Go Back

Jakubu Chapter 3

• 1. ATĨRĨRĨ, ariũ a Baba, tigai gũtuĩka arutani aingĩ, nĩ kũmenya atĩ ithuĩ nĩtũgatuĩrũo ituĩro rĩa hinya gũkĩra andũ arĩa angĩ.
• 2. Nĩ ũndũ ithuothe nĩtũhĩngĩcagwo nĩ maũndũ maingĩ. Na rĩrĩ, mũndũ angĩkorũo ndahĩngĩcagwo nĩ mĩario yake, nĩ mũndũ mũkinyanĩru kũna, ũrĩa ũhotaga kwĩriĩra mwĩrĩ wothe o naguo, ta awohete na mũkwa wa kanua.
• 3. Rĩu-rĩ, twekĩra mbarathi mĩkwa tũnua twacio nĩ getha itwathĩkagĩre, o na mĩĩrĩ yacio yothe nĩtũmĩgarũraga.
• 4. Ningĩ, ta rorai marikabu nacio; o na ikĩrĩ nene ta kĩ, na itwaragwo nĩ rũhuho rũĩ hinya, nĩigarũragwo na thukani nyinyi mũno, ikarorio o kũrĩa guothe mũtwari marikabu angĩenda.
• 5. Ũguo no taguo rũrĩmĩ naruo nĩ kega kanini ka mwĩrĩ, na rũĩrahagĩra maũndũ manene. Ta rorai ũrĩa kĩrĩti kĩnene atĩa kĩgwatagio mwaki nĩ kamwaki kanini ma!
• 6. Naruo rũrĩmĩ nĩ mwaki: na thĩinĩ wa ciĩga ciitũ nĩruo ruohanĩtie thĩinĩ waruo mawaganu mothe ma thĩ, rũgathũkagia mwĩrĩ wothe, ningĩ rũkagwatia mwaki ciũmbe ciothe iria cianombwo, naruo rũene rũgakorũo rũmundĩtio mwaki nĩ Jehanumu.
• 7. Nĩ ũndũ nyamũ iria cia magũrũ mana, na iria irĩ njoya, na iria itambaga thĩ, o na iria itũũraga iria-inĩ rĩrĩa inene thĩinĩ-rĩ, mĩthemba yothe yacio nĩĩmenyerekaga, o na yanamenyerio nĩ ciana cia Adamu:
• 8. ĩndĩ rũrĩmĩ-rĩ, gũtirĩ mũndũ o na ũrĩkũ ũngĩhota kũrũmenyeria; nĩruo kĩndũ kĩũru gĩtakindagĩria, na rũiyũirũo nĩ ũrũrũ wa kũũragana.
• 9. Nĩruo tũgathaga Mwathani o we Ithe witũ naruo, na nĩruo tũrumaga andũ naruo, o andũ mombirũo mahaanaine na Ngai:
• 10. nĩ kanua o ro kamwe koimaga kĩrathimo o na kĩrumi. Ariũ a Baba, ũguo tiguo kwagĩrĩire gũtuĩka.
• 11. Kaĩ gĩthima kiumaga maĩ marĩa mega na marĩa marũrũ o itherũkĩro rĩmwe?
• 12. Ningĩ, ariũ a Baba, mũkũyũ wakĩhota gũciara ndamaiyũ? O na kana mũthabibu ũhote gũciara ngũyũ? No taguo ningĩ, maĩ-inĩ ma cumbĩ hatingĩhota kuuma maĩ marĩa mega.
• 13. Rĩu-rĩ, nĩ mũndũ ũrĩkũ wanyu wĩ na ũũgĩ, agataũkĩrũo nĩ maũndũ? Ũcio nĩakĩonanie ciĩko ciake njega nĩ gũikaraga na mĩikarĩre mĩega, e na ũhoreri ũrĩa uumanaga na ũũgĩ.
• 14. No mũngĩkorũo mũrĩ na ũiru ngoro-inĩ cianyu wa gũtũma mũthũũrane, o na mĩamũkano-rĩ, tigai kwĩgatha na kũhenania, mũreganĩte na ũhoro-wa-ma.
• 15. Ũũgĩ ũcio tiguo ũikũrũkaga uumĩte Igũrũ, no nĩ wa thĩ ĩno, nĩ wa gĩthemba gĩa kĩĩmwĩrĩ, na kĩa ndaimono.
• 16. Nĩ ũndũ harĩa harĩ ũiru na mĩamũkano, nĩho harĩ ngũĩ na ciĩko ciothe cia waganu.
• 17. Ĩndĩ ũũgĩ ũrĩa uumaga Igũrũ o mbere nĩ mũtheru, na ningĩ wenda ũiguano, na nĩũcayanagĩra, na ndũrĩ ngarari, ningĩ ũkaiyũrũo nĩ tha o na maciaro mega, na ndũrĩ ngariũkũ o na kana ũhinga.
• 18. Namo maciaro ma ũthingu nĩmo moimanaga na mahanda ma ũiguano marĩa mahandagwo nĩ arĩa ateithũrani.

Home