Go Back

2 Athesalonike Chapter 1

• 1. NĨ ithuĩ Paulo na Silivano na Timotheo twatũma marũa maya kũrĩ Kanitha wa Athesalonike, ũrĩa wĩ thĩinĩ wa Ngai Ithe witũ o na Mwathani Jesu Kristo.
• 2. Mũrogĩa na Wega na thayũ, ciumĩte kwĩ Ngai Ithe witũ o na Mwathani Jesu Kristo.
• 3. Nĩtwagĩrĩirũo nĩ gũcokagĩria Ngai ngatho hĩndĩ ciothe nĩ ũndũ wanyu, ariũ a Ithe witũ, o ta ũrĩa kwagĩrĩire gwĩkagwo, nĩ ũndũ wa ũrĩa wĩtĩkio wanyu wongererekaga mũno, naguo wendani ũkaingĩha ũrĩa mũtũire mwendanaga naguo o mũndũ na mũndũ ũrĩa ũngĩ.
• 4. Na tondũ ũcio nĩ kwĩraha twĩrahaga nĩ ũndũ wanyu thĩinĩ wa makanitha ma Ngai, tũkĩganaga ũrĩa mũkiragĩrĩria, mũgaikara mwĩtĩkĩtie mĩnyamaro-inĩ yanyu yothe, o na mathĩna marĩa mũthĩnagio namo.
• 5. Naguo ũndũ ũcio nĩguo wonanagia wega ũrĩa Ngai atuaga cira na kĩhooto, nĩguo mũtuwo aagĩrĩru a gũtonya ũthamaki-inĩ wa Ngai, o ũcio mũthĩnĩkaga nĩ ũndũ waguo;
• 6. kuona atĩ Ngai nĩonaga arĩ kĩhooto kũmarĩha na mathĩna, o arĩa mamũthĩnagia inyuĩ,
• 7. ĩndĩ na inyuĩ mũtũire mũnyariragwo-rĩ, amũrĩhe na ũhurũko hamwe na ithuĩ, hĩndĩ ĩrĩa Mwathani witũ Jesu akaguũranĩrio oimĩte Igũrũ, me hamwe na araika ake arĩa me na ũhoti,
• 8. mokĩte me na mwaki ũkũrĩrĩmbũka. Nake nĩakerĩhĩria kũrĩ andũ arĩa matoĩ Ngai, o na arĩa mataathĩkaga nĩ Ũhoro-ũrĩa-Mwega wa Mwathani witũ Jesu.
• 9. Nao nĩmakaherithio na kwanangwo kũrĩa gũtagathira, matikanae kuona ũthiũ wa Mwathani, o na kana riri wake ũrĩa wĩ na ũkaru,
• 10. hĩndĩ ĩrĩa agoka kũgoocagwo e thĩinĩ wa andũ ake aamũre, o na kuugĩrĩrio agĩkũngũyagĩrũo mũthenya ũcio e thĩinĩ wa andũ othe arĩa magakorũo mamwĩtĩkĩtie, (tondũ nĩ gwĩtĩkia mwetĩkirie ũira ũrĩa twaheanire kũrĩ inyuĩ).
• 11. Ũndũ ũcio nĩguo ũtũmaga tũmũhoyagĩre hingo ciothe, atĩ Ngai witũ amũtue andũ arĩa maaganĩrĩire na ũhoro ũrĩa mwĩtĩirũo, na atĩ amũhingagĩrie na hinya wake ũndũ o wothe mwega ũrĩa mwĩriragĩria kuona, o na wĩra o wothe ũrĩa uumanĩte na wĩtĩkio;
• 12. nĩ getha rĩĩtwa rĩa Mwathani witũ Jesu rĩgakumagio thĩinĩ wanyu, na inyuĩ mũkumagio thĩinĩ wake, o kũringana na Wega wa Ngai witũ, na wa Mwathani Jesu Kristo.

Home