Go Back

Atiirĩrĩri Bũrũri Chapter 2

• 1. Na rĩrĩ, mũraika wa Jehova agĩkĩambata agĩkinya Bokimu oimĩte Giligali. Akiuga atĩrĩ, Niĩ nĩ niĩ ndamwambatirie ngĩmũruta bũrũri wa Misiri, ngĩmũrehe gũkũ bũrũri ũrĩa nderĩire maithe manyu na mwĩhĩtwa atĩ nĩngamahe; o na ngiuga atĩ kĩrĩkanĩro kĩu giitũ na inyuĩ ndigagĩthũkia o na rĩ,
• 2. na atĩ mũtikanarĩkanĩre na andũ aya matũũraga bũrũri ũyũ o na atĩa, no nimũkoinanga igongona ciao; no rĩrĩ, mũtiigana kũigua uuge wakwa; mwagĩĩkire ũguo nĩ ũndũ kĩ?
• 3. Tondũ ũcio niĩ o na niĩ ngĩkiuga atĩrĩ, Ndikamaingata mamweherere; no megũtuĩka ta marĩ mĩigua ya kũmũtheca mĩena, o nacio ngai ciao ituĩke ta irĩ ũndũ wa kũmũhenereria mwagane.
• 4. Na gũgĩkinya atĩrĩ, atĩ hĩndĩ ĩrĩa mũraika ũcio wa Jehova aaheire ciana cia Isiraeli ciothe ũhoro ũcio, andũ othe makĩanĩrĩra, makĩrĩra,
• 5. narĩo rĩĩtwa rĩa handũ hau makĩrĩĩta Bokimu; nao magĩkĩrutĩra Jehova igongona o ro hau.
• 6. Na rĩrĩ, Joshua aarĩkia kwĩra andũ mathiĩ-rĩ, ciana cia Isiraeli ciothe mũndũ o mũndũ agĩthiĩ kũndũ gwake kũrĩa aagaĩte.
• 7. Nao andũ acio magĩtungatĩra Jehova matukũ mothe marĩa Joshua aarĩ muoyo, o na matukũ mothe ma athuri arĩa maatigirũo magĩtũũranga muoyo Joshua aarĩkia gũkua, o arĩa monete wĩra ũrĩa wothe mũnene Jehova aarutĩte nĩ ũndũ wa Isiraeli.
• 8. Nake Joshua wa Nuni, ndungata ya Jehova, agĩkua aninĩte mĩaka igana na ikũmi.
• 9. Nao makĩmũthika gĩthaka-inĩ gĩake o kũu Timinathu-heresi bũrũri ũrĩa wĩ irĩma nyingĩ wa Efiraimu, mwena wa gathigathini wa kĩrĩma kĩa Gaashu.
• 10. Thutha wa ũguo andũ othe a rũciaro rũu o nao magĩturanĩrũo na andũ ao arĩa maanakua; gũgĩgĩcoka gũkĩgĩa rũciaro rũngĩ thutha wao, rũrĩa rũtaamenyete Jehova, kana rũkamenya wĩra ũrĩa aarutĩte nĩ ũndũ wa Isiraeli.
• 11. Nacio ciana cia Isiraeli igĩgĩĩka maũndũ marĩa monagwo marĩ moru nĩ Jehova, igĩgĩtungatĩra Mabaali;
• 12. nacio igĩgĩtigana na Jehova, Ngai wa maithe ma cio, ũrĩa wacirutire bũrũri wa Misiri, ikĩrũmĩrĩra ngai ingĩ, nacio nĩ ngai imwe cia andũ arĩa maacirigicĩirie, igakĩĩgũithagia thĩ iciinamĩrĩre, igĩgĩthirĩkia Jehova nĩguo arakare.
• 13. Igĩgĩtigana na Jehova, igĩtungatĩra Baali na Maashitarothu.
• 14. Nake Jehova agĩcinwo nĩ marakara nĩ ũndũ wa Aisiraeli, agĩkĩmarekereria akĩmaneana moko-inĩ ma atahani nĩ getha mamatahe indo ciao, na akĩmenderia thũ ciao iria ciamarigicĩirie, o nginya makĩremwo nĩ gũcoka gwĩtiiria thũ ciao ciothe o na hanini.
• 15. Na rĩrĩ, kũndũ kũrĩa guothe maathiaga-rĩ, guoko kwa Jehova gũkamokagĩrĩra kũmeke ũũru, o ta ũrĩa oigĩte, akamera na mwĩhĩtwa atĩ noguo ageka, nao magĩkĩnyarirĩka mũno.
• 16. Hĩndĩ ĩo Jehova agĩkĩmaarahũrĩra atiirĩrĩri-bũrũri a kũmahonokia, makĩmaruta moko-inĩ ma arĩa maamatahaga indo ciao.
• 17. No rĩrĩ, o na gwatuĩka nĩ ũguo-rĩ, matiigana kũigua atiirĩrĩri-bũrũri acio ao, nĩ ũndũ nĩmeriragĩria kũrũmĩrĩra ngai ingĩ, na makegũithagia thĩ, maciinamĩrĩre; magĩkĩgarũrũka o narua, magĩtiga gũthiĩ na mĩthiĩre ĩrĩa maithe mao maathiaga nayo ya kũigua maathani ma Jehova; acio matiigana gwĩka ũguo.
• 18. Na rĩrĩ, hĩndĩ ĩrĩa Jehova aamaarahũrĩra atiirĩrĩri-bũrũri-rĩ, agaikara hamwe na mũtiirĩrĩri-bũrũri, nake agakĩmahonokia akamaruta moko-inĩ ma thũ ciao matukũ mothe marĩa mũtiirĩrĩri ũcio wa bũrũri egũkorũo ho; nĩ gũkorũo Jehova nĩaamacakayagĩra nĩ ũndũ wa mũcayo wao ũkoniĩ arĩa maamahinyagĩrĩria na makamanyarira.
• 19. No nĩgwakinyaga atĩrĩ, atĩ hĩndĩ ĩrĩa mũtiirĩrĩri-bũrũri ũrĩa wamatongoragia aakua, magacoka na thutha, magakĩrĩrĩria gwĩka maũndũ mathũku gũkĩra maithe mao ũhoro-inĩ wa kũrũmĩrĩra ngai ingĩ, magĩcitungatĩra o na magĩciinamĩrĩra; na makaaga gũtiga gwĩka maũndũ marĩa mekaga, kana gũtiga njĩra ya mwĩĩro wao.
• 20. Nake Jehova agĩgĩcinwo nĩ marakara nĩ ũndũ wa Isiraeli, agĩkiuga atĩrĩ, Tondũ rũciaro rũrũ nĩrũaagarara kĩrĩkanĩro gĩakwa kĩrĩa ndarĩkanĩire na maithe maruo ngĩmaatha, na rũaaga kũigua uuge wakwa-rĩ,
• 21. niĩ o na niĩ gwata rĩu ndicoka kũingata rũrĩrĩ o na rũmwe rũa ndũrĩrĩ iria Joshua aatigire kuo hĩndĩ ĩrĩa aakuire rũrũeherere;
• 22. nĩ getha ’hote kũgeria Aisiraeli na ũndũ wacio ’menye kana nĩmarĩikaraga njĩra-inĩ ya Jehova, na mathiagĩre o yo, o ta ũrĩa maithe mao mekaga, kana aca.
• 23. Tondũ ũcio Jehova agĩgĩtiga ndũrĩrĩ icio na ndaciingate na ihenya; o na ndaigana gũcirekereria acineane moko-inĩ ma Joshua.

Home