Go Back

Atiirĩrĩri Bũrũri Chapter 13

• 1. Nacio ciana cia Isiraeli igĩcoka gwĩka maũndũ marĩa monagwo marĩ moru nĩ Jehova; nake Jehova agĩcirekereria agĩcineana moko-inĩ ma Afilisiti mĩaka mĩrongo ĩna.
• 2. Na rĩrĩ, kwarĩ mũndũ ũmwe wa Zera, wa mũhĩrĩga wa Adani, nake etagwo Manoa; na mũka aarĩ thata, ndaaciaraga.
• 3. Nake mũraika wa Jehova akiumĩrĩra mũndũ-wa-nja ũcio, akĩmwĩra ũũ: Atĩrĩrĩ, wee ũtũire wĩ thata na ndũciaraga; no rĩu nĩũkũgĩa ihu, na nĩũgaciara kahĩĩ.
• 4. Na tondũ ũcio ndagũthaitha wĩmenyerere ndũgacoke kũnyua ndibei, kana kĩndũ o na kĩmwe kĩrũrũ kĩngĩtũma mũndũ arĩwo, na ndũgacoke kũrĩa kĩndũ kĩĩ mũgiro;
• 5. nĩ ũndũ nĩũkũgĩa ihu, ũciare kahĩĩ; na gatikahutio na rũenji mũtwe, nĩ ũndũ kaana kau gagatuĩka Mũnaziri wamũrĩirũo Ngai, gwata hĩndĩ ĩrĩa gakoima nda ya nyina; na nĩko gakaambĩrĩria kũhonokia Isiraeli, kamarute moko-inĩ ma Afilisiti.
• 6. Nake mũndũ-wa-nja ũcio agĩgĩthiĩ akĩhe mũthuriwe ũhoro ũcio, akiuga atĩrĩ, He mũndũ wa Ngai ũgũũkĩte harĩ niĩ, na mũhianĩre wake ũgũtariĩ ta wa mũraika wa Ngai, na uuma wa kũmakania mũno; na ndinamũũria kwao, o nake ndananjira ũrĩa etagwo,
• 7. no anjĩrire ũũ: Atĩrĩrĩ, niũkugĩa ihu, na nĩũgaciara kahĩĩ; tondũ ũcio ndũgacoke kũnyua ndibei, kana kĩndũ o na kĩmwe kĩrũrũ kĩngĩtũma mũndũ arĩwo, na ndũgacoke kũrĩa kĩndũ o na kĩ kĩrĩ mũgiro; nĩ ũndũ kaana kau gagatuĩka Mũnaziri wamũrĩirũo Ngai, gwata hĩndĩ ĩrĩa gakoima nda ya nyina, o nginya hĩndĩ ĩrĩa gagakua.
• 8. Hĩndĩ ĩo Manoa agĩthaitha Jehova, akiuga ũũ: Atĩrĩrĩ, wee Jehova, ndagũthaitha ũreke mũndũ ũcio wa Ngai ũrareketie oke harĩ ithuĩ rĩngĩ, nĩguo atũmenyithie ũrĩa tũkaagĩrĩrũo nĩ gwĩka kaana kau gagaciarũo.
• 9. Nake Ngai agĩgĩĩtĩkĩra kũigua ihoya rĩu rĩa Manoa, nake mũraika ũcio wa Ngai agĩgĩcoka agĩthiĩ akiumĩrĩra mũndũ-wa-nja ũcio hĩndĩ ya kerĩ aikarĩte thĩ mũgũnda; no Manoa, mũthuriwe, ndaarĩ hamwe nake.
• 10. Nake mũndũ-wa-nja ũcio agĩteng’era ahiũhĩte, akĩhe mũthuriwe ũhoro ũcio, akĩmwĩra ũũ: Atĩrĩrĩ, mũndũ ũrĩa wokĩte kũrĩ niĩ mũthenya ũcio ũngĩ nĩacokete kũnyumĩrĩra rĩngĩ.
• 11. Nake Manoa agĩgĩũkĩra, akĩrũmĩrĩra mũka, agĩkinya harĩ mũndũ ũcio, akĩmũũria atĩrĩ, Wee nĩwe mũndũ ũrĩa waaririe na mũndũ-wa-nja ũyũ? Nake agĩkiuga atĩrĩ, Ĩĩ, nĩ niĩ.
• 12. Manoa agĩkĩmwĩra atĩrĩ, Ũhoro ũcio woigire ũrokĩhingio. Kaana kau-rĩ, gagagĩtuĩka mũndũ wa mũthemba ũrĩkũ hihi, o naguo wĩra ũrĩa gakarutaga-rĩ, nĩ ũrĩkũ hihi?
• 13. Nake mũraika wa Jehova agĩkĩĩra Manoa atĩrĩ, Mũndũ-wa-nja ũcio nĩamenyagĩrĩre maũndũ mothe marĩa ndamwĩrire ekage.
• 14. Ndagacoke kũrĩa kĩndũ o na kĩ kĩrĩa kiumaga mũthabibu-inĩ, kana ũreke anyue ndibei, kana kĩndũ o na kĩmwe kĩrũrũ kĩngĩtũma mũndũ arĩwo, o na kana arĩe kĩndũ o na kĩ kĩrĩ mũgiro; maũndũ mothe marĩa ndamwathire nĩamamenyagĩrĩre.
• 15. Nake Manoa akĩĩra mũraika ũcio wa Jehova atĩrĩ, Ndagũthaitha ũreke tũkũrũgamangie hanini, tũthĩnje kori, tũgũthondekere.
• 16. Nake mũraika wa Jehova akĩĩra Manoa atĩrĩ, O na wandũgamia-rĩ, ndirĩa irio ciaku; na ũngĩkorũo nĩũgũthondeka ihaki rĩa njino, rĩrutĩre Jehova. Nĩ gũkorũo Manoa ndaamenyaga atĩ ũcio nĩ mũraika wa Jehova.
• 17. Ningĩ Manoa agĩkĩmũũria atĩrĩ, Wĩtagwo atĩa, nĩ getha rĩrĩa maũndũ macio uugĩte makahingio tũgagũtĩa?
• 18. Nake mũraika ũcio wa Jehova akĩmũũria atĩrĩ, Kuona atĩ rĩĩtwa rĩakwa nĩ rĩa kũgegania-rĩ, ũkũrĩũria nĩkĩ?
• 19. Tondũ ũcio Manoa agĩkĩnyita kori o na akĩoya mũtu wa ihaki, agĩcirutĩra Jehova o kũu ihiga-inĩ igũrũ; nake mũraika ũcio agĩĩka ũndũ wa kũgegania mũno, Manoa na mũka makĩĩonagĩra na maitho mao.
• 20. Nĩ ũndũ nĩgwakinyire atĩrĩ, atĩ rĩrĩa rũrĩrĩmbĩ rũarĩrĩmbũkire na igũrũ kĩgongona-inĩ, mũraika ũcio wa Jehova agĩkĩambata igũrũ arĩ rũrĩrĩmbĩ-inĩ rũu rũĩ kĩgongona-inĩ; nake Manoa na mũka magĩkĩĩonera ũndũ ũcio, nao magĩkĩĩgũithia maturumithĩtie mothiũ mao thĩ.
• 21. No rĩrĩ, mũraika ũcio wa Jehova ndaigana gũcoka kuumĩrĩra Manoa, o na kana mũka, rĩngĩ. Hĩndĩ ĩo Manoa agĩkĩmenya atĩ ũcio nĩ mũraika wa Jehova.
• 22. Nake Manoa agĩkĩĩra mũka atĩrĩ, Ti-itherũ nĩtũgũkua, nĩ gũkorũo nĩtwona Ngai.
• 23. No mũka akĩmwĩra atĩrĩ, Korũo Jehova nĩarendaga gũtũnina-rĩ, ndangĩĩtĩkĩrĩte kwamũkĩra ihaki riitũ rĩa njino, o na ihaki rĩu rĩa mũtu tũmũrutĩire, o na ndangĩtuonetie maũndũ macio mothe, kana atwĩre maũndũ ta macio ihinda ta rĩrĩ.
• 24. Nake mũndũ-wa-nja ũcio agĩciara kahĩĩ, agĩgeta Samusoni; nako kaana kau gagĩkũra, nake Jehova agĩkarathima.
• 25. Ningĩ roho wa Jehova ũgĩgĩitĩka kũmũhĩka arĩ o kũu Mahane-dani, gatagatĩ ga Zora na Eshitaoli.

Home