Go Back

Kũguũrĩrio Chapter 12

• 1. NINGĨ gũkĩoneka ũrirũ mũnene Igũrũ; na nĩ mũndũ-wa-nja wĩhumbĩte riũa, na akinyĩte mweri na magũrũ make, na akagĩa na thũmbĩ mũtwe ya njata ikũmi na igĩrĩ;
• 2. na aarĩ na ihu, na nĩ gũkaya aakayaga akĩrũmagwo akĩrĩwo nĩ ruo rũa kwenda gũciara.
• 3. Na gũgĩcoka gũkĩoneka ũrirũ ũngĩ igũrũ, na nĩ atĩrĩ, nĩ ndamathia nene, ndune mũno, ĩĩ na mĩtwe mũgwanja na hĩa ikũmi, na mĩtwe yayo igũrũ ĩkagĩa na managĩ mũgwanja ma ũnene.
• 4. Nakĩo gĩthita kĩayo gĩakururĩtie njata cia igũrũ gĩcunjĩ gĩa ithatũ, gĩgĩcirekania thĩ. Nayo ndamathia ĩo ĩkĩrũgama mbere ya mũndũ-wa-nja ũcio wakiriĩ gũciara, nĩguo aaciara, ĩrĩe mwana wake.
• 5. Nake agĩciara mwana wa kahĩĩ, ũrĩa ũkariyĩraga ndũrĩrĩ ciothe na rũthanju rũa kĩgera; na mwana ũcio wake akĩhurio na igũrũ agĩkinyio kwĩ Ngai, o gĩtĩ-inĩ gĩake gĩa ũthamaki.
• 6. Nake mũndũ-wa-nja akĩũra agĩthiĩ werũ-inĩ kũndũ athondekeirũo handũ nĩ Ngai, atĩ onjoragĩrũo kuo matukũ ngiri ya magana merĩ ma mĩrongo ĩtandatũ.
• 7. Na rĩrĩ, gũkĩgĩa mbaara Igũrũ, Mikaeli na araika ake magĩthiĩ kũrũa na ndamathia ĩo; ndamathia o nayo na araika ayo makĩrũa nao;
• 8. na matiigana kwĩhootanĩra, o na matiacokire kuona kũndũ rĩngĩ gwa gũikara kũu Igũrũ.
• 9. Nayo ndamathia ĩo nene ĩkĩharũrũkio, nĩyo nyamũ-ya-thĩ o ĩrĩa ya tene, na noyo ũrĩa wĩtagwo Mũcukani na agetwo Shaitani, ũrĩa ũhĩtithagia kĩrĩndĩ gĩa thĩ gĩothe; agĩkĩharũrũkio o thĩ, o nao araika ake makĩharũrũkanĩrio hamwe nake.
• 10. Na nĩndaiguire mũgambo mũnene Igũrũ, ũkiuga atĩrĩ, Rĩu nĩ gũkinyu kĩhonokanio, na ũhoti, na ũthamaki wa Ngai witũ, o naguo wathani wa Kristo wake; amu-rĩ, mũcuki wa ariũ a Ithe witũ nĩarĩkĩtie kũharũrũkio, ũrĩa ũtũire amacukaga harĩ Ngai witũ mũthenya o na ũtukũ.
• 11. Nao nĩmamũtoretie nĩ ũndũ wa thakame ya Gatũrũme, na nĩ ũndũ wa ciugo cia ũira wao, na nĩmaaregaga kwenda mĩoyo yao o na maatuĩka a gũkua.
• 12. Hakĩrĩ ũguo-rĩ, gĩkenei, Igũrũ rĩrĩ, o na inyuĩ mũtũire kuo! Thĩ ĩĩ na haaro-ĩ, o narĩo iria rĩrĩa inene! amu inyuĩ-rĩ, mũcukani nĩamũikũrũkĩire e na marũrũ manene, tondũ nĩoĩ atĩ no ihinda inyinyi atigairie.
• 13. Nayo ndamathia yakĩona atĩ nĩĩharũrũkĩtio o thĩ, ĩkĩrika kũnyarira mũndũ-wa-nja ũcio waciarire mwana ũcio wa kahĩĩ.
• 14. Nake mũndũ-wa-nja akĩheo mathagu merĩ ma nderi ĩrĩa nene, nĩguo ombũke athiĩ werũ-inĩ akinye handũ hake, harĩa egũtũũra onjoragwo ihinda igima na mahinda merĩ na nuthu ya ihinda, atekuonwo nĩ nyamũ-ya-thĩ ĩo.
• 15. Nayo nyamũ-ya-thĩ ĩkĩborora maĩ na kanua kayo o ta rũũĩ ĩkinyĩrie mũndũ-wa-nja ũcio, nĩguo ĩtũme atwarũo nĩ kĩguũ kĩu.
• 16. Nayo thĩ ĩgĩteithia mũndũ-wa-nja, thĩ-rĩ, ĩgĩathamia kanua kayo, ĩkĩmeria rũũĩ rũu rũabororirũo nĩ ndamathia kanua kayo.
• 17. Nayo ndamathia ĩkĩya kũrakarĩra mũndũ-wa-nja ũcio mũno, ĩgĩthiĩ kũrutĩra rũciaro rũake mbaara rũrĩa rũatigarĩte, arĩa-ni mamenyagĩrĩra maathani na Ngai, na magatũũra magwatĩirie ũira wa Jesu.

Home