Go Back

Kũguũrĩrio Chapter 19

• 1. THUTHA wa maũndũ macio ndacokire kũigua ta mũgambo mũnene wa kĩrĩndĩ kĩingĩ Igũrũ ũkiuga, Haleluya! Ũhonokio, na riri, na ũhoti, no cia Ngai witũ,
• 2. amu matua make no ma ma na no ma kĩhooto; amu nĩatuĩrĩire mũmaraya ũcio mũnene ũrathũkagia thĩ na ũmaraya wake; na nĩamũrĩhĩirie thakame ya ndungata ciake.
• 3. Magĩcoka makiuga rĩa kerĩ atĩrĩ, Haleluya! Nayo ndogo yake ĩgũtũũra o yambataga nginya tene na tene.
• 4. Nao athuri arĩa mĩrongo ĩĩrĩ na ana, o na ciũmbe iria inya ii muoyo, makĩĩgũithia thĩ magĩthathaiya Ngai ũrĩa ũtũire aikarĩire gĩtĩ gĩa ũthamaki, makiuga, Amen; Haleluya!
• 5. Nakuo kũu gĩtĩ-inĩ kĩu gĩa ũthamaki gũkiuma mũgambo ũkiuga atĩrĩ, Goocai Ngai witũ, inyuĩ ndungata ciake inyuothe, o inyuĩ mũmwĩtigĩrĩte, arĩa anyinyi na arĩa anene.
• 6. Na ngĩigua ta mũgambo wa kĩrĩndĩ kĩingĩ mũno, ta mũgambĩre wa maĩ maingĩ, na ta mũgambĩre wa ngwa iria nene, ũkiuga Haleluya! amu Mwathani Ngai witũ, o we Mwene-Hinya-Wothe, nĩagwete gũthamaka.
• 7. Nĩtũkenei tũcanjamũke mũno, na tũmũhe ngatho iria imwagĩrĩire, tondũ kĩhikanio gĩa Gatũrũme nĩ gĩkinyu, na mũhiki wake nĩarĩkĩtie gwĩthagathaga.
• 8. Nake agĩĩtĩkĩrio ehumbe nguo cia tama wa gatani ũrĩa mwega mũno, mũkengu, mũtheru, amu tama ũcio mwega wa gatani nĩguo ciĩko cia ũthingu iria cia andũ arĩa aamũre.
• 9. Ngĩcoka ngĩĩrũo, Andĩka atĩrĩ, Gũkena-rĩ, nĩ arĩa metĩirũo iruga rĩa kĩhikanio gĩa Gatũrũme. Agĩcoka ningĩ akĩnjĩra atĩrĩ, Icio nĩ ciugo cia ma cia Ngai.
• 10. Na niĩ ngĩĩgũithia thĩ mbere ya magũrũ-inĩ make ndĩmũthathaiye. Nake akĩnjĩra, Menya wĩke ũguo; niĩ na niĩ ndĩ o ndungata hamwe nawe, o na hamwe na ariũ a Thoguo arĩa magwatĩirie ũira wa Jesu. Thathaiya Ngai arĩ we; tondũ rĩrĩ, ũira wa Jesu nĩguo roho wa ũrathi.
• 11. Na nĩndonire Igũrũ rĩhingũkĩte; na nĩ atĩrĩ, kwĩ mbarathi njerũ, na ũrĩa ũmĩhaicĩte, wĩtagwo Mwĩhokeku na Wa-ma; nake atuaga cira, o na mbaara akaruta, na kĩhooto.
• 12. Na maitho make matariĩ ta rũrĩrĩmbĩ rũa mwaki, na mũtwe e na managĩ maingĩ ma ũnene; na e na rĩĩtwa aandĩkĩtwo, gũtarĩ ũrĩũĩ tiga o we mwene.
• 13. Na nĩehumbĩte nguo ĩtoboketio thakame-inĩ; narĩo rĩĩtwa rĩrĩa etagwo nĩ Ũhoro wa Ngai.
• 14. Nacio ita iria irĩ Igũrũ ikamuuma thutha ihaicĩte mbarathi njerũ, na igekĩra nguo cia tama wa gatani ũrĩa mwega, mwerũ, mũtheru.
• 15. Ningĩ kanua-inĩ akoima rũhiũ rũũgĩ rũa kũhũra ndũrĩrĩ naruo; na nĩagaciriyĩraga na rũthanju rũa kĩgera; na nĩwe ũrangaga ihihĩro rĩa ndibei ĩrĩa ya wĩĩ wa marakara ma Ngai Mwene-Hinya-Wothe.
• 16. Na nguo yake na kĩero gĩake e na rĩĩtwa aandĩkĩtwo, atĩrĩ, MŨTHAMAKI WA ATHAMAKI, NA MWATHANI WA AATHANI.
• 17. Ningĩ ngĩona mũraika ũmwe arũngiĩ thĩinĩ wa riũa; nake akĩanĩrĩra na mũgambo mũnene, akĩĩra nyamũ cia igũrũ ciothe iria ireraga rĩera-inĩ gatagatĩ atĩrĩ, Ũkai mwĩcokanĩrĩrie iruga-inĩ rĩrĩa inene rĩa Ngai,
• 18. nĩguo mũrĩe nyama cia mĩĩrĩ ya athamaki, o na nyama cia anene a thigari, na nyama cia andũ arĩa me hinya, na nyama cia mbarathi o na cia arĩa akuue nĩcio, o na nyama cia mĩĩrĩ ya andũ othe, eathi o na ngombo, anyinyi o na anene.
• 19. Ngĩcoka ngĩona nyamũ ĩrĩa, o na athamaki a thĩ, na ita ciao, mecokanĩrĩirie marũe na ũcio wahaicĩte mbarathi, o na ita yake.
• 20. Nayo nyamũ ĩo ĩkĩnyitwo, ĩkĩnyitanĩrio o na mũrathi ũrĩa wa maheni, ũrĩa waringaga ciama harĩ yo, akahĩtithagia andũ nacio arĩa mekĩrĩtwo ruoro rũrĩa rũa nyamũ ĩo, o na arĩa maainamagĩrĩra makahoya mũhianano wayo. Nao erĩ magĩikio me muoyo thĩinĩ wa iria rĩa mwaki rĩrĩa rĩakanaga ũbiriti,
• 21. na acio angĩ makĩũragwo nĩ rũhiũ rũa ũcio wahaicĩte mbarathi, o rũhiũ o rũu ruumaga kanua gake; nacio nyamũ cia igũrũ ciothe ikĩhũna nyama cia mĩĩrĩ yao.

Home