Go Back

Kũguũrĩrio Chapter 6

• 1. NA nĩndonire ũcio Gatũrũme aamethũra gatembe kamwe ga tũrĩa mũgwanja twa mũhũra, na ngĩigua ciũmbe icio inya ii muoyo kĩmwe kĩaaria na mũgambo watariĩ ta ngwa, kĩoiga, Ũka.
• 2. Ngĩrora, ngĩona atĩrĩ, kwĩ mbarathi njerũ, nake ũrĩa ũmĩhaicĩte e na ũta; nake akĩheo thũmbĩ, akiumĩra agĩũka agĩtoranagia, na atuĩke o wa gũtoranagia.
• 3. Na aamethũra gatembe ga kerĩ, ngĩigua kĩũmbe kĩrĩa kĩĩ muoyo gĩa kerĩ kĩoiga, Ũka.
• 4. Gũkiumĩra mbarathi ĩngĩ, mbarathi ndune mũno; nake ũrĩa ũmĩhaicĩte agĩĩtĩkĩrio anine thayũ thĩ, gũitĩke kũũraganwo; nake akĩheo rũhiũ rũa njora rũnene.
• 5. Ningĩ aamethũra gatembe ga gatatũ, ngĩigua kĩũmbe kĩrĩa kĩĩ muoyo gĩa gatatũ kĩoiga, Ũka. Ngĩkĩrora ngĩona atĩrĩ, kwĩ mbarathi njirũ, nake ũrĩa ũmĩhaicĩte nĩagwete ratiri.
• 6. Ngĩigua ta mũgambo ũkuuma na gatagatĩ-inĩ ga ciũmbe icio inya ii muoyo, ũkoiga atĩrĩ, Kĩbaba kĩa ngano kiumage ciringi, na ibaba ithatũ cia ngano ya cairi nacio ciumage o ciringi; na rĩrĩ, maguta na ndibei-rĩ, ndũgaciĩhie.
• 7. Ningĩ aamethũra gatembe ga kana, ngĩigua mũgambo wa kĩũmbe kĩrĩa kĩĩ muoyo kĩrĩa gĩa kana, woiga, Ũka.
• 8. Ningĩ ngĩrora, ngĩona atĩrĩ, kwĩ mbarathi theũku, nake ũrĩa ũhaicĩte ĩo, rĩĩtwa rĩake nĩ Gĩkuũ; na nĩoimĩtwo thutha nĩ Kwa-ngoma. Nao makĩheo wathani gĩcunjĩ kĩa inya gĩa thĩ, moraganage na rũhiũ, o na ng’aragu, na mũthiro, o na nyamũ iria ndĩani cia gũkũ thĩ.
• 9. Ningĩ aamethũra gatembe ga gatano, gĩtina-inĩ gĩa kĩgongona ngĩona maroho ma andũ arĩa maanoragwo nĩ ũndũ wa Ũhoro wa Ngai, na nĩ ũndũ wa ũira ũrĩa maagwatĩirie;
• 10. nao magĩkaya na mũgambo mũnene, makĩũria, Ĩ, Mwathani Mũnene, wee mũtheru na wa ma, nĩ nginya-rĩ, ũgũtĩra gũcirithania ũrĩhĩrie thakame iitũ kwĩ arĩa matũire kũrĩa thĩ?
• 11. Nao makĩheo o mũndũ nguo njerũ ndaya, makĩĩrũo no mahurũkage ihinda rĩngĩ inyinyi, nginya ndungata iria ingĩ cia thiritũ yao, nĩcio ariũ a Ithe wao, arĩa makoragwo o ta ũrĩa o moragirũo, makahinga.
• 12. Ningĩ ngĩona aamethũra gatembe ga gatandatũ, na gũkĩgĩa gĩthingithia gĩa thĩ kĩnene; narĩo riũa rĩkĩira ta ikũnia rĩa guoya mũirũ, naguo mweri ũkĩhaana ta thakame, wĩ wothe;
• 13. nacio njata cia igũrũ ikĩgũa thĩ, o ta ũrĩa mũkũyũ ũitaga ngũyũ iria thatu wainainio nĩ rũhuho rũnene.
• 14. Igũrũ narĩo rĩgĩthengio o ta ibuku rĩa gĩkũnjo rĩgĩkũnjwo, nacio irĩma ciothe o na ithama ciothe ikĩeherio kũndũ gwacio.
• 15. Nao athamaki a thĩ, o na anene, na aathani arĩa anene a thigari, na itonga, na andũ arĩa me hinya, o na mũndũ o wothe ngombo na mũndũ o wothe mwĩathi, makĩĩhitha thĩinĩ wa ngurunga o na mahiga-inĩ marĩa me irĩma-inĩ;
• 16. makeraga irĩma o na mahiga atĩrĩ, Tũgũĩrei, mũtũthiĩkĩrĩrie ũthiũ wa ũcio ũikarĩire gĩtĩ gĩa ũthamaki, na mũtũhithĩrĩre marakara ma Gatũrũme;
• 17. amu mũthenya nĩ mũkinyu ũrĩa mũnene wa marakara mao, nake ũrĩa ũngĩhota kwĩũmĩrĩria, nũ?

Home