Go Back

Kũguũrĩrio Chapter 21

• 1. NGĨCOKA ngĩona igũrũ rĩerũ o na thĩ njerũ; amu igũrũ rĩrĩa rĩa mbere o na thĩ ĩrĩa ya mbere nĩ gũthenga ciathengete igathira; iria rĩrĩa inene narĩo rĩgakĩaga.
• 2. Na ngĩona itũũra rĩrĩa itheru, Jerusalemu ĩrĩa njerũ, rĩgĩikũrũka rĩkiuma Igũrũ kwĩ Ngai, rĩthagathagĩtwo ta mũhiki agemeirio mũthuriwe.
• 3. Na ngĩigua mũgambo mũnene woima gĩtĩ-inĩ kĩrĩa gĩa ũthamaki woiga, Atĩrĩrĩ, gĩikaro kĩa Ngai kĩĩ hamwe na andũ, nake nĩegũikarania nao, nao matuĩke andũ ake, nake Ngai we mwene agĩage o hamwe nao, [e Ngai wao];
• 4. nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.
• 5. Nake ũrĩa ũtũire aikarĩire gĩtĩ-gĩa-ũthamaki akiuga, Nĩ atĩrĩ, maũndũ mothe nĩ kũmerũhia ndĩramerũhia. Nake akiuga, Andĩka; amu ciugo icio nĩ cia kwĩhokwo na nĩ cia ma.
• 6. Agĩcoka akĩnjĩra atĩrĩrĩ, Maũndũ macio nĩmarĩkĩtie gwĩkĩka. Nĩ niĩ Alifa o na Omega, kĩambĩrĩria o na kĩrĩkĩro. Ũrĩa ũnyotiĩ ngũmũhe maĩ ma gĩthima kĩa maĩ marĩa ma muoyo, ndĩmũhe tũhũ.
• 7. Ũrĩa ũtoranĩtie nĩwe ũkagaya maũndũ macio; na niĩ nĩngatuĩka Ngai wake, nake atuĩke mũrũ wakwa.
• 8. No arĩa me guoya, na arĩa matetĩkĩtie, na imaramari, na oragani, na ahũri maraya, na arogi, na ahoi mĩhianano, o na arĩa a maheni othe-rĩ, igai rĩao no iria-inĩ thĩinĩ, rĩrĩa rĩakanaga mwaki na ũbiriti; na nĩkuo gũkua kũrĩa gwa kerĩ.
• 9. Gũgĩcoka gũgĩũka mũraika ũmwe wa arĩa mũgwanja maarĩ na mbakũri iria mũgwanja, arĩa-ni maakuuĩte matũhũhũ marĩa mũgwanja ma kũrigĩrĩria; nake akĩnjarĩria, akiuga, Ũka na gũkũ, nguonie mũhiki, o we mũtumia wa Gatũrũme.
• 10. Akĩnjoya ndĩ thĩinĩ wa Roho, akĩnginyia kĩrĩma-inĩ kĩnene, gĩtũũgĩru ma, akĩnyonia itũũra rĩrĩa itheru, Jerusalemu, rĩgĩikũrũka rĩkiuma Igũrũ kwĩ Ngai,
• 11. rĩrĩ o na riri wa Ngai. Mũtherere warĩo wahuanaga ta wa kahiga ke goro mũno, o ta karĩa getagwo njathibi, gakengu o ta gĩcicio.
• 12. Na rĩĩ na rũirigo rũnene rũa mahiga, rũraya na igũrũ, rũĩ na mĩromo ikũmi na ĩĩrĩ, na mĩromo ĩo ĩgaikario nĩ araika ikũmi na erĩ; ningĩ ĩkaandĩkwo marĩĩtwa, na nĩmo marĩĩtwa ma mĩhĩrĩga ĩrĩa ikũmi na ĩĩrĩ ya ciana cia Isiraeli;
• 13. mwena wa irathĩro rĩa riũa kwarĩ mĩromo ĩtatũ; na mwena wa gathigathini, mĩromo ĩtatũ; na mwena wa gũthini, mĩromo ĩtatũ; na mwena wa ithũĩro rĩa riũa, mĩromo ĩtatũ.
• 14. Naruo rũirigo rũu rũa itũũra rũarĩ na itina ikũmi na igĩrĩ, na igũrũ wacio ikagĩa na marĩĩtwa ikũmi na merĩ ma atũmwo arĩa ikũmi na erĩ a Gatũrũme.
• 15. Nake ũcio wanjarĩirie aarĩ na mũrangi wa thahabu wa kũgera naguo, nĩguo agere itũũra rĩu, o na mĩromo yarĩo, o na rũirigo rũarĩo.
• 16. Narĩo itũũra rĩu rĩĩigĩte rĩĩ na mĩena ĩna, kũraiha kwarĩo gũkaiganana na kwarama kwarĩo. Agĩkĩgera itũũra na mũrangi ũcio, rĩgĩkorũo nĩ rĩa mairo ngiri ĩmwe ya magana matano: kũraiha, na kwarama, na kwambata kwarĩo igũrũ, nĩkũiganaine.
• 17. Agĩcoka akĩgera rũirigo rũarĩo, rũgĩkorũo nĩ rũa mĩkono igana rĩa mĩrongo ĩna na ĩna, mũgerere wa mũndũ, na noguo wa mũraika.
• 18. Naguo mwakĩre wa rũirigo rũu rũarĩo warĩ wa njathibi, narĩo itũũra rĩarĩ o rĩa thahabu ũrĩa mũtherie kũna, ũkahaana o ta gĩcicio kĩrĩa gĩtheru cua.
• 19. Nacio itina cia rũirigo rũa itũũra rĩu nĩcianagĩtwo na tũhiga tũrĩa twĩ goro mĩthemba yothe. Gĩtina kĩrĩa kĩa mbere kĩarĩ kĩa njathibi; na gĩa kerĩ, kĩa yakuti ĩrĩa ya bururu; na gĩa gatatũ, kĩa yacimu; na gĩa kana, gĩa thumarati;
• 20. na gĩa gatano, kĩa onigithi; na gĩa gatandatũ, kĩa wakiki ũrĩa mũtune; na kĩa mũgwanja, kĩa yakuti ĩrĩa ĩhuana thahabu; na gĩa kanana, gĩa thabaricandi; na gĩa kenda, kĩa yakuti ĩrĩa ĩhaana ngoikoni; na gĩa ikũmi, kĩa wakiki ũrĩa ũhaana ta nyeki nduru; na gĩa ikũmi na kĩmwe, kĩa wakiki ũrĩa wa bururu; na gĩa ikũmi na igĩrĩ, kĩa amethuthito.
• 21. Nayo mĩromo ĩrĩa ikũmi na ĩĩrĩ nĩ ruru ikũmi na igĩrĩ; o mũromo ũgagĩtuĩka nĩ wa ruru ĩmwe; nakĩo kĩng’aratua kĩrĩa kĩarĩ itũũra rĩu kĩarĩ gĩa thahabu ũrĩa mũtherie kũna, o ta arĩ gĩcicio gĩkembũku ta maĩ.
• 22. Na gũtirĩ hekarũ ndonire kuo, nĩ gũkorũo Mwathani Ngai Mwene-Hinya-Wothe, o nake Gatũrũme, nĩo hekarũ yakuo.
• 23. Narĩo itũũra rĩu rĩtibataragio nĩ riũa, kana mweri, irĩarĩre, nĩ gũkorũo riri wa Ngai nĩguo ũrĩmũrĩkagĩra, na tawa wakuo nĩ ũcio Gatũrũme.
• 24. Nacio ndũrĩrĩ igetwaraga na ũtheri wakuo, nao athamaki a thĩ marehage riri wao kuo.
• 25. Nayo mĩromo yakuo ndĩrĩ hingo ĩkahingwo mũthenya (amu kũu gũtikagĩa na ũtukũ);
• 26. na nĩkuo magakĩrehe riri wa ndũrĩrĩ o na gĩtĩo gĩacio.
• 27. Na gũtirĩ hingo gũgatonya ũndũ o na ũrĩkũ mũthũku, o na kana mũndũ wĩkaga ũndũ wa ũmaramari na wa maheni; tiga o arĩa aandĩke ibuku-inĩ rĩrĩa rĩa Gatũrũme rĩa muoyo oiki.

Home