Go Back

Kũguũrĩrio Chapter 13

• 1. Nayo ĩgĩthiĩ ĩkĩrũgama mũthanga-inĩ wa iria rĩrĩa inene. Ningĩ ngĩona nyamũ ĩkiuma iria thĩinĩ, ĩĩ na hĩa ikũmi na mĩtwe mũgwanja, na hĩa-inĩ ciayo ĩkagĩa na managĩ ma ũnene ikũmi, na mĩtwe yayo ĩĩ na marĩĩtwa ma kũruma Ngai.
• 2. Nayo nyamũ ĩo ndonire yahaanaga ta ngarĩ, na ithu ciayo ciatariĩ ta cia nyamũ ĩĩtagwo nduba, na kanua kayo gakahaana ta kanua ka mũrũthi. Nayo ndamathia ĩkĩmĩhe ũhoti wayo, na gĩtĩ kĩayo gĩa ũthamaki, o na wathani mũnene.
• 3. Na nĩndonire mũtwe ũmwe wayo ta wanaringwo iringa rĩa kĩũrago, na iringwo rĩu rĩaguo rĩa kĩũrago rĩkahona; nakĩo kĩrĩndĩ gĩothe gĩa thĩ gĩkĩmĩrũmĩrĩra kĩgegete nĩyo;
• 4. na nĩgĩathathaiyagia ndamathia, nĩ ũndũ nĩyaheete nyamũ ĩo wathani wayo; o na nyamũ ĩo nayo gĩkamĩthathaiya, gĩkoiga, Nũ ũtariĩ ta nyamũ ĩno? nũ ũngĩhota kũrũa nayo?
• 5. Nayo ĩkĩheo kanua kaaragia maũndũ ma mwĩgerero, o na irumi cia kũruma Ngai, na ĩkĩheo rũtha yathanage mĩeri mĩrongo ĩna na ĩĩrĩ.
• 6. Ĩgĩgĩtumũra kanua kayo ĩrumage Ngai, ĩrumage rĩĩtwa rĩake, o na gĩikaro gĩake, na nĩkĩo arĩa matũũraga Igũrũ.
• 7. Ningĩ ĩgĩĩtĩkĩrio ĩrutĩre andũ arĩa aamũre mbaara, na ĩmahoote; na ĩkĩheo wathani yathage mĩhĩrĩga yothe, o na iruka ciothe, o na mĩario yothe, o na ndũrĩrĩ ciothe.
• 8. Na andũ othe arĩa matũire gũkũ thĩ nĩ kũmĩinamĩrĩra makamĩinamĩrĩra mamĩhoe, mũndũ o wothe-ni ũtaandĩkĩtwo rĩĩtwa rĩake ibuku-inĩ rĩa muoyo, rĩrĩa rĩa Gatũrũme karĩa gatũire ge gathĩnje gwata rĩrĩa thĩ yaambĩrĩirie kũũmbwo.
• 9. Akorũo kwĩ mũndũ ũrĩ gũtũ, kũigua nĩakĩigue.
• 10. Mũndũ angĩkorũo nĩ wa gũtahwo, nĩegũtahwo athiĩ; mũndũ wa kũũragana na rũhiũ, ndarĩ hingo atakoragwo nake na rũhiũ. Hau nĩho harĩonekaga ũkirĩrĩria wa andũ arĩa aamũre, o na wĩtĩkio wao.
• 11. Ngĩcoka ngĩona nyamũ ĩngĩ ĩkiuma na thĩ; nayo yarĩ na hĩa igĩrĩ ta gatũrũme, na kwaria yaaragia ta ndamathia.
• 12. Ĩo nayo ĩgaathanaga na wathani wothe wa nyamũ ĩo ya mbere, ĩrĩ o ho. Na nĩĩtũmaga thĩ na arĩa matũire kuo mainamagĩrĩre mahoyage nyamũ ĩo ya mbere, o ĩo yahonete iringwo rĩayo rĩa kĩũrago.
• 13. Na ĩĩ na ciama nene ĩringaga, gwata gũtũma mwaki uume igũrũ ũũke thĩ andũ makĩonaga.
• 14. Na nĩĩhĩtithagia arĩa matũire gũkũ thĩ nĩ ũndũ wa ciama icio yetĩkĩririo ĩringage harĩ nyamũ ĩo, ĩkera arĩa matũire gũkũ thĩ atĩ mathondekere nyamũ ĩo mũhianano, ĩo yarĩ na iringwo rĩa rũhiũ na ĩkĩhona.
• 15. Ningĩ ĩgĩĩtĩkĩrio ĩwĩkĩre mĩhũmũ, mũhianano ũcio wa nyamũ ĩo, nĩguo mũhianano ũcio wa nyamũ waragie, o na ũtũmage arĩa othe mangĩrega kũinamĩrĩra mũhianano ũcio wa nyamũ moragwo.
• 16. Na nĩĩtũmaga atĩ andũ othe, arĩa anyinyi na arĩa anene, arĩa atongu na arĩa athĩni, eathi o na ngombo, mekĩrũo ruoro guoko kwa ũrĩo, kana thiithi;
• 17. na ningĩ atĩ mũndũ o na ũrĩkũ ndakahote kũgũra kĩndũ kana kwendia kĩndũ, tiga o ũrĩa wĩ na ruoro rũu, na nĩruo rĩĩtwa rĩa nyamũ ĩo kana namba ya rĩĩtwa rĩake.
• 18. Naho haha he na ũũgĩ. Ũrĩa wĩ na ũmenyi, nĩakĩgere namba ya nyamũ ĩo; amu nĩ namba ya mũndũ, na namba yake nĩ Magana matandatũ ma mĩrongo ĩtandatũ na ithathatũ.

Home