Go Back

1 Petero Chapter 2

• 1. HAKĨRĨ ũguo-rĩ, eheriai waganu wothe, na wara wothe, na ũhinga na rũitho, na gũcambania o guothe,
• 2. na mũtuĩke o tũkenge, mwĩriragĩrie iria rĩrĩa rĩa kĩĩroho, o rĩrĩa rĩtheru, nĩ getha mũkũrakũragio nĩrĩo mũgakĩhonokio:
• 3. mũngĩkorũo nĩmũcamĩte mũkona atĩ Mwathani nĩ mũtugi.
• 4. Ũkani kũrĩ we, o ũrĩa ũrĩ Ihiga rĩĩ muoyo; narĩo nĩ kũregwo rĩregetwo nĩ andũ, no harĩ Ngai nĩ rĩthure na rĩgatuwo rĩa goro;
• 5. na inyuĩ-rĩ, ta mũrĩ mahiga marĩ muoyo, ikaragai mũgĩakagwo nyũmba ya kĩĩroho, o nginya mũtuĩke thiritũ theru ya athĩnjĩri-Ngai, nĩ getha mũkarutage magongona ma kĩĩroho marĩa mangĩĩtĩkĩrĩka nĩ Ngai nĩ ũndũ wa Jesu Kristo.
• 6. Nĩ ũndũ thĩinĩ wa Maandĩko nĩharĩ ciugo ici, Atĩrĩrĩ, nĩngũiga kũrĩa Zayuni ihiga rĩnene rĩa koine, rĩĩ rĩthure na rĩĩ goro: Na o mũndũ ũrĩa ũrĩkoragwo amwĩhokete ndagaconorithio.
• 7. Nĩ ũndũ wa ũguo-rĩ, nĩ harĩ inyuĩ arĩ goro, o inyuĩ mwĩtĩkĩtie; ĩndĩ arĩa matetĩkĩtie-rĩ, ũhoro wao nĩ ũyũ, atĩrĩ, Ihiga rĩrĩa rĩaregirũo nĩ aaki Nĩrĩo rĩatuĩkire o rĩrĩa inene rĩa koine;
• 8. na ningĩ ũũ, Ihiga rĩa kũgũithania, o na rũaro rũa ihiga rĩa kũhĩngithania. Amu nĩ kũgũithio magũithagio nĩ Ũhoro nĩ ũndũ wa ũrĩa maremete: na noguo maathĩrĩirio.
• 9. No inyuĩ mũrĩ rũruka rũthurĩtwo, na thiritũ ya athĩnjĩri Ngai ya nyũmba ya mũthamaki, ningĩ mũrĩ rũrĩrĩ rũtheru, o andũ matuĩkĩte a Ngai kĩũmbe; nĩ getha mũhunjanagĩrie mawega make, we wamwĩtire muume nduma-inĩ mũtonye ũtheri-inĩ wake ũrĩa wa magegania.
• 10. Kwĩ hingo mũtaarĩ rũrĩrĩ kũrĩ, no rĩu mwĩ rũrĩrĩ rũa Ngai: nĩ kwaga mwaagĩte kũiguĩrũo tha, no rĩu nĩ kũiguĩrũo mũiguĩrĩirũo tha.
• 11. Endwa akwa, nĩndamũthaitha, mũkĩrĩ o ageni na agendi, atĩ mũtigane na merirĩria marĩa moru ma mwĩrĩ, marĩa marũaga na roho,
• 12. na mũtũũre na mĩtũũrĩre mĩagĩrĩru, mũikaranĩtie na andũ a Ndũrĩrĩ iria itoĩ Ngai, nĩguo atĩ, o na harĩa mamũigagĩrĩra igenyo ta mũrĩ eki ũũru-rĩ, macoke gũkumagia Ngai mũthenya wakinya ũrĩa agoka kũmarora, nĩ ũndũ wa mawĩra manyu mega marĩa meonagĩra.
• 13. Athĩkagai tondũ wa Mwathani nĩ ũndũ o wothe mũtabarĩre nĩ andũ: o na wakorũo nĩ wa mũthamaki, arĩ we mũnene igũrũ rĩa arĩa angĩ othe,
• 14. O na kana watuĩka nĩ wa abarũthi, kuona nĩo matuĩtwo nĩwe maherithagie arĩa mekaga ũũru, o na magathage arĩa mekaga wega.
• 15. Tondũ ũrĩa Ngai endaga nĩ rĩrĩ, atĩ nĩ ũndũ wa gwĩkaga wega, mũkirie tũnua twa irimũ iria itarĩ ũndũ ciũĩ.
• 16. Ikaragai mũtarĩ ngombo, ĩndĩ mũtikanareke ũhoro ũcio wa gũikara mũtarĩ ngombo ũtuĩke wa kũhithĩrĩra waganu, no mũikarage mũrĩ ngombo cia Ngai.
• 17. Tĩagai andũ othe. Endagai ariũ othe a Ithe witũ. Wĩtigagĩrei Ngai. Tĩagai mũthamaki.
• 18. Inyuĩ ndungata cia mũciĩ-rĩ, athĩkagai nĩ aathani anyu, mũkĩmatĩaga mũno, na to arĩa ega na ahoreri oiki, o na arĩa eĩ o nao.
• 19. Amu ũndũ ũyũ nĩguo wĩ ngatho, atĩ mũndũ akiragĩrĩrie maũndũ ma kũmũiguithia kĩeha o akĩnyariragwo tũhũ, nĩ ũndũ wa ũrĩa ekĩrĩire Ngai na thamiri yake.
• 20. Amu-rĩ, mũngĩĩka ũũru, na mũhũrĩrũo ũũru ũcio mũkirĩrĩirie-rĩ, kaĩ mũngĩkĩgathwo nĩ ũndũ kĩ? Ĩndĩ mũngĩĩka wega, na mũnyarirĩrũo wega ũcio mũkirĩrĩirie-rĩ, ũndũ ũcio nĩũrĩ ngatho harĩ Ngai.
• 21. Tondũ ũguo nĩguo mwĩtĩirũo: nĩ gũkorũo Kristo o nake nĩanyarirĩkire ithenya rĩanyu, nĩ getha ũrĩa aatigire eka ũtuĩke wa kũmuonereria ũrĩa mũngĩkinyaga o makinya-inĩ make.
• 22. Nake ndaigana kwĩhia, o na kana agĩkorũo akĩaria maũndũ ma wara na kanua gake:
• 23. nake rĩrĩa aarumagwo ndaigana kwĩrumĩra: na rĩrĩa aanyarirĩkaga, ndehĩtanagĩra, no kwĩneana eneanaga kũrĩ ũrĩa ũtuaga cira na kĩhooto.
• 24. Nake nĩaakuuire mehia maitũ we mwene mwĩrĩ-inĩ wake e mũtĩ igũrũ, nĩ getha ithuĩ tũkorũo tũkuĩte ha ũhoro wa mehia tũgatigana namo, tũcoke tũtũũre muoyo twĩkaga o maũndũ ma ũthingu; nayo mĩtunda ĩrĩa aahũrirũo nĩyo yatũmire mũhone.
• 25. Nĩ gũkorũo nĩ gũturura mwatururaga ta mbũri; no rĩu mũrĩ acokereru ũrĩa Mũrĩithi na Mũrori wa mĩoyo yanyu.

Home