Go Back

Atiirĩrĩri Bũrũri Chapter 4

• 1. Ningĩ ciana cia Isiraeli igĩcoka gwĩka maũndũ marĩa monagwo marĩ moru nĩ Jehova, Ehudu aarĩkia gũkua.
• 2. Nake Jehova agĩciendia harĩ Jabini, mũthamaki wa Kanaani, ũrĩa wathamakaga Hazoru; nake mũnene wa mbũtũ yake ya ita etagwo Sisera, na aatũũraga Haroshethu-kwa-Ndũrĩrĩ.
• 3. Nacio ciana cia Isiraeli igĩkaĩra Jehova; nĩ ũndũ Jabini aarĩ na ngari cia ita cia igera magana kenda; nake nĩaahinyĩrĩirie ciana cia Isiraeli mũno mĩaka mĩrongo ĩĩrĩ.
• 4. Na rĩrĩ, Debora ũrĩa warĩ mũnabii mũndũ-wa-nja, mũka wa Lapidothu, nĩwe watiiragĩrĩra Isiraeli matukũ macio.
• 5. Nake aaikaraga gĩtina-inĩ kĩa mũkĩndũ wa Debora ũrĩa warĩ gatagatĩ ka Rama na Beth-eli, o kũu bũrũri ũcio wĩ irĩma nyingĩ wa Efiraimu; nacio ciana cia Isiraeli igathiaga harĩ we gũtuithanio cira.
• 6. Nake agĩkĩrekania agĩĩta Baraka wa Abinoamu, oime Kedeshi-Nafitali, akĩmwĩra atĩrĩ, Githĩ Jehova, Ngai wa Isiraeli, ndaathanĩte agakwĩra ũũ: Atĩrĩrĩ, thiĩ ũrorete kĩrĩma gĩa Taboru, na woe andũ ngiri ikũmi a ciana cia Nafitali na cia Zebuluni mũthiĩ nao?
• 7. Niĩ na niĩ nĩngũgucĩrĩria Sisera, mũnene wa athigari a Jabini, oke harĩ we o hau rũũĩ-inĩ rũa Kishoni e hamwe na ngari ciake cia ita o na kĩrĩndĩ kĩa andũ ake; na nĩngũmũrekereria ndĩmũneane moko-inĩ maku.
• 8. Nake Baraka agĩkĩĩra Debora atĩrĩ, Wee wakorũo nĩũgũtwarana na niĩ-rĩ, o na niĩ nĩngũthii; no rĩrĩ, ũngĩkorũo ndũtwarana na niĩ, o na niĩ ndithiĩ.
• 9. Nake agĩgĩcokia atĩrĩ, Ndirĩ hingo itegũtwarana nawe; no rĩrĩ, menya atĩ rũgendo rũu ũgũthiĩ, tiwe ũkũgĩa na gĩtĩo nĩ ũndũ waruo; nĩ gũkorũo Jehova nĩ kũrekereria ekũrekereria Sisera amũneane moko-inĩ ma mũndũ-wa-nja. Nake Debora agĩgĩũkĩra, magĩthiĩ na Baraka Kedeshi.
• 10. Baraka agĩgĩĩta andũ a Zebuluni na a Nafitali mongane o kũu Kedeshi; na rĩrĩ, hagĩkĩambatania nake andũ ngiri ikũmi, magĩthiĩ nake mamũrũmĩrĩire; o nake Debora makĩambatania nake.
• 11. Na rĩrĩ, Heberi ũrĩa Mũkeni nĩeyamũrĩte agatigana na Akeni arĩa angĩ, nao nĩo ciana cia Hobabu, mũthoniwe wa Musa, nake aambĩte hema yake o kũu mũgandi-inĩ wa Zaananimu, hakuhĩ na Kedeshi.
• 12. Nao andũ makĩhe Sisera ũhoro makĩmwĩra atĩ Baraka wa Abinoamu nĩ mwambatu agakinya kĩrĩma-inĩ gĩa Taboru.
• 13. Nake Sisera agĩkĩũnganithia ngari ciake ciothe cia ita, o ngari icio magana kenda cia igera, o na andũ othe arĩa maarĩ hamwe nake, moime Haroshethu-kwa-Ndũrĩrĩ, makinye rũũĩ-inĩ rũa Kishoni.
• 14. Nake Debora agĩkĩĩra Baraka atĩrĩ, Ũkĩra, nĩ ũndũ ũmũthĩ nĩguo mũthenya ũrĩa Jehova arekereirie Sisera akamũneana moko-inĩ maku. Githĩ Jehova ndoimagarĩte agũtongorie? Tondũ ũcio Baraka agĩgĩikũrũka oimĩte kĩrĩma gĩa Taboru, arũmĩrĩirũo nĩ andũ acio ngiri ikũmi.
• 15. Nake Jehova akĩnyaririthia Sisera na ngari ciake ciothe cia ita, o na mbũtũ yake yothe ya ita, amĩhũrithie na hiũ cia njora harĩ Baraka; nake Sisera agĩkiuma ngari-inĩ yake akĩũra na magũrũ.
• 16. No rĩrĩ, Baraka akĩrũmĩrĩra ngari ciake cia ita na ihenya, o na mbũtũ yake ya ita, akĩmĩkinyia Haroshethu-kwa-Ndũrĩrĩ; nayo mbũtũ ĩo yothe ya Sisera ĩkĩũragwo, ĩkĩninwo biũ na hiũ cia njora, na gũtirĩ mũndũ o na ũmwe watigarire.
• 17. No rĩrĩ, Sisera akĩĩyũrĩra na magũrũ, agĩkinya hema-inĩ ya Jaeli, mũka wa Heberi ũcio Mũkeni; nĩ gũkorũo Jabini mũthamaki wa Hazoru, nĩmaarĩte ũhoro wa thayũ na nyũmba ya Heberi ũcio Mũkeni.
• 18. Nake Jaeli akiumagara agatũnge Sisera, agĩkĩmwĩra atĩrĩ, Kerũra ũtonye hema-inĩ yakwa, wee mwathi wakwa; kerũra ũtonye kuo, na ndũgetigĩre. Nake agĩgĩkerũra agĩtonya harĩ we kũu hema thĩinĩ, nake agĩkĩmũhumbĩra na mũrengeti.
• 19. Ningĩ akĩmwĩra atĩrĩ, Ta ’he tũĩ ’nyue, amu ndĩ mũnyotu. Agĩgĩkunũra mbũthũ ya iria, akĩmũhe anyue, agĩcoka akĩmũhumbĩra.
• 20. Ningĩ Sisera agĩkĩmwĩra atĩrĩ, Rũgama mũromo-inĩ wa hema ĩno, na gũgatuĩka atĩrĩ, atĩ mũndũ o na ũrĩkũ angĩũka harĩ wee, akũhoe ũhoro, akũũrie atĩrĩ, Nĩkũrĩ mũndũ gũkũ, ũmũcokerie ũmwĩre atĩrĩ, Aca, gũtirĩ.
• 21. Hĩndĩ ĩo Jaeli, mũka ũcio wa Heberi, agĩkĩoya higĩ ya hema, agĩcoka akĩoya nyondo na guoko, agĩthiĩ kahora mũno harĩ we, akĩmũgũthĩra higĩ ĩo thikĩrĩrio, nayo ĩgĩtonyerera igĩtheca thĩ; nĩ gũkorũo nĩaakomete toro mũnene mũno, nake agĩgĩtuĩkana, agĩkua.
• 22. Na atĩrĩrĩ, hĩndĩ ĩrĩa Baraka aarũmĩrĩire Sisera na ihenya, Jaeli akiumagara akamũtũnge, agĩkĩmwĩra atĩrĩ, Ta ũka, na nĩngũkuonia mũndũ ũrĩa ũgũcaria. Agĩgĩthiĩ harĩ we, na atĩrĩrĩ, Sisera agĩkorũo akomete thĩ arĩ mũkuũ, nayo higĩ ĩo igĩkorũo ĩrĩ thikĩrĩrio-inĩ yake.
• 23. Ũguo nĩguo Ngai aakĩhootithirie Jabini, mũthamaki wa Kanaani, akĩmwehereria ciana cia Isiraeli.
• 24. Nacio ciana cia Isiraeli igĩkĩrĩrĩria gũtoria Jabini, mũthamaki wa Kanaani, o nginya hĩndĩ ĩrĩa ciakĩmũninire o kũmũnina biũ.

Home