-inĩ kĩa ndibei gĩa Zeebu; nao magĩkĩrũmĩrĩra Amidiani na ihenya; nacio ciongo cia Orebu na Zeebu magĩcitwarĩra Gideoni e mũrĩmo ũcio ũngĩ wa Jorodani.

Home