Go Back

Joshua Chapter 18

• 1. Nakĩo kĩrĩndĩ gĩothe gĩa ciana cia Isiraeli gĩkĩũngana Shilo, gĩgĩkĩamba Hema-ya-gũtũnganwo, tondũ bũrũri ũcio nĩwarĩkĩtie gũtorio nĩkĩo.
• 2. No nĩgwatigarĩte mĩhĩrĩga mũgwanja thĩinĩ wa ciana cia Isiraeli ĩtagaĩirũo igai rĩayo.
• 3. Nake Joshua agĩkĩĩra ciana cia Isiraeli atĩrĩ, Nĩ nginya hĩndĩ ĩ mũgũtũũra mwĩ na thiea wa gũthiĩ gũtonya bũrũri ũrĩa Jehova, Ngai wa maithe manyu, aamũheire, mũwĩgwatĩre ũtuĩke wanyu?
• 4. Wĩthurĩrei andũ atatũ thĩinĩ wa mũhĩrĩga o mũhĩrĩga; na niĩ ndĩmarekie mokĩre mathiĩ bũrũri wothe, maũtuĩrie wega maandĩke ũhoro waguo wa ũrĩa ũngĩgayũo, na thutha wa ũguo macoke moke kũrĩ niĩ.
• 5. Nao maũgayanie icunjĩ mũgwanja, nake Juda aikare mũhaka-inĩ wake kũu mwena wa gũthini; o nayo nyũmba ya Jusufu ĩikare mũhaka-inĩ wayo kũu mwena wa gathigathini.
• 6. Na mwarĩkia gũtuĩria ũhoro wa bũrũri ũcio mwandĩke ũrĩa ũngĩgayũo icunjĩ mũgwanja-rĩ, mũcoke mũndehere ũhoro ũcio mwandĩkĩte, na niĩ ndĩkĩmũcukĩre mĩtĩ gũkũ mbere ya Jehova Ngai witũ.
• 7. Tondũ Alawii matirĩ na gĩcunjĩ kĩao thĩinĩ wanyu, nĩ gũkorũo igai rĩao nĩ ũruti wa wĩra wa Jehova wa ũthĩnjĩri-Ngai; nao Gadi na Reubeni, na nuthu ya mũhĩrĩga wa Manase, nĩmarĩkĩtie kũgwata igai rĩao rĩrĩa Musa, ndungata ya Jehova, yamaheire mũrĩmo ũcio ũngĩ wa Jorodani, mwena wa irathĩro.
• 8. Nao andũ acio magĩgĩũkĩra magĩthiĩ; nake Joshua agĩkorũo aathĩte andũ acio maathiaga akamera maandĩke ũhoro wa ũrĩa thĩ ĩo ĩtariĩ, agĩkiuga atĩrĩ, Thiĩi mũcange bũrũri ũcio wothe mũtuĩrie ũhoro waguo mũwandĩke, mũcoke mũũke gũkũ kũrĩ niĩ, na niĩ ndĩmũcukĩre mĩtĩ gũkũ Shilo mbere ya Jehova.
• 9. Nao andũ acio magĩgĩthiĩ makĩgera thĩ ĩo yothe, magĩtuĩria ũhoro wayo, makĩwandĩka ibuku-inĩ o ta ũrĩa matũũra maguo maatariĩ, maũgaĩte icunjĩ mũgwanja, magĩgĩcoka he Joshua kĩraaro-inĩ gĩake kũu Shilo.
• 10. Nake Joshua agĩkĩmacukĩra mĩtĩ o kũu Shilo, mbere ya Jehova; nakuo kũu nĩkuo Joshua aagayanĩirie ciana icio cia Isiraeli bũrũri ũcio o ta ũrĩa ciaamũkanĩte.
• 11. Na rĩrĩ, ũhoro-inĩ ũcio wa gũcuka mĩtĩ-rĩ, nĩ mũhĩrĩga wa ciana cia Benjamini waambire kũgũĩrũo nĩguo, o ta ũrĩa mbarĩ ciaguo ciatariĩ; naguo bũrũri ũrĩa wacigũĩrĩire ũkĩgĩa gatagatĩ ga ciana cia Juda na ciana cia Jusufu.
• 12. Naguo mũhaka wacio wa mwena wa gathigathini warutĩtio Jorodani; ningĩ mũhaka ũcio ũkĩambatĩra mwena wa gathigathini wa Jeriko ũgĩtuĩkanĩria bũrũri ũrĩa wĩ irĩma nyingĩ mwena wa ithũĩro; nayo nyumĩrĩra yaguo yarĩ werũ-inĩ wa Bethi-aveni.
• 13. Ningĩ mũhaka ũcio woima hau ũkĩhungura ũgĩkinya Luzu, ũgereire mwena wa gũthini wa kũu Luzu (na norĩo Beth-eli); ningĩ mũhaka ũcio ũgĩikũrũka ũgĩkinya Atarothu-adari, gũkuhĩ na kĩrĩma kĩrĩa kĩrĩ mwena wa gũthini wa itũũra rĩa Bethi-horoni ya mũhuro.
• 14. Naguo mwena wa ithũĩro mũhaka ũcio ũgĩkururũo, ũgĩthiĩ ũrigicũkĩte ũrorete gũthini, uumĩte kĩrĩma-inĩ kĩrĩa kĩng’etheire itũũra rĩu rĩa Bethi-horoni mwena wa gũthini; nayo nyumĩrĩra yaguo yarĩ o kũu Kiriathu-baali, itũũra rĩa ciana cia Juda (na norĩo Kiriathu-jearimu); mwena ũcio wa ithũĩro-rĩ, ũguo nĩguo watariĩ.
• 15. Naguo mwena wa gũthini warutĩtio o gĩturi-inĩ gĩa Kiriathu-jearimu, naguo mũhaka ũcio ũgĩthiĩ ũrorete ithũĩro, ũgĩgĩthiĩ kuumĩrĩra gĩthima-inĩ kĩa maĩ ma Nefitoa;
• 16. ningĩ mũhaka ũcio ũgĩikũrũka ũgĩkinya o mũthia-inĩ wa kĩrĩma kĩrĩa kĩng’etheire mũkuru wa mũrũ wa Hinomu, gĩtuamba-inĩ kĩa Refaimu, mwena ũrĩa ũrorete gathigathini; ũgĩikũrũka o ro ũguo, ũgĩkinya mũkuru-inĩ ũcio wa Hinomu, mwena wa gũthini wa Ajebusi, ũgĩikũrũka ũgĩkinya Enirogeli;
• 17. ningĩ mwena wa gathigathini, mũhaka ũcio ũgĩkururũo ũgĩkinya Eni-shemeshi, ũgĩthiĩ kuumĩrĩra Galilothu, itũũra rĩrĩa rĩng’etheire rĩambatĩrĩro rĩa Adumimu; ũgĩgĩikũrũka ũgĩkinya ihiga-inĩ rĩa Bohani wa Reubeni;
• 18. ũgĩgĩtuĩkanĩria rũgongo rũrĩa rũng’etheire Araba, mwena wa gathigathini, ũgĩikũrũka ũgĩkinya Araba;
• 19. ningĩ mũhaka ũcio ũkĩhungurĩra mwena-inĩ wa gathigathini wa Bethi-hogila; nayo nyumĩrĩra ya mũhaka ũcio ĩkĩgĩa gĩcongoco-inĩ kĩa mwena wa gathigathini wa Iria rĩa Cumbĩ, mũthia-inĩ wa gũthini wa Jorodani; ũcio nĩguo mũhaka wa mwena wa gũthini.
• 20. Naruo rũũĩ rũa Jorodani nĩruo mũhaka waguo wa mwena wa irathĩro. Bũrũri ũcio nĩguo wagairũo nĩ ciana cia Benjamini o ta ũrĩa mĩhaka yaguo ĩũrigicĩirie mĩena yothe, o ta ũrĩa mbarĩ ciacio ciatariĩ.
• 21. Na rĩrĩ, matũũra ma mũhĩrĩga ũcio wa ciana cia Benjamini, o ta ũrĩa mbarĩ ciaguo ciatariĩ, maarĩ Jeriko, na Bethi-hogila, na Emeki-keziza;
• 22. na Bethi-araba, na Zemaraimu, na Beth-eli;
• 23. na Avimu, na Para, na Ofira;
• 24. na Kefari-Amoni, na Ofini, na Geba; nĩ matũũra ikũmi na merĩ, o na tũtũũra twamo;
• 25. ningĩ nĩ Gibeoni, na Rama, na Beerothu;
• 26. na Mizipe, na Kefira, na Moza;
• 27. na Rekemu, na Iripeeli, na Tarala;
• 28. na Zela, na Elefu, o na kwa Ajebusi (na nokuo Jerusalemu), na Gibeathu, na Kiriathu; nĩ matũũra ikũmi na mana, o na tũtũũra twamo. Rĩu nĩrĩo igai rĩa ciana cia Benjamini, o ta ũrĩa mbarĩ ciacio ciatariĩ.

Home