Go Back

Kũguũrĩrio Chapter 18

• 1. THUTHA wa maũndũ macio nĩndonire mũraika ũngĩ agĩikũrũka oimĩte Igũrũ, e na wathani mũnene; nayo thĩ ĩkĩarĩrũo nĩ ũkengi wake
• 2. Nake akĩanĩrĩra na mũgambo wa hinya mũno, akiuga atĩrĩ, Nĩ igũu-ni! Babuloni, itũũra rĩrĩa rĩnene-rĩ, nĩ igũu, rĩgagĩtuĩka gĩikaro kĩa ndaimono, na kĩhingo kĩa ngoma o yothe thũku, o na gĩtindo kĩa nyamũ ya igũrũ o yothe ĩrĩa thũku na ĩrĩa ĩthũirũo.
• 3. Amu-rĩ, ndũrĩrĩ ciothe ciananyua ndibei ĩrĩa ya marakara ma ũmaraya wa mũndũ mũka ũcio, na athamaki a thĩ nĩmarahũraga maraya nake, na ahũri-biacara a mabũrũri magagĩtonga nĩ ũndũ wa kũneneha kwa mũcanũko wake.
• 4. Ngĩcoka ngĩigua mũgambo ũngĩ ũkiuma Igũrũ, ũkiuga, Umai kuo, andũ akwa, muume thĩinĩ wake, nĩguo mũtikagĩe ngwatanĩro na mehia make, na mũtikae kũgwatanĩra nake matũhũhũ make;
• 5. amu mehia make nĩmeiganĩrĩire makaya gũkinya o Igũrũ, nake Ngai akaririkana mawaganu make.
• 6. Mũhei o ũrĩa we araheanaga, na mũmũthukĩre maita merĩ ma ũrĩa ciĩko ciake ciigana; gĩkombe kĩrĩa araringanagĩria ndibei-rĩ, mũmũringĩrie maita merĩ makĩo.
• 7. O ta ũrĩa aratũire egoocete na agacanũka-rĩ, mũhei kũnyarirĩka, o na kĩeha, ciigana o ro ũguo; tondũ atũire eĩraga na ngoro atĩrĩ, Njikaire haha ndĩ mũthamaki; ndirĩ wa ndigwa niĩ, niĩ ndirĩ hingo ngarĩo nĩ kĩeha.
• 8. Tondũ ũcio-rĩ, matũhũhũ make makarehane o mũthenya o ũmwe, gĩkuũ, na kĩeha, na ng’aragu; nake nĩ gũcinwo agacinwo na mwaki athire; amu Mwathani Ngai, ũrĩa ũtuĩte cira wake, e hinya.
• 9. Nao athamaki a thĩ, arĩa marahũraga maraya nake na magaikarania na mũcanũko hamwe nake, nĩ kũmũrĩrĩra makamũrĩrĩra makĩmũgirĩkagĩra makĩĩrorera ndogo yake akĩhĩa,
• 10. marũgamĩte hanene nĩ ũndũ wa gwĩtigĩra kĩnyarirĩko gĩake, makiugaga, Ĩya-ĩ, ĩya, itũũra rĩrĩa inene-ĩ! Ĩya, Babuloni, itũũra rĩrĩa rĩa hinya-ĩ! amu-rĩ, o ro thaa o ĩmwe ituĩro rĩaku rĩrĩ gũkinya.
• 11. Ahũri a biacara a thĩ yothe o nao no kũmũrĩrĩra makĩmũgirĩkagĩra, nĩ ũndũ gũtirĩ mũndũ wĩcoka kũgũra thũgũrĩ wao,
• 12. thũgũrĩ wa thahabu, na wa betha, na wa tũhiga tũrĩa twĩ goro, na wa tũrĩa twĩtagwo ruru, na wa matama marĩa mega ma gatani, na marĩa ma rangi ta wa ndaathi, na marĩa ma hariri, na marĩa matune ta gakarakũ; na mĩtĩ ĩrĩa yothe mĩnungi wega, na indo ciothe cia mĩguongo, na indo ciothe ithondeketwo cia mĩtĩ ĩĩ goro mũno, na cia rũthuku, na cia kĩgera, na cia mahiga marĩa mega ma nyaigĩ;
• 13. na makoni marĩa ma ndarathini, na iriki, na ubumba, na maguta me mũtararĩko mwega, na ubani, na ndibei, na maguta ma ndamaiyũ, na mũtu ũrĩa mũhinyu wega, na ngano, na ng’ombe, na ng’ondu; o naguo thũgũrĩ wa mbarathi na makari na ngombo; na mĩoyo ya andũ o nayo.
• 14. Namo matunda meru marĩa ũreriragĩria na ngoro yaku nĩmakwehereire, na indo iria ciothe irarĩ cia ũthuro na cia mwago igakũũrĩra, na itirĩ hingo igacoka kuoneka rĩngĩ o na rĩ.
• 15. Ahũri-biacara ya indo icio, acio maratongagio nĩwe, makarũgama hanene nĩ ũndũ wa gwĩtigĩra kĩnyarirĩko gĩake, makĩrĩraga o makĩgirĩkaga,
• 16. makiugaga, Ĩya-ĩ, ĩya, ituũra rĩrĩa inene ĩ! mũciĩ o ũcio ũrehumbaga nguo cia tama wa gatani, na cia rangi wa ndaathi, na ndune ta gakarakũ, na ũkegemia na thahabu na tũhiga twĩ goro o na twa ruru ĩ!
• 17. Amu-rĩ, o ro thaa o ĩmwe ũtonga ũigana ũũ ũrĩ kũharagana. Nake mũnene o wothe wa marikabu, na mũndũ o wothe ũringaga iria agĩthiĩ kũndũ o kũrĩkũ, na atwari a marikabu o nao, na andũ othe arĩa matũirio nĩ wĩra wa iria-inĩ, o nao makĩrũgama hanene,
• 18. magakayaga makĩĩroragĩra ndogo yaguo ũkĩhĩa, makoiga, Nĩ itũũra rĩrĩkũ rĩhaana ta itũũra rĩu ĩnene?
• 19. Makĩĩhurĩria rũkũngũ mĩtwe, o magĩkayaga makĩrĩraga na makĩgirĩkaga, makoiga, Ĩya-ĩ, ĩya, itũũra rĩu inene-ĩ, kũu kũratongagĩrũo nĩ arĩa othe me na marikabu ciao iria-inĩ, nĩ ũrĩa rĩranenehetie thogora! amu-rĩ, o ro thaa o ĩmwe rĩrĩ gũtuĩka iganjo.
• 20. Mũkenererei, wee Igũrũ rĩrĩ, na inyuĩ arĩa aamũre, na inyuĩ atũmwo, na inyuĩ anabii, amu Ngai nĩarĩkĩtie kũmũtuĩra akamũrĩhia nĩ ũndũ wanyu.
• 21. Na mũraika ũmwe wĩ hinya akĩoya ihiga rĩatariĩ ta ihiga inene rĩa gĩthĩi, akĩrĩikia iria rĩrĩa inene thĩinĩ, akiuga atĩrĩ, Nĩ ũguo Babuloni, itũũra rĩu inene, rĩgatengemanio na hinya, rĩage gũgacoka kuoneka, o na rĩ.
• 22. Na mũgambo wa ainia a inanda cia mũgeto, na akũi a rũĩmbo, na wa ahuhi a mĩtũrirũ, na ahuhi a macoro, ndũgacoka kũiguwo thĩinĩ waku o na rĩ; nake mũruti wa wĩra wa ũbundi, o ũrĩkũ, gũtirĩ ũgacoka kuoneka thĩinĩ waku o na rĩ; o naguo mũrurumo wa ihiga rĩa gũthĩa ndũgacoka kũiguwo thĩinĩ waku o na rĩ;
• 23. ũtheri wa tawa naguo ndũgacoka gũthera thĩinĩ waku o na rĩ; o naguo mũgambo wa mũhikania na wa mũhiki ndũgacoka kũiguwo thĩinĩ waku o na rĩ; amu ahũri-biacara aku nĩo mararĩ anene a thĩ, amu ndũrĩrĩ ciothe nĩirahĩtithagio nĩ mĩthaiga yaku.
• 24. O na ningĩ thĩinĩ warĩo nĩkuo gwakorirũo thakame ya anabii na ya andũ arĩa aamũre, o na ya andũ arĩa othe maanakĩũragwo gũkũ thĩ.

Home