Go Back

Kũguũrĩrio Chapter 16

• 1. NGĨCOKA ngĩigua mũgambo mũnene woima hekarũ-inĩ, ũkĩĩra araika acio mũgwanja atĩrĩ, Ũkĩrai mũthiĩ, mũkonorerie mbakũri icio mũgwanja cia marakara ma Ngai thĩ.
• 2. Nake ũrĩa wa mbere agĩthiĩ, akĩonoreria mbakũri yake thĩ; ĩgĩgĩtũma andũ magĩe na ironda thũku ii na thĩna mũno, arĩa maarĩ na ruoro rũa nyamũ ĩrĩa na maainamagĩrĩra mũhianano wayo.
• 3. Wa kerĩ nake akĩonoreria mbakũri yake iria-inĩ rĩrĩa inene, narĩo rĩgĩtuĩka thakame ta ya mũndũ mũkuũ; na kĩndũ o gĩothe kĩarĩ muoyo gĩgĩkua, iria ciarĩ thĩinĩ wa iria.
• 4. Wa gatatũ nake akĩonoreria mbakũri yake njũĩ-inĩ na ithima-inĩ cia maĩ, nacio igĩtuĩka thakame.
• 5. Na nĩndaiguire mũraika ũrĩa wa maĩ akiuga atĩrĩ, Wee wĩ wa kĩhooto, o wee ũrĩ ho na nowe warĩ ho, o wee Mũtheru, nĩ ũndũ wa gũtua ũguo;
• 6. amu-rĩ, o, nĩmaaitire thakame ya andũ arĩa aamũre na ya anabii, nawe nĩ thakame wamahe mamĩnyue; na noguo maagĩrĩire.
• 7. Ningĩ ngĩigua kĩgongona kĩoiga, Ĩĩ, nĩguo, Mwathani Ngai, Mwene-Hinya-Wothe, matua maku no ma ma, na ma kĩhooto.
• 8. Wa kana nake akĩonoreria mbakũri yake riũa; narĩo rĩgĩĩtĩkĩrio rĩcinage andũ na mwaki.
• 9. Andũ magĩkĩhĩa nĩ ũrugarĩ mũnene; magakĩrumaga rĩĩtwa rĩa Ngai mwene hinya wa gwatha matũhũhũ macio, na matiigana kwĩrira mamũgooce.
• 10. Wa gatano akĩonoreria mbakũri yake gĩtĩ kĩa ũnene kĩa nyamũ ĩrĩa, kũrĩa yaathanaga gũgĩgĩĩkĩrũo nduma; andũ magagĩtanuka nĩmĩ ciao nĩ ũndũ wa ruo,
• 11. na makarumaga Ngai wa Igũrũ nĩ ũndũ wa maruo marĩa mekũigua na nĩ ũndũ wa ironda ciao; na matiigana kwĩrira nĩ ũndũ wa ciĩko ciao.
• 12. Wa gatandatũ nake akĩonoreria mbakũri yake rũũĩ rũrĩa rũnene, rũrĩa rũĩtagwo Farati; maĩ maruo magĩkĩhũa magĩthira, nĩguo njĩra ĩthondekerũo athamaki arĩa makoima na irathĩro-inĩ rĩa riũa.
• 13. Ningĩ ngĩona maroho matatũ mathũku makiuma kanua ka ndamathia ĩrĩa, na kanua ka nyamũ, na kanua ka mũrathi ũrĩa wa maheni, matariĩ ta ciũra;
• 14. amu macio nĩ maroho ma ndaimono, maringaga ciama; nĩ kuuma moimaga magathiĩ kũrĩ athamaki a mabũrũri mothe, makamonganĩrie mbaara ya mũthenya ũrĩa mũnene wa Ngai, Mwene-Hinya-Wothe.
• 15. (Atĩrĩrĩi, ngũũka ta mũici. Gũkena-rĩ, nĩ ũrĩa ũikaraga ehũgĩte, na amenyereire nguo ciake, ndakae gũthiĩ njaga, na onwo aconoke.)
• 16. Na nĩmaakĩmonganirie kũndũ kũrĩa gwĩtagwo na Kĩhibirania, Hari-Magedoni.
• 17. Nake ũrĩa wa mũgwanja akĩonoreria mbakũri yake kũu rĩera-inĩ igũrũ; na rĩrĩ, hekarũ gũgĩkiuma mũgambo mũnene uumĩte gĩtĩ-inĩ kĩrĩa gĩa ũthamaki, ũkiuga, Ũhoro ũcio nĩwarĩka!
• 18. Gũgĩcoka gũkĩgĩa na heni, na mĩgambo, na marurumĩ; o na gũkĩgĩa gĩthingithia gĩa thĩ kĩnene, gũtarĩ kwagĩa gĩthingithia kĩngĩ kĩnene na kĩĩ hinya takĩo kuuma o rĩrĩa thĩ kwagĩire na andũ.
• 19. Itũũra rĩrĩa inene rĩgĩgĩatũka njatũ ithatũ, o namo matũũra ma ndũrĩrĩ makĩmomoka; itũũra rĩu inene, ti Babuloni, rĩgĩkĩririkanwo maitho-inĩ ma Ngai, rĩkundio gĩkombe kĩrĩa kĩĩ ndibei ĩrĩa ya wĩĩ wa marakara make.
• 20. Nacio ithama ikĩũra ciothe o kũũra; irĩma nacio ikĩaga kũrĩa ciarĩ.
• 21. O na gũkĩgĩa mbura nene ya mbembe, o mbembe ĩigana ta taranda kũritũha, ĩkagũĩra andũ yumĩte igũrũ; andũ magĩkĩruma Ngai nĩ ũndũ wa itũhũhũ rĩu rĩa mbura ya mbembe; amu itũhũhũ rĩu rĩayo rĩarĩ inene mũno.

Home