Go Back

1 Timotheo Chapter 3

• 1. ŨHORO ũyũ nĩguo wa kwĩhokeka, atĩ mũndũ angĩenda gũtuwo mũrori wa maũndũ ma kanitha, nĩ wĩra mwega eriragĩria.
• 2. Nĩ ũndũ ũcio, mũrori wa maũndũ ma kanitha nĩaagĩrĩirũo nĩ gũtuĩka mũndũ ũtarĩ ũcuke, na mũthuri wa mũtumia o ũmwe, mũndũ wĩgiragĩrĩria merirĩria ma mwĩrĩ, akagĩa na ũũgĩ wa ngoro, na mĩthiĩre yake ikaagĩrĩra, agatuĩka mwendi gũtugana, na ningĩ ũrĩa ũũĩ kũrutana maũndũ;
• 3. ĩndĩ ndakanatuĩke wa ngũĩ iria ciumanaga na ũrĩu, kana mũhũri andũ; no nĩatuĩke mũhoreri, na mũndũ ũtarĩ wa ngarari, na ũtarĩ thuti ya mbia;
• 4. ningĩ nĩakorũo amenyete gwathaga wega mũciĩ wake mwene, na agaathĩkagĩrũo nĩ ciana ciake hatarĩ ũhoro wa itherũ.
• 5. (Tondũ-rĩ, mũndũ angĩkorũo atekũmenya gwatha nyũmba yake mwene-rĩ, angĩkĩhota atĩa kũmenyerera kanitha wa Ngai?)
• 6. Na ningĩ ndagakorũo arĩ mũndũ wa mwĩtĩkanio, nĩ getha ndakae kũgũa nĩ ũndũ wa mwĩgatho, atuĩke wa gũtuĩrũo cira ta ũrĩa mũcukani aatuĩrĩirũo.
• 7. Ningĩ no mũhaka akorũo arĩ na ngumo njega harĩ andũ arĩa matarĩ a thiritũ iitũ, nĩ getha ndagatuĩke mũndũ wa gũcambio, kana agwatio nĩ mũtego wa mũcukani.
• 8. Atungati a kanitha nao nĩmaagĩrĩirũo nĩ gũtuĩka andũ matarĩ na itherũ, na matarĩ a mĩnua ĩĩrĩ, na makorũo matarĩ andũ a gũkorokera ndibei, ningĩ arĩa matarĩ ahahamĩri indo na njĩra ĩtaagĩrĩire;
• 9. no makorũo marĩ andũ marũmĩtie ũrutani wa Wĩtĩkio ũrĩa ũtũire hitho-inĩ, me na thamiri itarĩ na mĩĩcuko.
• 10. Nao no kinya maambe magerio; na thutha ũcio manyite wĩra wa atungati a kanitha, mangĩkorũo matarĩ na ũcuke.
• 11. O ũndũ ũmwe andũ-a-nja no makorũo matarĩ na itherũ na matarĩ acambania, andũ athemi ũrĩu, na a kwĩhokeka maũndũ-inĩ mothe.
• 12. Ningĩ atungati a kanitha-rĩ, no matuĩke o arĩa me mũtumia o ũmwe, ũmwe, na maathage ciana ciao o na mĩciĩ yao wega.
• 13. Tondũ-rĩ, andũ arĩa marutĩte wega wĩra ũcio wa mũtungati wa kanitha nĩmegĩagĩra na ngumo njega, na magatuĩka omĩrĩru mũno ũhoro-inĩ wa wĩtĩkio ũrĩa wa gwĩtĩkia Kristo Jesu.
• 14. Ndakwandĩkĩra maũndũ macio ndanyĩte atĩ nĩndĩũka kũrĩ wee narua;
• 15. ndakĩmaandĩka nĩguo atĩ ingĩaga gũũka narua-rĩ, ũmenye mĩthiĩre ĩrĩa andũ maagĩrĩirũo nĩ gũthiaga nayo thĩinĩ wa nyũmba ya Ngai, na nĩyo kanitha wa Ngai ũrĩa ũrĩ muoyo, naguo nĩguo gĩtugĩ kĩrĩa gĩa gũtiirĩrĩra ũhoro-ũrĩa-wa-ma, o na gĩtina kĩaguo kĩrĩa kĩrũmu.
• 16. Na rĩrĩ, hatirĩ nganja atĩ ũhoro wa kwĩamũrĩra Ngai nĩ hitho nene ma: naguo nĩ wake o We, Ũrĩa wonanirio e na mwĩrĩ, Agĩtuwo mũthingu nĩ Roho, Akĩonwo nĩ araika, Ningĩ ngumo yake ĩkĩhunjanĩrio kũrĩ andũ a ndũrĩrĩ ciothe, Agĩgĩĩtĩkio nĩ andũ a gũkũ thĩ, Na akĩiyũkio riri-inĩ kũrĩa Igũrũ.

Home