Go Back

1 Johana Chapter 5

• 1. MŨNDŨ o wothe ũrĩa wĩtĩkĩtie atĩ Jesu nĩwe Kristo, nĩaciarĩtwo nĩ Ngai; na mũndũ o wothe wendete mũciari, endete ũrĩa ũciarĩtwo nĩwe o nake.
• 2. Ũndũ ũrĩa tũmenyaga naguo atĩ nĩtwendete ciana cia Ngai nĩ ũyũ: twakorũo twendete Ngai, na tũgekaga maathani make.
• 3. Amu kwenda Ngai nĩ atĩrĩ, nĩ tũmenyagĩrĩre maathani make; namo maathani make matirĩ thĩna.
• 4. Nĩ gũkorũo kĩrĩa gĩothe gĩciarĩtwo nĩ Ngai nĩgĩtoragia ũhoro wa gũkũ thĩ; naguo ũtoria ũrĩa ũtoretie ũhoro wa thĩ nĩ atĩrĩrĩ, nĩ gwĩtĩkia gwitũ.
• 5. Ũrĩa ũtoragia ũhoro wa gũkũ thĩ nũ, tiga ũrĩa wĩtĩkĩtie atĩ Jesu nĩwe Mũriũ wa Ngai?
• 6. We nĩwe wokĩire ũhoro-inĩ wa maĩ na thakame, o we Jesu Kristo; ndokĩire ũhoro-inĩ wa maĩ moiki, okĩire ũhoro-inĩ wa maĩ o na wa thakame. Na Roho nĩwe mũira, nĩ gũtuĩka Roho nĩwe ũhoro-ũrĩa-wa-ma.
• 7. Amu aira nĩ atatũ [Igũrũ, nĩo Ithe witũ, na Ũhoro, na Roho Mũtheru; nao atatũ nĩ ũmwe.
• 8. Gũkũ thĩ nakuo aira nĩ atatũ], Roho, na maĩ, na thakame; nao atatũ marĩ ũhoro o ũmwe.
• 9. Ongorũo nĩtwĩtĩkagĩra ũira wa andũ-rĩ, ũira wa Ngai wĩ bata makĩria; amu ũira wa Ngai nĩ ũyũ, atĩ ũira ũrĩa aheanĩte nĩũkoniĩ Mũriũ.
• 10. Ũrĩa wĩhokete Mũrũ wa Ngai e na ũira ũcio ngoro-inĩ yake; ũrĩa ũtetĩkĩtie Ngai, amũtuĩte wa maheni, nĩ ũndũ ndehokete ũira ũrĩa Ngai aheanĩte ũhoro-inĩ wa Mũriũ.
• 11. Naguo ũira ũcio nĩ atĩrĩ, atĩ Ngai nĩaatũheire muoyo wa tene na tene, naguo muoyo ũcio wĩ thĩinĩ wa Mũrũwe.
• 12. Ũrĩa wĩ nake Mũriũ, e na muoyo ũcio; ũrĩa ũtarĩ nake Mũrũ wa Ngai, ndarĩ naguo, muoyo ũcio.
• 13. Ndamwandĩkĩra maũndũ macio nĩ getha mũmenye mwĩ na muoyo wa tene na tene, o inyuĩ mwĩhokete rĩĩtwa rĩa Mũrũ wa Ngai.
• 14. Naguo ũhoro ũrĩa ũtũmaga tũhote kwerekera kũrĩ we tũũmĩrĩirie nĩ ũyũ, atĩ twahoya ũndũ waganĩrĩire na kwenda gwake, nĩatũiguaga;
• 15. na ongorũo nĩtũũĩ atĩ twahoya ũndũ o ũrĩkũ no atũiguaga-rĩ, nĩtũũĩ atĩ maũndũ macio tũmũhoete tũrĩ ahe.
• 16. Mũndũ angĩona mũrũ wa ithe akĩĩhia rĩĩhia rĩtarĩ rĩa gĩkuũ, nĩahoe, nake Ngai nĩekũmũheera muoyo acio mehagia mehia matarĩ ma gĩkuũ. Nĩkũrĩ wĩhia wa gĩkuũ; ndikuuga akahoe nĩ ũndũ wa ũcio.
• 17. Ũndũ o wothe ũtarĩ wa ũthingu nĩ wĩhia; na kwĩ wĩhia ũtarĩ wa gĩkuũ.
• 18. Nĩtũũĩ atĩ mũndũ o wothe ũrĩa ũciarĩtwo nĩ Ngai ndehagia, ĩndĩ ũrĩa waciarirũo nĩ Ngai nĩamũikaragia, nake ũrĩa mũũru ndangĩmũhutia.
• 19. Nĩtũũĩ ithuĩ tũrĩ a Ngai, nakĩo kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.
• 20. Na nĩtũũĩ atĩ Mũrũ wa Ngai nĩokĩte, na nĩatũheete ũũgĩ tũgagĩkũũrana ũrĩa wa ma; o na twĩ thĩinĩ wake ũcio wa ma, thĩinĩ wa Mũrũwe Jesu Kristo. Ũcio nĩwe Ngai ũrĩa wa ma, o na nowe muoyo wa tene na tene.
• 21. Twana twakwa, wĩmenyagĩrĩrei mĩhianano.

Home