Go Back

2 Petero Chapter 3

• 1. ENDWA akwa, maya nĩmo marũa ma kerĩ ndĩramwandĩkĩra; na thĩinĩ wamo o merĩ ndĩramwarahũra meciria-inĩ manyu matarĩ na ũhinga, nĩguo ndĩmũririkanie ũhoro:
• 2. naguo nĩ ũyũ, atĩ mũririkanage ciugo iria ciaaririo o mbere nĩ anabii arĩa atheru, o na rĩathani rĩa Mwathani, o we Mũhonokia witũ, rĩrĩa, mwarutirũo nĩ atũmwo arĩa mwatũmĩirũo.
• 3. Na mbere ndaya menyai atĩrĩ, atĩ matukũ marĩa ma kũrigĩrĩria nĩgũgoka andũ anyũrũrania me na kĩnyũrũri, na marũmanagĩrĩre na merirĩria mao moru,
• 4. na moranagie atĩrĩ, Kaĩ kĩĩranĩro gĩa gũcoka gwake gĩgakinya-rĩ? Nĩ ũndũ kuuma o hĩndĩ ĩrĩa maithe maitũ maakomire-rĩ, maũndũ mothe matũire o ta ũrĩa maatariĩ kuuma o rĩrĩa thĩ yombirũo.
• 5. Ũndũ ũrĩa meriganĩirie o makĩmenyaga nĩ atĩ o tene, nĩ ũndũ wa kiugo kĩrĩa kĩoigirũo nĩ Ngai, nĩkwagĩire kũrĩa gwĩtagwo Igũrũ, o na thĩ ĩgwatanĩtio na maĩ, ĩgaikara ĩrigicĩirio nĩ maĩ;
• 6. ningĩ atĩ nĩ ũndũ wa maĩ macio, thĩ ĩrĩa yarĩ kuo hĩndĩ ĩo nĩyatomire nĩ ũndũ wa kũhumbwo nĩ maĩ.
• 7. No rĩrĩ, Igũrũ rĩrĩa rĩĩ ho rĩu, o na thĩ, nĩ kũigĩrũo ciigĩirũo mwaki, nĩ ũndũ wa kiugo o ro kĩu, igagĩeterera mũthenya ũrĩa wa cira, o na wa kũninwo kwa andũ arĩa matetigagĩra Ngai.
• 8. No rĩrĩ, endwa akwa, mũtikanariganĩrũo nĩ ũndũ ũyũ ũmwe, atĩ kũrĩ Mwathani mũthĩ ũmwe no ta mĩaka ngiri, o na mĩaka ngiri no ta mũthenya ũmwe.
• 9. Ha ũhoro wa kũhingia kĩĩranĩro gĩake-rĩ, Mwathani ndatithagia ta ũrĩa andũ amwe megereirie atĩ nĩatithagia; no gũkirĩrĩria amũkiragĩrĩria ategũthethũka, nĩ ũndũ ndendaga mũndũ o na ũmwe ore, no atĩ othe matuĩke a kwĩrira.
• 10. No rĩrĩ, mũthenya ũrĩa wa Mwathani nĩũgoka o ta mũici, naguo mũthenya ũcio-rĩ, nĩguo Igũrũ rĩkarindũka na mũrurumo mũnene, nacio ciũmbe iria itũire igũrũ nĩikahĩa nĩ mwaki mũnene ithire, nayo thĩ o na indo ciothe iria ithondeketwo kuo nĩigacinwo biũ.
• 11. Kuona atĩ indo icio ciothe itirĩ hingo itagathira ũguo-rĩ, inyuĩ mwagĩrĩirũo nĩ gũikara na mĩikarĩre ĩtariĩ atĩa, ũhoro-inĩ wa mĩtũũrĩre ya ũtheru, na ya kwĩamũrĩra Ngai,
• 12. mũgĩtanyaga na mũkĩĩriragĩria mũno mũthenya ũcio wa Ngai ũgĩgakinya? Naguo wakinya-rĩ, nĩrĩo Igũrũ rĩkagwatio mwaki rĩthire, nacio ciũmbe iria itũire igũrũ ihĩe nĩ mwaki mũnene itweke.
• 13. Ĩndĩ kũringana na ũrĩa eranĩire, nĩ gũtanya tũtanyaga kuona Igũrũ rĩerũ o na thĩ njerũ, o kuo kũrĩa gũtũũraga ũthingu.
• 14. Hakĩrĩ ũguo-rĩ, endwa akwa, kuona atĩ nĩmũtanyaga kuona maũndũ macio, ĩkagĩrai kĩyo nĩ getha mũgakorũo mũrĩ na thayũ, na mũtarĩ na kĩmeni ngoro o na kana ũcuke mũkĩonagwo nĩwe.
• 15. Ningĩ tuai atĩ ũrĩa Mwathani witũ atũire akiragĩrĩria, nĩguo ũtũmaga mũhonokio. Ũguo noguo mũrũ wa Ithe witũ Paulo, ũrĩa twendete mũno, o nake aamwandĩkĩire, kũringana na ũũgĩ ũrĩa aaheetwo;
• 16. O na marũa-inĩ make mothe aheanĩte ũhoro wa maũndũ macio. Na marũa-inĩ macio-rĩ, nĩkũrĩ maũndũ mamwe marĩ na hinya makĩiguĩka, na nĩmo andũ arĩa matarutĩtwo, na arĩa matakindagĩria wega, mogomagia o ta ũrĩa mogomagia Maandĩko marĩa mangĩ o namo, makĩĩgĩragĩrĩra ũhoro wa kũninwo.
• 17. Nĩ ũndũ ũcio, inyuĩ endwa akwa, tondũ nĩmũkĩmenyete maũndũ macio o mbere, wĩmenyererei mũtikagũe, mũtigane na ũhoro wanyu wa gũkindĩria nĩ ũndũ wa gũtwarĩrĩrio nĩ ũhoro ũrĩa mũhĩtanu wa andũ arĩa matarĩ ngererero.
• 18. Ĩndĩ kũrakũrai mũgĩtugagwo na Wega wa Mwathani witũ na Mũtũhonokia Jesu Kristo, o na mũkĩongagĩrĩrũo kũmenyana nake. Nake arotũũra e na riri, rĩu o na nginya tene na tene. Amen.

Home