Go Back

Gũcokerithia Maathani Chapter 27

• 1. NAKE Musa, me na athuri a Isiraeli, magĩatha andũ, makĩmera atĩrĩ, Menyererai maathani mothe marĩa ndĩramwatha ũmũthĩ mũmarũmagĩrĩre.
• 2. Na rĩrĩ, mũthenya ũrĩa mũkaringa Jorodani mũkinye bũrũri ũcio Jehova Ngai waku akuũheaga, nĩgũgatuĩka atĩrĩ, atĩ ũkahanda mahiga manene, ũcoke ũmathinge na rĩũmba,
• 3. na igũrũ rĩamo wandĩke ciugo ciothe cia maathani macio, o warĩkia kũringa; nĩguo ũtonye bũrũri ũrĩa Jehova Ngai waku akũheaga, o bũrũri wĩ bũthi wa iria na ũũkĩ, o ta ũrĩa Jehova, Ngai wa mathoguo, aakwĩrĩire.
• 4. Na nĩgũgakinya atĩrĩ, atĩ mwarĩkia kũringa Jorodani, nĩmũkahanda mahiga macio kĩrĩma-inĩ kĩa Ebali, o macio ngũmwatha ũhoro wamo ũmũthĩ; ũgĩcoke ũmathinge na rĩũmba.
• 5. Ningĩ wakĩre Jehova Ngai waku kĩgongona ho, o kĩgongona kĩa mahiga; na ndũkanamoere kĩndũ o na kĩ gĩa kĩgera atĩ nĩguo ũmaacũhie nakĩo.
• 6. Ũgaakĩra Jehova Ngai waku kĩgongona kĩa mahiga o ro ũguo matarĩ maicũhie; ũgĩcoke ũrutĩre igũrũ rĩakĩo mahaki ma njino ma Jehova Ngai waku;
• 7. o na ningĩ ũrute indo cia magongona ma ũhoreri, na ũcirĩĩre o ho; ũgĩkenagĩre mbere ya Jehova Ngai waku.
• 8. Nacio ciugo ciothe cia maathani macio ũciandĩke mahiga-inĩ macio igũrũ, cioneke wega mũno.
• 9. Nake Musa, na athĩnjĩri-Ngai, acio Alawii, makĩaria na Aisiraeli othe, makiuga ũũ: Atĩrĩrĩ, wee Isiraeli, ta kira ki, ũthikĩrĩrie ũmũthĩ nĩguo watuĩka rũrĩrĩ rũa Jehova Ngai waku.
• 10. Tondũ ũcio kĩrũmie uuge wa Jehova Ngai waku, na wĩkage maũndũ marĩa aathanĩte, o na irĩra cia watho wake wa kũrũmĩrĩrũo, o macio ndĩragwatha ũmũthĩ.
• 11. Nake Musa agĩgĩtaara andũ mũthenya o ro ũcio, akĩmera ũũ:
• 12. Andũ aya nĩo makarũgama o kũu kĩrĩma-inĩ kĩa Gerizimu nĩguo marathime andũ, mwaringa Jorodani; nĩ Simeoni, na Lawii, na Juda, na Isakaru, na Jusufu, na Benjamini;
• 13. nao arĩa makarũgama kĩrĩma-inĩ kĩa Ebali, maheane ũhoro wa kĩrumi, nĩ aya: nĩ Reubeni, na Gadi, na Asheri, na Zebuluni, na Dani, na Nafitali.
• 14. Nao Alawii magacokia ũhoro, mere andũ othe a Isiraeli ciugo ici na mũgambo mũnene, atĩrĩ,
• 15. Kũgwatwo nĩ kĩrumi-rĩ, nĩ mũndũ ũrĩa ũgathondeka mũhianano mwacũhie, kana wa gũtwekio, aũhande na hitho, o ũcio wĩ thahu harĩ Jehova, ũthondeketwo na moko ma bundi. Nao andũ othe macokie ũhoro moige, Amen.
• 16. Kũgwatwo nĩ kĩrumi-rĩ, nĩ mũndũ ũrĩa ũtarĩtĩaga ithe, kana nyina. Nao andũ othe moige, Amen.
• 17. Kũgwatwo nĩ kĩrumi-rĩ, nĩ mũndũ ũrĩa ũgathamia mũtĩ wa mũhaka wa mũndũ ũrĩa mahakaine. Nao andũ othe moige, Amen.
• 18. Kũgwatwo nĩ kĩrumi-rĩ, nĩ mũndũ ũrĩa ũkahĩtithia mũtumumu njĩra. Nao andũ othe moige, Amen.
• 19. Kũgwatwo nĩ kĩrumi-rĩ, nĩ mũndũ ũrĩa ũkahotomia cira wa mũndũ wa kũngĩ, kana wa mwana wa ngoriai, kana wa mũtumia wa ndigwa. Nao andũ othe moige, Amen.
• 20. Kũgwatwo nĩ kĩrumi-rĩ, nĩ mũndũ ũrĩa ũgakoma na mũtumia wa ithe, nĩ gũkorũo nĩ kũguũria aguũrĩtie ithe nguo. Nao andũ othe moige, Amen.
• 21. Kũgwatwo nĩ kĩrumi-rĩ, nĩ mũndũ ũrĩa ũkagwata nyamũ ya mũthemba o na ũrĩkũ. Nao andũ othe moige, Amen.
• 22. Kũgwatwo nĩ kĩrumi-rĩ, nĩ mũndũ ũrĩa ũgakoma na mwarĩ wa nyina, kana wa ithe. Nao andũ othe moige, Amen.
• 23. Kũgwatwo nĩ kĩrumi-rĩ, nĩ mũndũ ũrĩa ũgakoma na mũthoniwe, nyina wa mũka. Nao andũ othe moige, Amen.
• 24. Kũgwatwo nĩ kĩrumi-rĩ, nĩ mũndũ ũrĩa ũkagũtha mũndũ ũrĩa ũngĩ na hitho, amũũrage. Nao andũ othe moige, Amen.
• 25. Kũgwatwo nĩ kĩrumi-rĩ, nĩ mũndũ ũrĩa ũkaamũkĩra ihaki nĩ getha orage mũndũ ũtarĩ ũũru ekĩte. Nao andũ othe moige, Amen.
• 26. Kũgwatwo nĩ kĩrumi-rĩ, nĩ mũndũ ũrĩa utarĩrũmagia maũndũ ma watho ũyũ, amekage. Nao andũ othe moige, Amen.

Home