Go Back

2 Timotheo Chapter 2

• 1. NĨ ũndũ wa ũguo, wee mwana wakwa-rĩ, gĩaga na hinya na ũndũ wa Wega ũrĩa uumaga gwĩ Kristo Jesu.
• 2. Na maũndũ marĩa ũiguĩte na niĩ, aira aingĩ me ho, ũmaigage kũrĩ andũ ehokeku nĩguo mamaramatage, nĩ getha makahota kũmarutaga andũ angĩ o nao.
• 3. Itĩkĩra kũnyariranĩrio na niĩ, ta ũrĩ mũthigari mwagĩrĩru wa Kristo Jesu.
• 4. Rĩu-rĩ, gũtirĩ mũthigari, ũthiĩte ita, wĩtĩkagĩra kũrigicwo nĩ mabata marĩa ma ndũire; ndetĩkagĩra, nĩ getha akenagie ũrĩa wamwandĩkire atuĩke mũndũ wa ita.
• 5. Ningĩ-rĩ, mũndũ aahĩtahĩtana mathako-inĩ, ndekagĩrũo thũmbĩ tiga o akorirũo aathĩkĩire ũrĩa gwathanĩtwo.
• 6. Nake mũrĩmi ũrĩa wĩnogagia akĩrĩma mũgũnda-rĩ, no mũhaka atuĩke wa kwamba kũgwata igai rĩa irio ciaguo.
• 7. Cũranagia wega ũrĩa ndĩroiga; nĩ ũndũ Mwathani nĩarĩkũũhĩgagia maũndũ-inĩ mothe.
• 8. Tũũra ũririkanaga Jesu Kristo, we wariũkire akiuma kũrĩ arĩa akuũ, na aarĩ wa rũciaro rũa Daudi, o ta ũrĩa kwonanagio nĩ Ũhoro-ũrĩa-Mwega ndũire ’hunjagia.
• 9. Ũhoro ũcio-rĩ, nĩguo ndũire ’nyariragĩrũo, o nginya ngaya kuohwo ta ndĩ mũgeri ngero; ĩndĩ Ũhoro wa Ngai ti muohe.
• 10. Tondũ wa ũguo-rĩ, ngiragĩrĩria maũndũ mothe nĩ ũndũ wa andũ arĩa athure, nĩ getha o nao makahonokio na ũhonokio ũrĩa uumaga gwĩ Kristo Jesu, na magĩe na riri ũrĩa ũtagathira.
• 11. Ũhoro ũyũ nĩ wa kwĩhokeka, atĩrĩ, Tũngĩkorũo nĩtwakuire hamwe nake, nĩtũgatũũra muoyo hamwe nake:
• 12. na tũngĩkirĩrĩria-rĩ, nĩtũgacoka gũthamaka hamwe nake: ĩndĩ tũngĩmũkaana-rĩ, o nake aaya gũtũkaana na ithuĩ:
• 13. na tũngĩaga kwĩhokeka-rĩ, we mwene atũũraga arĩ o mwĩhokeku; nĩ ũndũ ndangĩhota gwĩkaana ũrĩa atariĩ.
• 14. Ririkanagia andũ maũndũ macio, na ũmerage na ma mbere ya Mwathani, atĩ matigage gũkararanĩria ndeto iria itarĩ kĩguni, o iria ing’aũranagia andũ arĩa maciiguaga.
• 15. Ĩkĩra kĩyo gĩa kwĩonania kũrĩ Ngai wĩ mũndũ mwĩtĩkĩrĩku, na wĩ mũruti-wĩra ũtarĩ ũndũ ũngĩmũconora, o na wĩ mũndũ ũheanaga ũhoro-ũrĩa-wa-ma na mũheanĩre ũrĩa mũrũngarũ.
• 16. No rĩrĩ, themaga ndereti cia mũhũhũto iria ireganĩte na Ũhoro wa Ngai, tondũ nĩcio igatwarĩrĩria andũ makĩria ũhoro-inĩ wa gũtũũra matetigagĩra Ngai;
• 17. nacio ndeto cia andũ acio itheaga ta kĩronda kĩa ndĩĩra. Nao-rĩ, amwe nĩ aa Humenayo na Fileto;
• 18. nao nĩo mahĩtanĩtie na ũhoro-wa-ma, makoigaga atĩ ũhoro wa kũriũka rĩu nĩũrĩkĩtie kũhĩtũka, na makagarũrania wĩtĩkio wa andũ amwe.
• 19. Ĩndĩ gĩtina kĩrĩa kĩrũmu kĩrĩa kĩhande nĩ Ngai no gĩtũire, nakĩo kĩoretwo rũũri rũrũ, atĩrĩ, Mwathani nĩamenyaga andũ arĩa marĩ ake: ningĩ-rĩ, Mũndũ o wothe ũrĩa ũgwetaga rĩĩtwa rĩa Mwathani no atiganage na maũndũ marĩa matarĩ ma ũthingu.
• 20. Rĩu-rĩ, thĩinĩ wa nyũmba o yothe nene-rĩ, to indo cia thahabu na betha irĩ kuo ciiki, no nĩkũrĩ ingĩ cia mĩtĩ na cia rĩũmba; na imwe ciacio nĩ cia wĩra ũrĩa mũtĩe, na ingĩ nĩ cia wĩra ũrĩa ũtangĩtĩĩka.
• 21. Hakĩrĩ ũguo-rĩ, mũndũ angĩĩtheria, atiganage na maũndũ marĩa matarĩ gĩtĩo, no atuĩke ta kĩndũ gĩa gũtĩwo, kĩndũ kĩamũre, o kĩrĩa kĩagĩrĩire mwene nyũmba arutage wĩra nakĩo, na kĩrĩa kĩhaarĩrĩirio wĩra o wothe mwega.
• 22. No rĩrĩ, ũragĩra merirĩria marĩa moru ma wanake-rĩ, na ũrũmagie ũhoro wa ũthingu, na wa wĩtĩkio, na wa wendani, o na wa thayũ, mwĩ hamwe na arĩa makayagĩra Mwathani me na ngoro theru.
• 23. No rĩrĩ, regana na maũndũ marĩa moranganagio na ũrimũ, na marĩa moranganagio nĩ andũ arĩa maagĩte ũmenyo, nĩ ũrĩa ũkũmenya atĩ nĩmo maciaraga njũgitano.
• 24. Nayo ngombo ya Mwathani ndiagĩrĩirũo nĩ gũtuĩka mũũgitani, nĩ kaba atuĩke mũndũ wĩkindĩire harĩ andũ othe, mũndũ ũũĩ kũrutana, na mũkirĩrĩria,
• 25. ningĩ ataarage, ahoreire, andũ arĩa mamũkararagia; nĩguo atĩ, kũngĩhoteka, Ngai aaya gũtũma mahere nĩguo mamenye ũhoro-ũrĩa-wa-ma,
• 26. na magakorũo macokete kwĩigua, moime mũtego-inĩ wa mũcukani, nĩ ũndũ wa ũrĩa matahĩtwo nĩ ngombo ĩo ya Mwathani nĩ getha macoke gwĩkaga ũrĩa Ngai enda.

Home