Go Back

Kũguũrĩrio Chapter 11

• 1. NGĨCOKA ngĩnengerũo mũrangi wa gũthima ũhaana ta rũthanju, ngĩĩrũo atĩrĩ, Ũkĩra, ũgathime hekarũ ya Ngai, o na kĩgongona nakĩo, na ũgere arĩa marathathaiya Ngai kuo.
• 2. Narĩo itheri rĩrĩa rĩĩ nja ya hekarũ, tigana narĩo ndũkarĩthime, amu nĩrĩrekereirio Ndũrĩrĩ, nacio nĩikarangĩrĩria itũũra rĩrĩa itheru mĩeri mĩrongo ĩna na ĩĩrĩ.
• 3. Na niĩ nĩngetĩkĩria aira arĩa akwa erĩ marathage ũhoro matukũ ngiri ĩmwe na magana merĩ ma mĩrongo ĩtandatũ, mehumbĩte makũnia.
• 4. Acio no-o mĩtamaiyũ ĩrĩa ĩĩrĩ o na mĩtĩ ĩrĩa ĩĩrĩ ya kũhangĩrũo matawa, ĩrĩa ĩrũgamĩte mbere ya Mwathani wa thĩ.
• 5. Na mũndũ o ũrĩkũ enda kũmeka ũũru, mwaki ũkoima tũnua twao, ũkanina thũ icio ciao; na mũndũ o na ũrĩkũ angĩkenda kũmeka ũũru, no nginya oragwo o ũguo.
• 6. O me na ũhoti mahote kũhinga igũrũ, gũtikoire mbura matukũ macio ma ũrathi wao; o na me na ũhoti makahota gwatha maĩ magarũrũke matuĩke thakame, na mahũrage thĩ na itũhũhũ o rĩrĩkũ, o hingo ĩrĩa mangĩenda.
• 7. Na rĩrĩa magakorũo marĩkĩtie kũheana ũira wao, nyamũ ĩrĩa ya kwambata yumĩte irima rĩrĩa rĩtarĩ gĩturi nĩĩkamonia mbaara, ĩmahoote, ĩmorage.
• 8. Nacio ciimba ciao igaikara hau kĩng’aratua-inĩ kĩrĩa kĩrĩ itũũra rĩrĩa inene, rĩrĩa rĩĩtagwo na kĩĩroho atĩrĩ, Sodomu, na rĩgetwo Misiri, na nokuo Mwathani wao aambĩirũo mũtĩ igũrũ.
• 9. Na kĩrĩndĩ kiumĩte iruka-inĩ ciothe na mĩhĩrĩga-inĩ yothe na mĩario-inĩ yothe na ndũrĩrĩ-inĩ ciothe gĩkeroragĩra ciimba icio ciao mĩthenya ĩtatũ na nuthu, na nĩgĩkagiragia ciimba ciao ciigwo mbĩrĩra-inĩ.
• 10. Na andũ arĩa atũũri gũkũ thĩ nĩ kũmarũhĩria makamarũhĩria na magĩe na gĩkeno, o na mateganĩre matega, nĩ ũndũ arathi acio erĩ nĩmaanyariraga andũ a gũkũ thĩ.
• 11. Na mĩthenya ĩo ĩtatũ na nuthu yathira, mĩhehũ ya muoyo ĩkĩmatonya yumĩte kwĩ Ngai, magĩkĩĩrũgamia na magũrũ mao; nao andũ arĩa maameroreire makĩnyitwo nĩ guoya mũnene mũno.
• 12. Magĩcoka makĩigua mũgambo mũnene woima Igũrũ wamera atĩrĩ, Ambatai gũkũ. Magĩkĩambata me itu-inĩ magĩtonya Igũrũ, nacio thũ ciao nĩciameroreire.
• 13. Na thaa o ĩo gũkĩgĩa gĩthingithia kĩnene gĩa thĩ, gĩcunjĩ gĩa ikũmi gĩa itũũra rĩu gĩgĩkĩmomoka, na andũ ngiri mũgwanja makĩũragwo hĩndĩ ya gĩthingithia kĩu; nao arĩa maatigarire magĩĩtigĩra mũno, makĩgooca Ngai ũrĩa wa Igũrũ.
• 14. Haaro ya kerĩ nĩyathira; haaro ĩrĩa ya gatatũ nayo igũũka o narua.
• 15. Mũraika ũrĩa wa mũgwanja nake akĩgambia coro; gũgĩcoka gũkĩgĩa mĩgambo mĩnene Igũrũ, nayo ĩkiuga atĩrĩ, Ũthamaki wa thĩ nĩũrĩkĩtie gũtuĩka wa Mwathani witũ, o na wa Kristo wake, nake egũtũũra athamakaga nginya tene o na tene.
• 16. Nao athuri arĩa mĩrongo ĩĩrĩ na ana, arĩa maikarĩire itĩ ciao cia ũnene mbere-inĩ ya Ngai, makĩĩgũithia thĩ na mothiũ mao, magĩitĩka gũthathaiya Ngai,
• 17. makiuga, Nĩtwagũcokeria ngatho, Mwathani Ngai, wee Mwene-Hinya-Wothe, o wee ũrĩ ho na nowe warĩ o ho; nĩ ũndũ nĩũnyitĩte ũhoti waku mũnene, ũkagwata gũthamaka.
• 18. Ndũrĩrĩ nacio nĩciabucunire, namo marakara maku magĩũka, o nayo hingo ya arĩa akuũ matũirũo cira, na ya kũhe ndungata ciaku, arĩa anabii, ũtungati wao, o nao andũ arĩa aamũre, na arĩa metigĩrĩte rĩĩtwa rĩaku, arĩa anyinyi na arĩa anene; na ya kũnina arĩa monũhaga thĩ.
• 19. Nayo hekarũ ya Ngai ĩkĩhingũrũo, ĩrĩa ĩrĩ Igũrũ; na kũu hekarũ yake thĩinĩ gũkĩoneka ithandũkũ rĩrĩa rĩa kĩrĩkanĩro gĩake; gũgĩcoka gũgĩũka heni na mĩgambo na marurumĩ, na gĩthingithia gĩa thĩ, na mbura nene ya mbembe.

Home