Go Back

Atiirĩrĩri Bũrũri Chapter 10

• 1. Na rĩrĩ, thutha wa Abimeleku hakĩarahũka Tola wa Pua, mũrũ wa Dodo, mũndũ wa mũhĩrĩga wa Isakaru, nĩguo ahonokie Isiraeli; nake aatũũraga Shamiru bũrũri ũrĩa warĩ irĩma nyingĩ wa Efiraimu.
• 2. Nake agĩgĩtiirĩrĩra Isiraeli mĩaka mĩrongo ĩĩrĩ na ĩtatũ, agĩgĩkua, agĩthikwo o kũu Shamiru.
• 3. Ningĩ thutha wake hakĩarahũka Jairu, Mũgileadi; nake agĩtiirĩrĩra Isiraeli mĩaka mĩrongo ĩĩrĩ na ĩĩrĩ.
• 4. Nake aarĩ na ariũ ake mĩrongo ĩtatũ, nao maahaicaga njaũ cia ndigiri mĩrongo ĩtatũ, na makagĩa na matũũra mĩrongo ĩtatũ marĩa maatũire, metagwo Havothu-jairu, o na ũmũthĩ; namo marĩ bũrũri wa Gileadi.
• 5. Nake Jairu agĩgĩkua, agĩthikwo o kũu Kamonu.
• 6. Nacio ciana cia Isiraeli igĩgĩcoka igĩĩka maũndũ marĩa monagwo marĩ moru nĩ Jehova, igĩtungatĩra Mabaali na Maashitarothu, na ngai cia Amoabi, na ngai cia ciana cia Amoni, o na ngai cia Afilisiti; nacio igĩgĩtigana na Jehova, ikĩaga kũmũtungatĩra.
• 7. Nake Jehova agĩgĩcinwo nĩ marakara nĩ ũndũ wa andũ a Isiraeli, nake agĩkĩmendia harĩ Afilisti, o na harĩ ciana cia Amoni.
• 8. Nao andũ acio magĩkĩnyarira ciana cia Isiraeli, o na magĩcihinyĩrĩria mũno mwaka ũcio; nĩngĩ makĩhinyĩrĩria ciana ciothe cia Isiraeli iria ciarĩ mũrĩmo ũcio ũngĩ wa Jorodani, bũrũri wa Aamori ũrĩa wĩ kũu Gileadi, mĩaka ikũmi na ĩnana.
• 9. O na ningĩ ciana icio cia Amoni ikĩringa mũrĩmo ũyũ wa Jorodani ciũke ihũrane na Juda, na Benjamini, o na nyũmba ya Efiraimu; na tondũ ũcio Aisiraeli magĩkĩnyarirũo o mũno ma.
• 10. Nacio ciana cia Isiraeli igĩkaĩra Jehova, ikĩmwĩra ũũ: Hĩ! Nĩtwĩhĩtie, nĩ ũndũ nĩtũtiganĩte na Ngai witũ, tũgatungatĩra Mabaali.
• 11. Nake Jehova agĩkĩĩra ciana cia Isiraeli atĩrĩ, Githĩ ndiamũhonokirie harĩ Amisiri, o na harĩ Aamori, o na harĩ ciana cia Amoni, o na Afilisiti?
• 12. O na ningĩ no mwahinyĩrĩirio nĩ Azidoni, na Aamaleki, o na Aamoni, na tondũ ũcio mũkĩngaĩra, na niĩ ngĩmũhonokia, ngĩmũruta moko-inĩ mao.
• 13. No rĩrĩ, o na gwatuĩka nĩ ũguo-rĩ, nĩmũtiganĩte na niĩ, mũgatungatĩra ngai ingĩ tondũ ũcio ndigacoka kũmũhonokia o na rĩ.
• 14. Gĩthiĩi mũgakaĩre ngai icio mwethurĩire, ikĩmũhonokie mwanyamarĩka.
• 15. Nacio ciana cia Isiraeli ikĩĩra Jehova atĩrĩ, Nĩtwĩhĩtie; twĩke ũndũ ũrĩa wothe ũkuona arĩ mwega; no rĩrĩ, twagũthaitha ũtũhonokie mũthenya ũyũ wa ũmũthĩ.
• 16. Nacio igĩkĩeheria ngai icio cia kũngĩ iria ciarĩ thĩinĩ wacio, igĩcoka gũtungatĩra Jehova; nayo ngoro ya Ngai ĩkĩigua kĩeha nĩ ũndũ wa ũrĩa Aisiraeli maanyarirĩkĩte.
• 17. Hĩndĩ ĩo ciana cia Amoni igĩkĩũngana ikĩamba hema ciacio o kũu Gileadi, nacio ciana cia Isiraeli ikĩũngana, igĩthiĩ ikĩamba hema ciacio Mizipa.
• 18. Nao andũ a Gileadi, o acio anene, magĩitĩka kũũrania o ene atĩrĩ, Nũ ũgũtata ita ahũrane na ciana cia Amoni? Ũcio nĩwe ũgũtuĩka mũnene wa andũ othe arĩa matũũraga Gileadi.

Home