Go Back

Joshua Chapter 4

• 1. Na gũgĩkinya atĩrĩ, atĩ hĩndĩ ĩrĩa andũ othe a rũrĩrĩ rũu maaringire Jorodani magĩthirĩrĩkĩra-rĩ, Jehova akĩarĩria Joshua, akĩmwĩra atĩrĩ,
• 2. Wĩoerei andũ ikũmi na erĩ thĩinĩ wa andũ aya, mathurĩtwo mĩhĩrĩga-inĩ, o mũhĩrĩga mũndũ ũmwe,
• 3. mũcoke mũmaathe mũmere atĩrĩ, Oyai mahiga ikũmi na merĩ, o hau gatagatĩ ka Jorodani, o handũ harĩa athĩnjĩri-Ngai mekũrũgamĩte mehandĩte ki, mũmakuue mũringe namo mũrĩmo, mũkamaige kĩraaro-inĩ kĩanyu harĩa mũrĩraara ũtukũ ũyũ.
• 4. Hĩndĩ ĩo Joshua agĩgĩĩta andũ ikũmi na erĩ a ciana cia Isiraeli, o acio aathagathagĩte mathurĩtwo mĩhĩrĩga-inĩ, o mũhĩrĩga mũndũ ũmwe;
• 5. nake Joshua akĩmera atĩrĩ, Thiĩi mbere ya ithandũkũ rĩa Jehova Ngai wanyu, mũkinye Jorodani gatagatĩ, na inyuothe, mũndũ o mũndũ, o ta ũrĩa mĩhĩrĩga ya ciana cia Isiraeli ĩtariĩ, oe ihiga rĩmwe, arĩigĩrĩre kĩande, aringe mũrĩmo narĩo;
• 6. nĩguo ũndũ ũcio ũtuĩke kĩmenyithia harĩ inyuĩ, nĩ getha mahinda marĩa magoka, rĩrĩa ciana cianyu ikoria atĩrĩ, Ĩ mũkuona gĩtũmi kĩa mahiga maya arĩ kĩ?
• 7. Mũgagĩciĩra atĩrĩ, Gĩtũmi kĩamo nĩ rĩrĩ, nĩ atĩ maĩ ma Jorodani nĩmaatinĩkĩire mbere ya ithandũkũ rĩa kĩrĩkanĩro kĩa Jehova; o hĩndĩ ĩrĩa rĩaringaga Jorodani-rĩ, maĩ macio ma Jorodani nĩ gũtinĩka maatinĩkire; namo mahiga maya marĩtuĩkaga kĩririkania gĩa kũririkanagia ciana cia Isiraeli ũhoro ũcio tene na tene.
• 8. Nacio ciana cia Isiraeli igĩĩka o ta ũguo, o ta ũrĩa Joshua aathanĩte; igĩkĩoya mahiga ikũmi na merĩ, o kũu Jorodani gatagatĩ, o ta ũrĩa Jehova aathĩte Joshua, o na ta ũrĩa mĩhĩrĩga ya ciana cia Isiraeli yaiganaga ĩgĩtarũo; nacio igĩkuua mahiga macio igĩthiĩ namo o handũ harĩa ciathiire kũraara, igĩkĩmaiga ho.
• 9. Ningĩ Joshua akĩhanda mahiga ikũmi na merĩ, akĩmaiganĩrĩra o gatagatĩ ka Jorodani, o handũ harĩa magũrũ ma athĩnjĩri-Ngai acio maakuuĩte ithandũkũ rĩa kĩrĩkanĩro maakinyĩte; namo matũire ho o na ũmũthĩ.
• 10. Nĩ gũkorũo athĩnjĩri-Ngai acio maakuuĩte ithandũkũ rĩu, maarũgamire o gatagatĩ ka Jorodani, o nginya hĩndĩ ĩrĩa maũndũ mothe maarĩkirie gwĩkwo, o marĩa Jehova aathĩte Joshua, akĩmwĩra aarĩrie andũ ũhoro wamo, o ta ũrĩa maũndũ mothe maatariĩ marĩa Musa aathire Joshua mekwo; nao andũ acio makĩhiũhahiũha, makĩringa mũrĩmo.
• 11. Na gũgĩkinya atĩrĩ, atĩ hĩndĩ ĩrĩa andũ acio othe maarĩkirie kũringa mũrĩmo, magĩthirĩrĩkĩra-rĩ, ithandũkũ rĩa Jehova o narĩo rĩkĩringa, o nao athĩnjĩri-Ngai makĩringa makĩonagwo nĩ andũ othe.
• 12. Nacio ciana cia Reubeni, o na ciana cia Gadi, o na nuthu ĩo ya mũhĩrĩga wa Manase, ikĩringa mũrĩmo ciĩohete indo ciacio cia ita, ituĩke ngerewani ya ciana cia Isiraeli, o ta ũrĩa Musa aaciĩrĩte ciĩke;
• 13. igĩkĩringa mũrĩmo ikĩonagwo nĩ Jehova ciĩthagathagĩte, na ikeoha indo ciacio cia ita, irĩ ta andũ ngiri mĩrongo ĩna, nacio igĩkinya o werũ-inĩ wa kũu Jeriko.
• 14. Naguo mũthenya o ro ũcio, Jehova akĩneneheria Joshua maitho-inĩ ma Aisiraeli othe; nao magĩkĩmwĩtigĩra o ta ũrĩa metigĩrĩte Musa matukũ mothe marĩa aatũũrire muoyo.
• 15. Nake Jehova akĩarĩria Joshua, akĩmwĩra atĩrĩ,
• 16. Athana wĩre athĩnjĩri-Ngai, acio makuuĩte ithandũkũ rĩa ũira, maambate moime Jorodani.
• 17. Tondũ ũcio Joshua agĩgĩatha athĩnjĩri-Ngai akiuga atĩrĩ, Ambatai muume Jorodani.
• 18. Na gũgĩkinya atĩrĩ, atĩ hĩndĩ ĩrĩa athĩnjĩri-Ngai acio maakuuĩte ithandũkũ rĩrĩa rĩa kĩrĩkanĩro kĩa Jehova maambataga moimĩte kũu Jorodani gatagatĩ, namo makinya ma magũrũ mao magĩkinya o igũrũ hũgũrũrũ-inĩ kũrĩa kwarĩ thĩ nyũmũ-rĩ, hĩndĩ o ĩo maĩ macio ma Jorodani magĩcoka handũ hamo, namo makĩiyũra magĩkĩra hũgũrũrũ-inĩ ciaruo ciothe, o ta ũrĩa maatariĩ mbere.
• 19. Nao andũ acio maambatire makiuma hau Jorodani mũthenya wa ikũmi wa mweri wa mbere; magĩkĩamba hema ciao mwena wa irathĩro wa Jeriko, o kũu Giligali.
• 20. Namo mahiga ikũmi na merĩ macio maarutire Jorodani, Joshua akĩmahanda akĩmaiganĩrĩra o kũu Giligali.
• 21. Nake akĩarĩria ciana cia Isiraeli, agĩciĩra atĩrĩ, Hĩndĩ ĩrĩa ciana cianyu ikoria maithe ma cio matukũ marĩa magoka atĩrĩ, Ĩ gĩtũmi kĩa mahiga maya nĩ kĩ?
• 22. hĩndĩ ĩo nĩmũkamenyithia ciana cianyu ũhoro ũyũ, mũciĩre atĩrĩ, Isiraeli aaringire rũũĩ rũrũ rũa Jorodani, rũhũĩte rũgatuĩka thĩ nyũmũ.
• 23. Nĩ ũndũ Jehova Ngai wanyu nĩaahũithirie maĩ ma Jorodani makĩmweherera, o nginya hĩndĩ ĩrĩa mwakorirũo mũringĩte, o ta ũrĩa Jehova Ngai wanyu ekire Iria Itune, o rĩrĩa aahũithirie rĩgĩtweherera, o nginya rĩrĩa twakorirũo tũringĩte;
• 24. nĩ getha ndũrĩrĩ ciothe cia thĩ imenye atĩ guoko kwa Jehova kwĩ hinya mũno; nĩguo itũũre ciĩtigĩrĩte Jehova Ngai wanyu tene na tene.

Home