Go Back

2 Timotheo Chapter 3

• 1. NO rĩrĩ, ũndũ ũyũ ũmenye wega, atĩ matukũ marĩa ma kũrigĩrĩria nĩgũkagĩa mahinda ma ũgwati.
• 2. Tondũ andũ nĩmagatuĩka eendi, na endi mbia, na egani, na egathi, na arumani, andũ matangĩigua aciari ao, na matarĩ ngatho, na matarĩ atheru;
• 3. ningĩ makorũo maagĩte wendani ũrĩa wa ndũire, andũ matangĩteithũrĩkana, na magacambanagia, na arĩa matoĩ kwĩgirĩrĩria, andũ eĩ, na arĩa matenda maũndũ mega,
• 4. na arĩa makunyanagĩra andũ arĩa angĩ, na arũũgĩrĩri, na eĩkĩrĩri, o na arĩa mendaga gwĩkenia gũkĩra ũrĩa mendaga Ngai;
• 5. nĩo metuaga ta meamũrĩire Ngai, no kũrega nĩmaregaga hinya ũrĩa uumaga ũhoro-inĩ ũcio: acio nao ũmathemage.
• 6. Amu-rĩ, thĩinĩ wao nĩharĩ andũ arĩa makungagĩrĩra nyũmba ciene, makagucagĩrĩria tũmũndũ-mũka tũkĩgu, tũrĩa tũtitikanĩtie mehia, na tũgatwarĩrĩrio nĩ merirĩria ma mĩthemba mĩingĩ;
• 7. natuo gũthoma no tũthomaga hingo ciothe, tũtarĩ hingo tũngĩhota kũmenya ũhoro-ũrĩa-wa-ma;
• 8. Na rĩrĩ, o ta ũrĩa Janne na Jambare mehotoreire Musa-rĩ, ũguo noguo andũ acio mehotoraga makararie ũhoro-ũrĩa-wa-ma; nao nĩ andũ mathũkĩte meciria-inĩ mao, na ha ũhoro wa maũndũ marĩa ma Wĩtĩkio-rĩ, nĩ a kũregwo biũ.
• 9. No rĩrĩ, matingĩkĩra hau makinyĩte: nĩ ũndũ ũrimũ wao nĩũkaguũka kũrĩ andũ othe, o ta ũrĩa ũrimũ wa andũ acio naguo waguũkire.
• 10. No wee-rĩ, nĩũtũire ũrũmĩtie ũrutani wakwa, ũkarũmanĩrĩra na mĩtũũrĩre yakwa, na maũndũ marĩa ndanyaga gwĩka, o na wĩtĩkio wakwa, na ũrĩa njetagĩrĩra itegũthethũka, o na ũrĩa ndũire nyendanaga, na ngakiragĩrĩria;
• 11. ũgakĩgwatanĩra na niĩ ũhoro-inĩ wa kũnyarirũo na wa mathĩna makwa, ta marĩa maangorereire kũrĩa Antiokia, na Ikonio, o na Lusitera; o na maũndũ marĩa ndakiragĩrĩria ngĩnyarirũo namo. Namo mothe-rĩ, nĩ Mwathani wa’honokirie kũrĩ mo.
• 12. O na rĩrĩ, arĩa othe mendete gũtũũra meamũrĩire Ngai, me thĩinĩ wa Kristo Jesu-rĩ, matirĩ hingo matarĩnyariragwo.
• 13. No andũ arĩa aaganu na ahenania-rĩ, nĩmarĩkĩragĩrĩria kwagana o kwagana, makĩhenanagia na makĩhenekaga.
• 14. Ĩndĩ wee-rĩ, tũũra ũrũmĩtie maũndũ marĩa wĩrutĩte, ũkamamenya wega atĩ nĩ ma ma; nĩũũĩ arĩa werutire maũndũ macio harĩ o,
• 15. ũkamenya atĩ gwata hĩndĩ ĩrĩa warĩ kaana, ũtũire ũmenyete Maandĩko marĩa matheru, o marĩa mahotaga gũkũũhĩgia, nĩguo ũkahonokio nĩ ũndũ wa kwĩhoka Kristo Jesu.
• 16. Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni ũhoro-inĩ wa kũrutana, na wa kũmenyithia andũ ũũru wao, na wa kũmakaania, o na wa kũmamenyeria mĩtũũrĩre ĩrĩa ĩringaine na ũthingu;
• 17. nĩ getha mũndũ wa Ngai atuĩke mũkinyanĩru o gũkinyanĩra, na aikarage athagathagĩtwo kũna, nĩguo arutage wĩra ũrĩa wothe mwega.

Home