Go Back

Ahibirania Chapter 10

• 1. RĨU-RĨ, tondũ watho ũrĩ o kĩĩruru kĩa maũndũ marĩa mega magoka, na ti mũhianĩre wa ma wa ũrĩa matariĩ-rĩ, ndũngĩhota o na rĩ gũtũma andũ arĩa makuhagĩrĩria maagĩrĩre kũna na ũndũ wa magongona o ro macio matũire marutagwo o mwaka o mwaka.
• 2. Amu kũngĩkorũo ũguo tiguo-rĩ, kaĩ matangĩatigire kũrutagwo? Nĩ ũndũ andũ arĩa maarutagĩrũo mo maarĩkia gũthahũrũo rĩmwe makaigania, matingĩacokire kũigua ngoro-inĩ atĩ me na mehia.
• 3. No rĩrĩ, magongona-inĩ macio nĩgũcokaga kũririkanwo mehia mwaka o mwaka.
• 4. Tondũ gũtingĩhoteka mehia meherio biũ nĩ thakame ya ndegwa na ya mbũri.
• 5. Nĩkĩo Kristo, agĩũka gũkũ thĩ, ekuuga atĩrĩ: Wee-rĩ, ti magongona na mahaki wendaga, No nĩ mwĩrĩ ũ’thondekeire;
• 6. Mahaki ma gũcinwo, na ma kũrutwo nĩ ũndũ wa mehia-rĩ, timo ũkenagĩra.
• 7. Hĩndĩ ĩo ngĩkiuga atĩrĩ, Niĩ ũyũ! Ndĩ gũũka, (Thĩinĩ wa ibuku o rĩo rĩa gĩkũnjo, ũhoro wakwa nĩho wandĩkĩtwo) Gwĩkaga o ũrĩa wendaga, wee Ngai.
• 8. Nake oiga hau mbere atĩ magongona na mahaki, na mahaki ma gũcinwo, na marĩa ma kũrutwo nĩ ũndũ wa mehia timo wendaga kana ũkamakenera-rĩ, (namo nĩmo marutagwo ta ũrĩa gwathanĩtwo watho-inĩ),
• 9. agacoka akoiga, Atĩrĩ, ndĩ gũũka gwĩkaga o ũrĩa wee wendaga. Nĩ kweheria ekweheria ũhoro ũcio wa mbere, nĩ getha arũmie ũcio wa kerĩ.
• 10. Nakuo kwenda kũu nĩkuo gũtũmaga tũtherio, nĩ ũndũ wa ũrĩa mwĩrĩ wa Jesu Kristo warutirũo o ihinda rĩmwe rĩa kũigana.
• 11. Na rĩrĩ, mũthĩnjĩri-Ngai o wothe nĩarũgamaga o mũthenya o mũthenya agĩtungatagĩra Ngai, na akĩrutaga magongona o ro macio kaingĩ, namo matingĩhota kweheria mehia o na rĩ.
• 12. Ĩndĩ ũyũ-rĩ, aarĩkia kũruta igongona o rĩmwe rĩa kweheria mehia rĩa kũigana nginya tene na tene, agĩikara thĩ guoko-inĩ kwa ũrĩo kwa Ngai,
• 13. eterere o nginya rĩrĩa thũ ciake igatuwo gaturũa ka makinya make.
• 14. Tondũ-rĩ, nĩ ũndũ wa kwĩruta o ihinda rĩmwe, nĩaatũmire andũ arĩa aamũre maagĩrĩre kũna o nginya tene.
• 15. O nake Roho Mũtheru nĩwe mũira witũ ũhoro-inĩ ũcio; tondũ aarĩkia kuuga atĩrĩ:
• 16. Gĩkĩ nĩkĩo kĩrĩkanĩro kĩrĩa ngarĩkanĩra nao matukũ macio maathira, ũguo nĩguo Mwathani oiga; Nĩngekĩra mawatho makwa ngoro-inĩ ciao, Na ndĩmaandĩke meciria-inĩ mao,
• 17. agacoka akoiga atĩrĩ: Namo mehia mao na waganu wao ndigacoka kũmaririkana o rĩ o rĩ.
• 18. Na rĩrĩ, macio maarĩkia kũrekanĩrũo, gũtingĩcoka kũrutwo ihaki rĩa mehia.
• 19. Nĩ ũndũ ũcio, ariũ a Ithe witũ, kuona atĩ twahota kũũmagĩrĩria gũtonya handũ harĩa hatheru na ũndũ wa thakame ya Jesu,
• 20. tũthiĩrĩire njĩra ĩrĩa njerũ na ĩrĩ muoyo, ĩrĩa aatũrugũrĩirie na kũhĩtũkĩra gĩtama-inĩ, nakĩo nĩkĩo mwĩrĩ wake-rĩ;
• 21. na ningĩ, kuona atĩ twĩ na mũthĩnjĩri-Ngai ũtuĩtwo mũnene wa gwathaga nyũmba ya Ngai-rĩ;
• 22. nĩtũthengererei twĩ na ũhoro-wa-ma ngoro-inĩ, o na twĩ na wĩtĩkio o ũrĩa mũiganĩru, na ningĩ tũminjaminjĩirio ngoro tũtigaikare twĩ na thamiri ĩgũtũcuka, na tũthambĩtio mĩĩrĩ iitũ na maĩ matheru.
• 23. Ningĩ nĩtũrũmieni ũhoro ũrĩa tũtũire tuumbũraga atĩ nĩtũwĩrĩgĩriire, tũtekũũthanganĩria, tondũ-rĩ, ũrĩa weranĩire kĩĩranĩro nĩ wa kwĩhokeka.
• 24. Hamwe na ũguo nĩtwĩciragiei ũrĩa tũngĩarahũranaga: o mũndũ na ũrĩa ũngĩ, nĩ getha twendanage, na twĩkage ciĩko njega;
• 25. ningĩ tũtigatige kũũnganaga hamwe, ta ũrĩa andũ amwe mamenyerete: gwĩkaga, no kaba tũhatanagĩrĩrie; na twĩkage ũguo o makĩria tondũ wa ũrĩa mũkuona atĩ Mũthenya ũcio nĩũrakuhĩhĩria.
• 26. Nĩ ũndũ-rĩ, tũngĩcoka kwĩhagia na rũtũrĩko rĩrĩa tũrĩkĩtie kũmenya: ũhoro-wa-ma, gũtirĩ na igongona rĩngĩ rĩtigaire rĩa kweheria mehia,
• 27. tiga o gwetererũo na kĩmako kĩnene cira o na mwaki wakanaga, ũrĩa ũrĩnina andũ arĩa marĩ ũthũ na Ngai.
• 28. Rĩu-rĩ, mũndũ ũrĩa ũrurũkĩte watho wa Musa nĩ wa kũũragwo o atekũiguĩrũo tha, angiumbũrũo nĩ aira erĩ kana atatũ.
• 29. Mũgwĩciria atĩa? Kaĩ mũndũ ataagĩrĩirũo nĩ kũherithio na iherithia rĩnene mũno makĩria, ũrĩa ũgakorũo arangĩrĩirie Mũrũ wa Ngai, agatua atĩ thakame ya kĩrĩkanĩro, ĩrĩa aatheririo nayo, nĩ kĩndũ gĩtarĩ gĩtheru, o na akamenereria Roho ũrĩa ũheanaga Wega wa Ngai?
• 30. Amu nĩtũũĩ: ũrĩa woigire atĩ, Ũhoro wa kũrĩhanĩria nĩ wakwa, niĩ nĩ niĩ ngarĩhania. Na ningĩ akiuga atĩrĩ: Mwathani nĩwe ũgatuĩra andũ ake cira.
• 31. Nĩ ũndũ wa kũguoyohania mũno gũkumbatwo nĩ Ngai ũrĩa wĩ muoyo.
• 32. No rĩrĩ, ririkanai matukũ marĩa ma mbere, mwarĩkia gũthererũo nĩ ũtheri, ũrĩa mwetiiririe mbaara nene mũkĩnyamario.
• 33. Mahinda mamwe nĩ kũmenererio mwamenagĩrĩrio mbere-inĩ ya kĩrĩndĩ, mũkĩrumagwo na mũgĩthĩnagio; na mahinda mangĩ-rĩ, nĩ kũgwatanĩra mwagwatanĩire mathĩna na andũ arĩa mekagwo ũguo.
• 34. Tondũ nĩmwaiguagĩra andũ arĩa mohetwo tha, o na rĩrĩa mwatunyagwo indo cianyu, no gũkena mwakenaga, nĩ ũndũ wa kũmenya atĩ inyuĩ inyuene mwĩ na indo ingĩ njega makĩria na cia gũtũũra.
• 35. Tondũ ũcio-rĩ, tigai gũte ũũmĩrĩru ũcio wanyu, nĩ ũndũ nĩũkarehe uumithio mũnene.
• 36. Tondũ nĩmũbatairio nĩ gũkirĩrĩria nĩ getha atĩ, mwarĩkia gwĩka o ũrĩa Ngai endaga, mũkona ũndũ ũrĩa weranĩirũo.
• 37. Nĩ ũndũ kahinda o kanini gaathira-rĩ, Ũrĩa wa gũũka nĩegũũka na ndetithia,
• 38. Ĩndĩ-rĩ, mũndũ wakwa mũthingu nĩagatũũra muoyo nĩ ũndũ wa ũrĩa etĩkĩtie: Nake angĩcokacoka na thutha-rĩ, ngoro yakwa ndĩngĩmũkenera.
• 39. No ithuĩ-rĩ, tũtirĩ a thiritũ ya arĩa macokaga na thutha makora; tũkĩrĩ a thiritũ ya arĩa metĩkĩtie, makaya kũhonokio mĩoyo yao.

Home