Go Back

Atiirĩrĩri Bũrũri Chapter 12

• 1. Nao andũ a Efiraimu makĩũngana makĩringa marorete gathigathini; magĩkĩĩra Jefitha atĩrĩ, Nĩ kĩ gĩatũmire ũthiĩ ũkahũrane na ciana cia Amoni, na ndũtwĩte tũthiĩ nawe? Rĩu nĩtũgũikĩa nyũmba yaku mwaki tũgũcinĩrĩre kuo thĩinĩ.
• 2. Nake Jefitha agĩkĩmera atĩrĩ, Niĩ na andũ akwa tũrarĩ na mbaara njĩĩ mũno na ciana cia Amoni; na hĩndĩ ĩrĩa ndamwĩtire mũtiigana kũ’honokia harĩ o.
• 3. Rĩrĩa ndakĩonire atĩ mũti’honokia-rĩ, ngĩgĩĩtwarĩrĩra ũgwati-inĩ wa gĩkuũ, ngĩthiĩ kũhũrana na ciana cia Amoni, nake Jehova agĩcineana moko-inĩ makwa; tondũ ũcio mũgĩũkĩte ũmũthĩ mũkĩenda kũhũrana na niĩ nĩkĩ?
• 4. Jefitha agĩkĩũngania andũ othe a Gileadi, akĩhũrana mbaara na Efiraimu; nao andũ acio a Gileadi makĩhũra Aefiraimu mũno, nĩ ũndũ wa ũrĩa moigire ũũ: Atĩrĩrĩ, inyuĩ Agileadi aya mũtũũraga gatagatĩ-inĩ ka Aefiraimu na Amanase, nĩ inyuĩ mworire mũkiuma Efiraimu.
• 5. Nao Agileadi makĩnyita mariũko ma Jorodani marĩa maaringĩrĩire kwa Aefiraimu; na gũgĩtuĩka atĩrĩ, atĩ o mũndũ ũrĩa wothe wa Efiraimu wora akoiga ũũ: Ta rekei ninge mũrĩmo, andũ a Gileadi makamũũria atĩrĩ, Ĩ wee hihi wĩ Mũefiraimu? Nake angiuga, Aca,
• 6. magakĩmwĩra atĩrĩ, Ta gweta kiugo gĩkĩ, ’Shibolethu’, nake agakĩgweta akoiga ’Sibolethu’, nĩ ũndũ wa kũremwo nĩ gũkĩgweta wega; magakĩmũnyita makamũũragĩra o hau mariũko-inĩ ma Jorodani; narĩo ihinda rĩu hagĩkĩũragwo andũ ngiri mĩrongo ĩna na igĩrĩ a Efiraimu.
• 7. Jefitha agĩgĩtiirĩrĩra Isiraeli mĩaka ĩtandatũ, na thutha wa ũguo Jefitha ũcio Mũgileadi agĩkua; nake agĩgĩthikwo itũũra-inĩ rĩmwe rĩa matũũra ma Gileadi.
• 8. Na thutha wake nĩ Ibizani, wa kũu Bethi-lehemu, watiirĩrĩire Isiraeli.
• 9. Nake aarĩ na ariũ ake mĩrongo ĩtatũ; nao airĩtu ake mĩrongo ĩtatũ makĩhika matũũra mangĩ, nake akĩgũrĩra ihĩĩ ciake airĩtu mĩrongo ĩtatũ amarutĩte matũũra mangĩ; nake agĩtiirĩrĩra Isiraeli mĩaka mũgwanja.
• 10. Nake Ibizani ũcio agĩgĩkua agĩthikwo Bethi-lehemu.
• 11. Na thutha wake nĩ Eloni, Mũzebuluni, watiirĩrĩire Isiraeli; nake agĩtiirĩrĩra Isiraeli mĩaka ikũmi.
• 12. Nake Eloni ũcio Mũzebuluni agĩgĩkua, agĩthikwo Aijaloni, o kũu bũrũri wa Zebuluni.
• 13. Na thutha wake nĩ Abidoni wa Hileli, Mũpirathoni, watiirĩrĩire Isiraeli.
• 14. Nake aarĩ na ariũ ake mĩrongo ĩna, o na ciana cia ariũ ake mĩrongo ĩtatũ. Nao andũ acio maahaicaga njaũ mĩrongo mũgwanja cia ndigiri. Nake agĩtiirĩrĩra Isiraeli mĩaka ĩnana.
• 15. Nake Abidoni ũcio wa Hileli, Mũpirathoni, agĩgĩkua, agĩthikwo Pirathoni bũrũri wa Efiraimu, o kũu bũrũri ũrĩa wĩ irĩma nyingĩ wa Aamaleki.

Home