Go Back

1 Johana Chapter 3

• 1. ONEI wendani ũrĩa ũkĩnenehete, ũrĩa Ithe witũ atwendete naguo, atĩ tũtuwo ciana cia Ngai; na nĩguo tũtuĩkĩte. Tondũ ũcio andũ a gũkũ thĩ matitũũĩ, nĩ ũndũ o nake matiamũmenyire.
• 2. Endwa akwa, rĩu tũrĩ ciana cia Ngai, na gũtirĩ kũramenyithanio ũrĩa tũgaikara thutha. Nĩtũũĩ atĩ o rĩrĩa we akonithanio, tũkahaanana nake; nĩ gũkorũo tũkamuona o ũrĩa atariĩ.
• 3. Na mũndũ o wothe ũrĩa ũmwĩrĩgĩrĩire ũguo nĩ gwĩtheria etheragia, o ta ũrĩa we nake atherete.
• 4. Mũndũ o wothe wĩhagia, nĩ kũrega aregete watho; kwĩhia-rĩ, nĩkuo kũrega watho.
• 5. Na inyuĩ nĩmũũĩ atĩ we nĩonithanirio nĩ getha eheranĩrie mehia biũ; na thĩinĩ wake gũtirĩ na wĩhia.
• 6. Mũndũ o wothe ũrĩa ũtũire thĩinĩ wake ndehagia; ũrĩa wĩhagia ndarĩ aamuona, o na ndamũũĩ.
• 7. Twana twakwa, mũtikanareke mũndũ amũhĩtithie, ũrĩa wĩkaga maũndũ ma ũthingu nĩwe mũthingu, o ta ũrĩa we nake e mũthingu;
• 8. ũrĩa wĩhagia nĩ wa mũcukani, amu mũcukani atũire ehagia kuuma o kĩambĩrĩria. Ũndũ ũrĩa watũmire Mũrũ wa Ngai onithanio nĩ rĩrĩ, nĩ getha atharũrie wĩra wa mũcukani.
• 9. Mũndũ o wothe ũrĩa ũciarĩtwo nĩ Ngai ndehagia, nĩ ũndũ mbeũ yake nĩĩtũũraga thĩinĩ wake, na ndangĩhota kwĩhia, nĩ ũndũ nĩaciarĩtwo nĩ Ngai.
• 10. Ciana cia Ngai nĩho imenyekagĩra, o na ciana cia mũcukani nacio: mũndũ o wothe ũrĩa ũtekaga maũndũ ma ũthingu, ũcio ti wa Ngai, o na kana ũrĩa ũtenda mũrũ wa ithe.
• 11. Amu ũhoro ũrĩa mwarutirie kũigua o kĩambĩrĩria nĩ ũyũ, atĩ twendane;
• 12. na tũtigatuĩke ta Kaini ũrĩa warĩ wa ũrĩa mũũru, na akĩũraga mũrũ wa nyina. Nake aamũũragire nĩ ũndũ kĩ? To ũndũ maũndũ marĩa ekaga maarĩ moru, na ma mũrũ wa nyina maarĩ mega?
• 13. Ariũ a Awa, mũtikagege kĩrĩndĩ gĩa gũkũ thĩ kĩamũthũũra.
• 14. Ithuĩ nĩtũũĩ nĩtũrĩkĩtie gũkĩra, tũkoima gĩkuũ-inĩ tũgatonya muoyo-inĩ, nĩ ũndũ nĩtwenda ariũ a Ithe witũ. Ũrĩa ũtendanaga atũire o gĩkuũ-inĩ.
• 15. Mũndũ o wothe ũthũire mũrũ wa ithe nĩ mũũragani, na inyuĩ nĩmũũĩ atĩ gũtirĩ mũũragani ũtũirie muoyo wa tene na tene thĩinĩ wake.
• 16. Ũndũ ũrĩa ũtũmenyithĩtie wendani ũrĩa ũhaana nĩ ũyũ, atĩ we nĩaarutire muoyo wake nĩ ũndũ witũ; na ithuĩ nĩtwagĩrĩirũo nĩ kũruta mĩoyo iitũ nĩ ũndũ wa ariũ a Ithe witũ.
• 17. No rĩrĩ, mũndũ wĩ na indo cia gũkũ thĩ, na akona mũrũ wa ithe athĩnĩte, akarega kũmũiguĩra tha, ũcio-rĩ, agĩtũire endete Ngai na njĩra ĩrĩkũ?
• 18. Twana twakwa, nĩtũtigage kwendana na ciugo kana na kanua gatheri; nĩtwendanage na ciĩko o tũkĩendanaga na ma.
• 19. Ũguo nĩguo tũrĩmenyaga tũrĩ a ũhoro-ũrĩa-wa-ma, na twĩninage nganja ngoro, twĩ mbere yake,
• 20. o harĩa hothe ngoro ciitũ ingĩtũcuka; nĩ ũndũ Ngai nĩ mũnene kwĩ ngoro ciitũ, agakĩmenya maũndũ mothe.
• 21. Endwa akwa, ngoro ciitũ ciaaga gũtũcuka-rĩ, tũrĩhotaga kwerekera harĩ Ngai tũũmĩrĩirie;
• 22. naguo ũndũ o ũrĩa twahoya, nitũrĩheagwo nĩwe, nĩ ũndũ nĩtũmenyagĩrĩra maathani make, na tũgekaga maũndũ marĩa onaga me mega.
• 23. Narĩo rĩathani rĩake nĩ atĩrĩ, atĩ twĩhoke rĩĩtwa rĩa Mũriũ Jesu Kristo, na twendanage, o ta ũrĩa aatwathire.
• 24. Nake ũrĩa ũmenyagĩrĩra maathani make nĩatũũrega thĩinĩ wake, o nake agatũũra thĩinĩ wa ũcio. Naguo ũndũ ũrĩa tũmenyaga naguo atĩ nĩatũire thĩinĩ witũ nĩ ũyũ: nĩ ũndũ wa Roho ũrĩa aatũheire.

Home