Go Back

Atiirĩrĩri Bũrũri Chapter 18

• 1. Na rĩrĩ, matukũ macio gũtiarĩ mũthamaki wa gũthamakĩra Isiraeli; ningĩ matukũ o macio, mũhĩrĩga wa Dani no wacaragia bũrũri wa gũtuĩka igai rĩaguo ũũtũũre, nĩ ũndũ o na nginya hĩndĩ ĩo, igai rĩaguo rĩtiaũgũĩrĩire mĩhĩrĩga-inĩ ya Isiraeli.
• 2. Nacio ciana cia Dani igĩkĩrekia andũ atano a nyũmba yacio, mathurĩtwo thĩinĩ wa andũ a cio othe, moimĩte Zora na Eshitaoli, magatuĩrie ũhoro wa bũrũri maũthigane; nao andũ acio maarĩ njamba. Nacio ciana cia Dani ikĩmera atĩrĩ, Thiĩi mũgatuĩrie ũhoro wa bũrũri kũndũ guothe; nao magĩgĩkinya nyũmba ya Mika, o kũu bũrũri ũcio wĩ irĩma nyingĩ wa Efiraimu makĩraara kuo.
• 3. Na rĩrĩ, maakuhĩhĩria nyũmba ya Mika, makĩmenya mũgambo wa mwanake ũcio Mũlawii; nao magĩgĩkerũra kuo, makĩmũũria atĩrĩ, Nũ wagĩkũrehire gũkũ? Na nĩ atĩa ũreka gũkũ? Na nĩ ũhoro ũrĩkũ wĩ naguo gũkũ?
• 4. Nake agĩkĩmera atĩrĩ, Mika nĩwe wanjĩkire maũndũ mana na mana, na nĩanyandĩkĩte ndĩmũrutĩre wĩra, ngagĩtuĩka mũthĩnjĩri-Ngai wake.
• 5. Nao magĩkĩmwĩra atĩrĩ, Twagũthaitha ũtũhoere kĩrĩra harĩ Ngai nĩ getha tũmenye kana rũgendo rũrũ nĩrũkũgaacĩra.
• 6. Nake mũthĩnjĩri-Ngai ũcio agĩkĩmera atĩrĩ, Thiĩi na thayũ; Jehova nĩetĩkĩrĩte mũthiĩ na njĩra ĩo mũrorete rĩu.
• 7. Hĩndĩ ĩo andũ acio atano magĩkiuma hau, magĩĩthiĩra, magĩkinya Laishi; magĩkĩona atĩ andũ arĩa maatũire kuo maaikarĩte matarĩ na ũgwati o na ũrĩkũ, tondũ maatũũrĩte o ta ũrĩa Azidoni maatũũraga me na thayũ, matarĩ na ũgwati; nĩ ũndũ bũrũri ũcio wao ndwarĩ mũndũ o na ũrĩkũ warĩ na ũhoti wa kũmeka ũũru thĩinĩ wa ũndũ o na ũrĩkũ, nao nĩmaaraihanĩrĩirie mũno na Azidoni, ningĩ matiarĩ na ũhoro na mũndũ o na ũrĩkũ.
• 8. Nao athigani acio magĩkĩhũndũka magĩcoka kũrĩ ariũ a ithe wao o kũu Zora na Eshitaoli; nao ariũ acio a ithe magĩkĩmoria atĩrĩ, Mũkuuga atĩa?
• 9. Nao makiuga atĩrĩ, Arahũkai, mũũkĩre twambate tũkahũrane nao; nĩ ũndũ nĩtwona bũrũri ũcio, na atĩrĩrĩ, nĩ mwega mũno; kaĩ mũgĩikarĩte o ro ũguo mũtegwika ũndũ? Tigai thiea wa gũthiĩ gũtonya bũrũri ũcio, mũwĩgwatĩre ũtuĩke igai rĩanyu.
• 10. Na rĩrĩ, mwakinya kuo nĩmũgũkora andũ maikarĩte matarĩ na ũgwati o na ũrĩkũ megwĩtigĩra. Na rĩrĩ, bũrũri ũcio nĩ mũnene, na Ngai nĩaũheanĩte akawĩkĩra moko-inĩ manyu; ningĩ kũu nĩ kũndũ gũtarĩ kĩndũ o na kĩmwe kĩngĩagwo kĩa indo iria irĩ thĩ.
• 11. Naho hagĩkiumagara andũ magana matandatũ a nyũmba ya Dani meohete indo ciao cia mbaara moimĩte Zora na Eshitaoli.
• 12. Nao magĩkĩambata, makĩamba hema ciao Kiriathu-jearimu, o kũu bũrũri wa Juda; na tondũ ũcio kũndũ kũu gũtũire gwĩtagwo Mahane-dani, o na ũmũthĩ; na atĩrĩrĩ, kwĩ na nyunjurĩ ya Kiriathu-jearimu.
• 13. Nao moima kũu magĩkĩgera bũrũri ũcio wĩ irĩma nyingĩ wa Efiraimu, magĩkinya mũciĩ wa Mika.
• 14. Nao andũ acio atano maathiĩte gũthigana bũrũri ũcio wa Laishi magĩkĩũria ariũ a ithe wao atĩrĩ, Nĩmũkũmenyete atĩ mũciĩ ũyũ wĩ na ebodi, na mĩhianano ya kũhoya Ngai nayo, na mũhianano wa gwacũhio, o na wa gũtwekio? Tondũ ũcio wĩciriei rĩu ũrĩa mũgwĩka.
• 15. Nao magĩgĩkerũra kũu, magĩkinya mũciĩ wa mwanake ũcio Mũlawii, o kũu mũciĩ wa Mika, nao makĩmũũria kana no mũhoro.
• 16. Nao andũ acio magana matandatũ a ciana cia Dani meohete indo ciao cia ita makĩrũgama itonyero-inĩ rĩa kĩhingo.
• 17. Nao andũ acio atano maathiĩte gũthigana bũrũri ũcio magĩgĩtonya kuo, makĩoya mũhianano ũcio wa gwacũhio, na ebodi ĩo, na mĩhianano ĩo ya kũhoya Ngai nayo, o na mũhianano ũcio ũngĩ wa gũtwekio; nake mũthĩnjĩri-Ngai ũcio aarũgamĩte o kũu itonyero-inĩ rĩa kĩhingo arĩ hamwe na andũ acio magana matandatũ meohete indo ciao cia ita.
• 18. Na maatonya mũciĩ wa Mika, makĩgĩra mũhianano ũcio wa gwacũhio, na ebodi ĩo, na mĩhianano ĩo ya kũhoya Ngai nayo, o na mũhianano ũcio ũngĩ wa gũtwekio-rĩ, mũthĩnjĩri-Ngai ũcio agĩkĩmoria atĩrĩ, Mũreka atĩa?
• 19. Nao magĩkĩmwĩra atĩrĩ, Kira, na wĩhumbe kanua na rũhĩ, ũtwarane na ithuĩ, ũtuĩke ta ũrĩ ithe witũ, o na ũtuĩke mũthĩnjĩri-Ngai witũ. Anga ũkuona ta wagĩrĩirũo nĩ gũtuĩka mũthĩnjĩri-Ngai wa mũndũ ũmwe, kana nĩ ũtuĩke mũthĩnjĩri-Ngai wa mũhĩrĩga mũgima, o na wa mbarĩ ng’ima, thĩinĩ wa Isiraeli?
• 20. Nake mũthĩnjĩri-Ngai ũcio agĩkena na ngoro, akĩoya ebodi ĩo, na mĩhianano ĩo ya kũhoya Ngai nayo, o na mũhianano ũcio wa gwacũhio, agĩtonya thĩinĩ wa andũ acio.
• 21. Magĩkĩgarũrũka magĩĩthiĩra, magĩthiĩ ciana ciao, na ũhiũ, o na indo ciao, imatongoretie.
• 22. Na rĩrĩ, hĩndĩ ĩrĩa maakorirũo maathiĩ handũ harayaraya moima mũciĩ wa Mika-rĩ, andũ arĩa maarĩ mĩciĩ ĩrĩa yakuhanĩrĩirie na mũciĩ wa Mika makĩũngana othe hamwe magĩkĩrũmĩrĩra ciana icio cia Dani, na magĩcikinyĩra.
• 23. Magĩkĩanĩrĩra ciana icio cia Dani, nacio ikĩhũgũra mothiũ ma cio, ikĩũria Mika atĩrĩ, Kaĩ wona atĩa tondũ woka na gĩkundi gĩkĩ kĩa andũ?
• 24. Nake agĩkĩmera atĩrĩ, Mũkĩoete ngai ciakwa iria ndethondekeire, mũgathiĩ nacio, o na mũthĩnjĩri-Ngai, na mũgethiĩra-rĩ, niĩ mũkĩndigĩte na kĩ? Na mũgũkĩnjũria ũũ: Kaĩ wona atĩa, nĩkĩ?
• 25. Nacio ciana icio cia Dani ikĩmwĩra atĩrĩ, Tumia kanua; menya ũreke mũgambo waku ũiguwo thĩinĩ witũ, nĩ getha hihi andũ amwe a marakara matigakũguthũkĩre, nawe ũũrũo nĩ muoyo mwĩ na andũ a nyũmba yaku.
• 26. Nacio ciana icio cia Dani igĩgĩĩthiĩra; nake Mika ona atĩ andũ acio me na hinya kũmũkĩra-rĩ, akĩhũndũka, akĩĩinũkĩra gwake mũciĩ.
• 27. Nao magĩgĩthiĩ na indo icio Mika aathondekete, o na mũthĩnjĩri-Ngai ũrĩa aarĩ nake, magĩkinya Laishi, magĩkora atĩ andũ akuo maatũire me na thayũ, na matarĩ na ũgwati o na ũrĩkũ, magĩkĩmahũra na hiũ cia njora, na magĩcina itũũra rĩao na mwaki.
• 28. Na gũtionekire wa kũmahonokia, nĩ ũndũ itũũra rĩu nĩrĩaraihanĩrĩirie mũno na Zidoni, nao andũ akuo matiarĩ na ũhoro na mũndũ o na ũrĩkũ wa kũngĩ; narĩo itũũra rĩu rĩarĩ gĩtuamba-inĩ kĩrĩa gĩakuhanĩrĩirie na Bethi-rehobu. Nacio ciana cia Dani igĩgĩcoka igĩaka itũũra rĩu, ikĩrĩtũũra.
• 29. Narĩo rĩĩtwa rĩa itũũra rĩu ikĩrĩtua Dani, o ta ũrĩa ithe wacio Dani, ũrĩa waciarĩtwo nĩ Isiraeli, etagwo; no rĩrĩ, itũũra rĩu mbere ĩo rĩetagwo Laishi.
• 30. Nacio ciana icio cia Dani ikĩĩhandĩra mũhianano ũcio wa gwacũhio; nake Jonathani wa Gerishoni mũrũ wa Musa, we mwene, o na ariũ ake, magĩtuĩka athĩnjĩri-Ngai a mũhĩrĩga wa Adani o nginya hĩndĩ ĩrĩa andũ acio maatahirũo makĩrutwo bũrũri ũcio.
• 31. Tondũ ũcio igĩkĩĩhandĩra mũhianano wa gwacũhio, ũcio Mika aathondekete, igĩtũũra iũmenyereire ihinda rĩrĩa rĩothe nyũmba ya Ngai yarĩ Shilo.

Home