Go Back

Gũcokerithia Maathani Chapter 7

• 1. Na rĩrĩ, hĩndĩ ĩrĩa Jehova Ngai waku agagũkinyia bũrũri ũcio ũgũthiĩ kwĩgwatĩra ũtuĩke waku, na aingate ndũrĩrĩ nyingĩ ciehere mbere yaku, nacio nĩcio Ahiti, na Agirigashi, na Aamori, na Akanaani, na Aperizi, na Ahivi, na Ajebusi, ndũrĩrĩ mũgwanja nene na irĩ hinya mũno gũgũkĩra;
• 2. o na ningĩ hĩndĩ ĩrĩa Jehova Ngai waku agacirekereria acineane harĩ wee o mbere yaku, nawe ũcihũre-rĩ, nĩũgacinina o gũcinina biũ; ndũkanarĩkanĩre kĩrĩkanĩro o na kĩrĩkũ nacio, kana ũciiguĩre tha,
• 3. ningĩ mũtikanagũranĩre nacio. Mũrũ wa mũndũ o na ũrĩkũ wa andũ acio ndũkanamũhe mwarĩguo, kana ũreke mwarĩ atwarũo nĩ mũrũguo.
• 4. Nĩ ũndũ nĩakagarũra mũrũguo arege kũnũmĩrĩra, nĩ getha matungatagĩre ngai ingĩ; na tondũ ũcio Jehova nĩagacinwo nĩ marakara amũũkĩrĩre, akũnine o narua.
• 5. No rĩrĩ, maũndũ marĩa mũkameka nĩ maya; igongona ciao nĩmũgaciunanga, o nacio itugĩ ciao cia kũhoyũo mũcibacanie na thĩ, ciunangĩke, o namo Maashera mao mũmatemenge magũe, ningĩ mĩhianano yao ya gwacũhio mũmĩcine na mwaki.
• 6. Nĩ gũkorũo wee nĩwe rũrĩrĩ rũamũrĩirũo Jehova Ngai waku; nake Jehova Ngai waku agũthurĩte ũtuĩke rũrĩrĩ rũĩ bata mũno rũamũrĩirũo we mwene gũkĩra ndũrĩrĩ iria ingĩ ciothe itũũraga gũkũ thĩ guothe.
• 7. Na rĩrĩ, Jehova ndaagwatire kũmwenda mũno kana akĩmũthura nĩ ũndũ wa ũrĩa mwaingĩhĩte gũkĩra ndũrĩrĩ iria ingĩ ciothe; tondũ-rĩ, inyuĩ mwarĩ anyinyi mũno gũkĩra andũ arĩa angĩ othe mũgĩtarũo;
• 8. no rĩrĩ, Jehova nĩ kwenda amwendete, ningĩ nĩ kwenda endete kũhingia ũhoro ũrĩa erĩire mathoguo na mwĩhĩtwa; maũndũ macio nĩmo maatũmire amũrute nyũmba ya ũkombo o guoko-inĩ kwa Firauni, mũthamaki wa Misiri, amũkũũre na ũndũ wa gwĩka maũndũ na guoko kwĩ hinya.
• 9. Tondũ ũcio menya mũno atĩ Jehova Ngai waku nĩwe Ngai, o we Mũrungu ũrĩa mwĩhokeku, ũrĩa ũtũũragia irĩkanĩro ciake iria arĩkanĩire na andũ, o na tha, harĩ arĩa mamwendaga na makamenyerera maathani make, o nginya njiaro ngiri;
• 10. na ningĩ nĩerĩhagĩria harĩ andũ arĩa mamũthũũrĩte akamanina biũ, makĩonaga; ũcio-rĩ, ndangĩgĩa thieya wa kwĩrĩhĩria harĩ mũndũ ũrĩa ũmũthũũrite, no arĩĩrĩhagĩria harĩ we akĩonaga.
• 11. Tondũ ũcio menyagĩrĩra maathani, o na irĩra cia watho wa kũrũmĩrĩrũo, o na matuĩro ma cira, marĩa ngũgũtaara namo ngĩgwatha ũmũthĩ, nĩguo ũmekage.
• 12. Na nĩgũgakinya atĩrĩ, atĩ tondũ wa ũrĩa mũiguaga matuĩro maya ma cira, na mũkanamenyerera, o na mũkamekaga, Jehova Ngai waku o nake nĩegũtũũria kĩrĩkanĩro kĩrĩa aarĩkanĩire na mathoguo, o na atũũre aiguanagĩra tha, o ta ũguo aamerĩire na mwĩhĩtwa;
• 13. nawe nĩagakwenda, na akũrathime, na atũme wongerereke, o naruo rũciaro rũa mũthimo waku nĩakarũrathima, o na maciaro ma mũgũnda waku, namo nĩmo ngano yaku, na ndibei yaku, na maguta maku, o na njiaro cia ng’ombe ciaku, o na tũũri twa rũũru rũaku rũa mbũri, mwĩ kũu bũrũri ũcio erĩire mathoguo na mwĩhĩtwa atĩ nĩagakũhe.
• 14. Nĩũkaratimwo gũkĩra ndũrĩrĩ iria ingĩ ciothe; na gũtikagĩa mũndũ mũrũme ũkwaga rũciaro, kana mũndũ-wa-nja ũgũthata thĩinĩ wanyu, o na kana nyamũ thĩinĩ wa ũhiũ wanyu.
• 15. Ningĩ Jehova nĩagakwehereria mĩrimũ yothe; na ndagakũrehithĩrie ndũari njũru o na ĩmwe ya iria cia Misiri ũũĩ ũhoro wacio; no rĩrĩ, nĩagatũma igwate andũ othe arĩa magũthũũrĩte.
• 16. Nawe nĩũkanina ndũrĩrĩ ciothe iria Jehova Ngai waku akarekereria acineane moko-inĩ maku; nawe rĩrĩa waciona na maitho-rĩ, ndũkanacicaĩre, kana ũtungatĩre ngai ciacio; nĩ gũkorũo ũndũ ũcio hihi waya gũkũgucĩrĩria ũheneke.
• 17. Ningĩ ũngĩkeĩra na ngoro yaku atĩrĩ, Ndũrĩrĩ ici nĩ nyingĩ ikangĩra; ngagĩciũmbĩria mabũrũri marĩa ciegwatĩire magĩtuĩka ma cio atĩa?
• 18. Menya ũkanaciĩtigĩra; tũũra ũririkaine mũno ũrĩa Jehova Ngai waku ekire Firauni, na ũrĩa ekire kũndũ guothe kũu Misiri,
• 19. o na maũndũ manene marĩa andũ acio maageririo namo, ũkĩĩonagĩra na maitho maku, o na ciama iria ciaringirũo, o na maũndũ ma kũgegania marĩa mekirũo, ningĩ ũririkane njara ĩrĩa ĩrĩ hinya, o na guoko gũtambũrũkĩrio, iria Jehova Ngai waku aakũrutire kuo nacio; ũguo noguo Jehova Ngai waku ageka ndũrĩrĩ icio ciothe wĩtigĩrĩte.
• 20. O na ningĩ-rĩ, Jehova Ngai waku nĩagatwarithia magi me mbora thĩinĩ wacio, o nginya rĩrĩa andũ atĩa matigarĩte thĩinĩ wacio, na magakwĩhitha, makaninwo mehere mbere yaku.
• 21. Ndũkanamakio nĩo, nĩ ũndũ Jehova Ngai waku e hamwe nawe, o we Mũrungu ũrĩa mũnene mũno ũiguithanagia guoya.
• 22. Nake Jehova Ngai waku akaingata ndũrĩrĩ icio ciehere mbere yaku hanini o hanini; nĩ getha hihi ndũgacinine narua, nyamũ cia werũ ikũingĩhĩre.
• 23. No rĩrĩ, Jehova Ngai waku nĩagacirekereria aciaeane moko-inĩ maku, na acinyarire inyarira inene mũno, o nginya ininwo o kũninwo.
• 24. Nao athamaki a cio nĩakamarekereria amaneane guoko-inĩ gwaku, narĩo rĩĩtwa rĩacio ũtũme rĩũre o kũũra, rĩehere gũkũ thĩ mũhuro wa igũrũ; hatikagĩa mũndũ o na ũrĩkũ ũkahota gũgwĩtiiria, o nginya rĩrĩa ũkamanina biũ.
• 25. Mĩhianano ĩrĩa mĩacũhie ya ngai cia ndũrĩrĩ icio nĩũkamĩcina na mwaki; ndũkanacumĩkĩre betha, kana thahabu, iria ciĩkĩrĩtwo igũrũ rĩayo, kana ũciĩoere atĩ nĩguo ituĩke ciaku, nĩ getha ndũkae kũgucĩrĩrio nĩcio ũheneke; nĩ gũkorũo irĩ thahu ikĩonwo nĩ Jehova Ngai waku;
• 26. nakĩo kĩndũ kĩrĩa gĩĩ thahu ũguo, ndũkanagĩtonyie nyũmba yaku; nĩ getha ndũkanatuĩke mwamũre wa kũninwo o ta kĩndũ kĩu; no mũhaka ũtũũre ũthũũrĩte kĩndũ kĩu o gũgĩthũũra biũ, nĩ gũkorũo nĩ gĩa kũninwo gĩtangĩkũũrĩka.

Home