Go Back

Joshua Chapter 14

• 1. Namo maya nĩmo mabũrũri marĩa ciana cia Isiraeli ciagwatire matuĩke igai rĩacio bũrũri wa Kanaani, o ta ũrĩa Eleazaru mũthĩnjĩri-Ngai, na Joshua wa Nuni, o na anene a nyũmba cia maithe ma mĩhĩrĩga ya ciana cia Isiraeli, maacigayanirie na ũndũ wa gũcukĩra igai rĩacio mĩtĩ,
• 2. o ta ũrĩa Jehova aathĩte Musa gwĩkwo nĩ ũndũ wa mĩhĩrĩga ĩo kenda, na nuthu ya mũhĩrĩga ũmwe.
• 3. Nĩ gũkorũo Musa nĩaarĩkĩtie kũheana mabũrũri ma mĩhĩrĩga ĩĩrĩ, o na wa nuthu ya mũhĩrĩga ũmwe, mũrĩmo ũcio ũngĩ wa Jorodani; no rĩrĩ, Alawii ndaamaheire mabũrũri ma gũtuĩka mao o na hanini thĩinĩ wa acio angĩ.
• 4. Nĩ gũkorũo ciana cia Jusufu ciarĩ mĩhĩrĩga ĩĩrĩ, wa Manase, na wa Efiraimu; nao Alawii matiigana kũheo gĩcunjĩ o na kĩmwe gĩa gĩthaka kũu, tiga o matũũra, matũũrage thĩinĩ wamo, hamwe na ithaka imarigicĩirie cia ũhiũ wao, o na indo ciao.
• 5. O ta ũrĩa Jehova aathire Musa gwĩkwo-rĩ, ũguo noguo ciana cia Isiraeli ciekire, nacio igĩkĩgayania bũrũri ũcio.
• 6. Hĩndĩ ĩo ciana cia Juda igĩgĩkuhĩhĩria Joshua o kũu Giligali; nake Kalebu wa Jefune, ũrĩa Mũkenizi, akĩmwĩra atĩrĩ, Wee nĩũũĩ ũhoro ũrĩa Jehova aaheire Musa, mũndũ ũcio wa Ngai, ũtũkoniĩ ithuerĩ nawe o kũu Kadeshi-barinea.
• 7. Niĩ ndarĩ wa mĩaka mĩrongo ĩna hĩndĩ ĩo Musa, ndungata ya Jehova, yandeketie ngiuma Kadeshi-barinea, ngathigane bũrũri ũyũ, na ngĩcoka ngĩmũhũndũrĩra ũhoro o ta ũrĩa watariĩ ngoro-inĩ yakwa.
• 8. No rĩrĩ, ariũ a ithe witũ arĩa twaambatanĩtie nao nĩmaatũmire andũ maiyũrũo nĩ maĩ nda, no rĩrĩ, niĩ nĩndarũmĩrĩire Jehova Ngai wakwa maũndũ-inĩ mothe.
• 9. Nake Musa akĩĩhĩta mũthenya o ro ũcio, akiuga atĩrĩ, Ti-itherũ bũrũri o ro ũcio ikinya rĩaku rĩakinyire, ũgatuĩka igai rĩaku, o na rĩa ciana ciaku tene na tene, nĩ ũndũ nĩũrũmĩrĩire Jehova Ngai wakwa maũndũ-inĩ mothe.
• 10. Na atĩrĩrĩ, rĩu, o ta ũrĩa Jehova oigire nĩageka-rĩ, ũguo noguo andũũrĩtie muoyo mĩaka ĩno mĩrongo ĩna na ĩtano kuuma hĩndĩ ĩrĩa aarĩirie Musa, akĩmũhe ũhoro ũcio, o ihinda rĩu rĩothe Isiraeli maacangaga werũ-inĩ; na rĩu nĩndĩkĩhingĩtie mĩaka mĩrongo ĩnana na ĩtano.
• 11. Na rĩu ningĩ, ta kĩone atĩ o na ũmũthĩ ndĩkĩrĩ o na hinya wakwa o ta ũrĩa ndarĩ naguo mũthenya ũcio Musa aandũmire; o ta ũrĩa hinya wakwa watariĩ hĩndĩ ĩo-rĩ, ũguo noguo hinya ũrĩa ndĩ naguo rĩu ũtariĩ, o na arĩ wa kũrũa mbaara, kana wa gũthiĩ rũgendo, kana wa kũinũka mũciĩ.
• 12. Tondũ ũcio rĩu kĩ’he kĩrĩma gĩkĩ Jehova aaririe ũhoro wakĩo mũthenya ũcio; nĩ ũndũ wee mwene mũthenya ũcio nĩweiguĩrĩire ũrĩa Aanakimu maarĩ kũu, o na ũrĩa kwarĩ matũũra manene mairigĩtwo; na hihi no gũkorũo Jehova nĩegũikara hamwe na niĩ, ndĩmaingate o ta ũrĩa Jehova oigire.
• 13. Nake Joshua agĩkĩrathima Kalebu wa Jefune, akĩmũhe Hebironi gũtuĩke igai rĩake.
• 14. Tondũ ũcio Hebironi gũgĩtuĩka igai rĩa Kalebu wa Jefune, ũrĩa Mũkenizi, o na ũmũthĩ; nĩ ũndũ nĩaarũmĩrĩire Jehova, Ngai wa Isiraeli, maũndũ-inĩ mothe.
• 15. Na rĩrĩ, rĩĩtwa rĩa Hebironi mbere ya hĩndĩ ĩo rĩetagwo Kiriathu-ariba; nake Ariba ũcio nĩ mũndũ warĩ mũnene gũkĩra andũ arĩa angĩ othe thĩinĩ wa Aanakimu. Naguo bũrũri ũcio ũgĩkĩhorera, mbaara ĩgĩthira.

Home