Go Back

Atiirĩrĩri Bũrũri Chapter 17

• 1. Na rĩrĩ, kwarĩ mũndũ ũmwe wa bũrũri ũrĩa wĩ irĩma nyingĩ wa Efiraimu, nake etagwo Mika.
• 2. Ũcio agĩkĩĩra nyina atĩrĩ, Mbia iria ngiri ĩmwe na igana rĩmwe iria waiyirũo, o na ũkĩrumana kĩrumi nĩ ũndũ wacio, na ũgĩkĩrumana ngĩĩiguagĩra na matũ makwa-rĩ, atĩrĩrĩ, mbia icio nĩ niĩ ndĩ nacio; nĩ niĩ ndacioire. Nake nyina agĩkiuga atĩrĩ, Mũrũ wakwa, ũrorathimwo nĩ Jehova!
• 3. Nake agĩgĩcokeria nyina mbia icio ngiri ĩmwe na igana rĩmwe, nake nyina agĩkiuga atĩrĩ, Niĩ ti-itherũ nĩndaamũrĩire Jehova betha ĩo, yume moko-inĩ makwa, nĩ ũndũ waku wee mũrũ wakwa, ĩthondekwo mũhianano mwacũhie o na wa gũtwekio, na rĩu tondũ ũcio nĩndagĩgũcokeria.
• 4. Na rĩrĩ, aacokeria nyina mbia icio-rĩ, nyina agĩkĩoya mbia magana merĩ, agĩcinengera mũtwekia wa betha, nake agĩthondeka nacio mũhianano wa gwacũhio, o na wa gũtwekio; nayo ĩkĩigwo kwa Mika mũciĩ.
• 5. Na rĩrĩ, mũndũ ũcio, ti Mika, aarĩ na nyũmba ya kũhoera Ngai; nake agĩgĩthondeka ebodi, o na mĩhianano ya kũhoya Ngai nayo, agĩcoka akĩamũra mũndũ ũmwe wa ariũ ake, akĩmũtheria, agĩtuĩka mũthĩnjĩri-Ngai wake.
• 6. Na matukũ macio, gũtiarĩ mũthamaki wa gũthamakĩra Isiraeli; o mũndũ ekaga o ta ũrĩa onaga kwagĩrĩire we mwene.
• 7. Na rĩrĩ, kwarĩ mwanake woimĩte Bethi-lehemu-juda, itũũra rĩa mũhĩrĩga wa Juda, na aarĩ Mũlawii, nake mũndũ ũcio nĩ kũgena aagenete kuo.
• 8. Nake mũndũ ũcio agĩkiuma itũũra rĩu rĩa Bethi-lehemu-juda, nĩguo athiĩ o kũndũ kũrĩa angĩona gwa gũtũũra; nake rĩrĩa aathiangaga-rĩ, akĩya gũkinya mũciĩ wa Mika, o kũu bũrũri ũcio wĩ irĩma nyingĩ wa Efiraimu.
• 9. Nake Mika akĩmũũria atĩrĩ, Uumĩte kũ? Nake akĩmwĩra atĩrĩ, Ndĩ Mũlawii wa Bethi-lehemu-juda; nĩ gũthiĩ ndĩrathiĩ gũikara o kũrĩa ndĩrĩona gwa gũtũũra.
• 10. Mika agĩkĩmwĩra atĩrĩ, Ndũgĩtũũranie na niĩ, ũtuĩke ta ũrĩ baba, o na ũtuĩke mũthĩnjĩri-Ngai wakwa, na nĩndĩrĩkũheaga mbia ikũmi mwaka o mwaka, na nguo cia kwĩhumba; na ningĩ no niĩ ndĩrĩkũheaga irio cia kũrĩa. Tondũ ũcio Mũlawii ũcio agĩtonya atũũranie nake.
• 11. Mũlawii ũcio agĩgĩĩtĩkĩra gũtũũrania na mũndũ ũcio akenete; nake mwanake ũcio akonagwo nĩwe atariĩ o ta mũndũ ũmwe wa ariũ ake.
• 12. Nake Mika agĩkĩamũra Mũlawii ũcio, akĩmũtheria; nake mwanake ũcio agĩgĩtuĩka mũthĩnjĩri-Ngai wake, nake agĩtũũra o kũu kwa Mika.
• 13. Hĩndĩ ĩo Mika akiuga atĩrĩ, Rĩu ndĩ kũmenya atĩ Jehova nĩekũnjĩka maũndũ mega, nĩ gũkorũo ndĩ na Mũlawii ũtuĩkĩte mũthĩnjĩri-Ngai wakwa.

Home