Go Back

Gũcokerithia Maathani Chapter 14

• 1. Inyuĩ nĩ inyuĩ ciana cia Jehova Ngai wanyu; mũtikanetemenge mĩĩrĩ yanyu, kana mwĩtue ihara gatagatĩ-inĩ ka maitho manyu, nĩ ũndũ wa mũndũ mũkuũ.
• 2. Nĩ ũndũ wee nĩwe rũrĩrĩ rũamũrĩirũo Jehova Ngai waku, nake Jehova agũthurĩte ũtuĩke rũrĩrĩ rũĩ bata rũamũrĩirũo we mwene, gũkĩra ndũrĩrĩ iria ingĩ ciothe itũũraga gũkũ thĩ.
• 3. Ndũkanarĩe kĩndũ o na kĩ kĩĩ mũgiro.
• 4. Nyamũ iria mũrĩrĩaga nĩcio ici: nĩ mĩthemba ya ng’ombe, o na ng’ondu, o na mbũri,
• 5. na thwariga, na thiya, na thwara, na mbũri ya werũ, na ndoo, na ngondi, na thiya ya irĩma-inĩ.
• 6. Ningĩ thĩinĩ wa nyamũ ciothe-rĩ, nyamũ ĩrĩa yothe ĩrekanĩtie mahũngũ mayo, na ĩkagĩa na mahũngũ maatũkanĩte, na ĩgacokia ithagumia, ĩo nĩyo mũrĩrĩaga.
• 7. No rĩrĩ, thĩinĩ wa iria icokagia ithagumia, kana iria irĩ na mahũngũ maatũkanĩte, mũtiagĩrĩirũo nĩ kũrĩa ngamĩra, na mbũkũ, o na ikami, nĩ ũndũ icio nĩicokagia ithagumia, no rĩrĩ, itirekanĩtie mahũngũ ma cio; icio irĩ mũgiro harĩ inyuĩ;
• 8. o na ngũrũe, nĩ ũndũ o na yatuĩka nĩĩrekanĩtie mahũngũ mayo, ndĩcokagia ithagumia; ti-itherũ nyamũ ĩo ĩrĩ mũgiro harĩ inyuĩ; mũtikanarĩe nyama cia nyamũ icio, kana mũhutie ciimba ciacio.
• 9. Naho ha ũhoro wa nyamũ iria irĩ maĩ-inĩ thĩinĩ-rĩ, iria mũrĩrĩaga nĩ iria ciothe irĩ na mathagu manyitaine, hamwe na tũnyamũ tũrĩa tũtariĩ ta ngaracũ twĩ mwĩrĩ wacio;
• 10. nacio iria ciothe itarĩ na mathagu manyitaine, o na tũnyamũ tũu tũtariĩ ta ngaracũ, mũtikanacirĩe; icio irĩ mũgiro harĩ inyuĩ.
• 11. Naho ha ũhoro wa nyamũ ciothe iria ithiaga na mathagu rĩera-inĩ-rĩ, mwahota kũrĩa iria ciothe itarĩ mũgiro.
• 12. No rĩrĩ, thĩinĩ wacio-rĩ, iria mũtarĩrĩaga nĩ ici; nĩ thũmbaina, na ndiyũ, na gĩthũya-meru,
• 13. na karũĩgĩ-ka-nyoni, na rũĩgĩ, na karũgũrũ o ta ũrĩa kĩruka gĩako gĩtariĩ;
• 14. o na mahuru, o ta ũrĩa kĩruka kĩamo gĩtariĩ,
• 15. na nyaga, na kĩhigoigũ, na gĩthima-mbũri, na hũngũ o ta ũrĩa kĩruka kĩayo gĩtariĩ;
• 16. na ngoru, na ndundu, o na gathambĩri;
• 17. na gakuua-ũrogi, na nderi, na cua;
• 18. na cũcũ-wa-njoka, na karogi-ngunũ o ta ũrĩa kĩruka gĩako gĩtariĩ, na hudihuda, o na rũhuhu.
• 19. Ningĩ tũnyamũ tuothe tũrĩa tũtambaga thĩ twĩ mathagu, twĩ mũgiro harĩ inyuĩ; tũtikanarĩo.
• 20. No rĩrĩ, nyamũ ciothe iria irĩ na mathagu, itarĩ mũgiro, mwahota gũcirĩa.
• 21. Mũtikanarĩe nyamũ o na ĩrĩkũ ĩrĩa ĩyũragĩte; no mwahota kũmĩhe mũndũ wa kũngĩ ũrĩa ũrĩ kwanyu mũciĩ, nĩguo amĩrĩe, kana ũmĩenderie mũrũrĩrĩ; nĩ gũkorũo wee wĩ rũrĩrĩ rũtheru rũamũrĩirũo Jehova Ngai waku. Ningĩ ndũkanaruge kori na iria rĩa nyina.
• 22. No mũhaka ũrutage gĩcunjĩ gĩa ikũmi kĩa uumithio wothe wa irio iria ihandĩtwo mũgũnda waku mwaka o mwaka.
• 23. Na rĩrĩ, nĩũkarĩagĩra gĩcunjĩ kĩu gĩa ikũmi mbere ya Jehova Ngai waku, o handũ harĩa agathura nĩguo ahaamũrithĩrie rĩĩtwa rĩake rĩikarage ho, o gĩcunjĩ gĩa ikũmi kĩa ngano yaku, na kĩa ndibei yaku, na kĩa maguta maku, o na marigithathi ma ndũru ciaku cia ng’ombe, o na cia mbũri; nĩ getha mwĩrute gwĩtigĩra Jehova Ngai waku hĩndĩ ciothe.
• 24. Nawe-rĩ, hĩndĩ ĩrĩa Jehova Ngai waku agakorũo akũrathimĩte, no hihi wone atĩ njĩra nĩĩgũkũraihĩra, na ĩgatũma ũremwo nĩ gũkuua gĩcunjĩ gĩaku gĩa ikũmi ũgĩtware, nĩ ũndũ wa ũrĩa handũ hau Jehova Ngai waku agathura ha kũiga rĩĩtwa rĩake hagakũraihĩrĩra-rĩ,
• 25. nĩũgagĩkũũrania na mbia, nacio mbia icio ũciohe ũcikuue na guoko, ũthiĩ o handũ harĩa Jehova Ngai waku agathura,
• 26. ũgũre nacio kĩrĩa gĩothe ũkeyendera na ngoro yaku, o na gwatuĩka nĩ ndegwa, kana ndũrũme, kana ndibei, o na kana mbinyũ, kana o kĩndũ kĩrĩa gĩothe ngoro yaku ĩkwenda; nawe ũgĩkĩrĩĩre o kũu mbere ya Jehova Ngai waku, ũgĩĩkenagĩra wee mwene, o na andũ othe a nyũmba yaku;
• 27. o nake Mũlawii ũrĩa wĩ gwaku mũciĩ, ndũkanamũrekererie ta ũmũteete; nĩ gũkorũo ndarĩ gĩcunjĩ gĩa gĩthaka kana igai agwatĩte hamwe nawe.
• 28. Na rĩrĩ, o mĩaka ĩtatũ ĩtatũ yathira-rĩ, gĩcunjĩ gĩaku gĩa ikũmi kĩa uumithio waku wothe wa mwaka ũcio, ũgakĩruta ũkĩige kũu itũũra-inĩ rĩaku;
• 29. nake Mũlawii, tondũ ndarĩ gĩcunjĩ gĩa gĩthaka kana igai agwatĩte hamwe nawe, o na mũgendi, na mwana wa ngoriai, na mũka wa ndigwa, arĩa marĩ matũũra-inĩ maku-rĩ, nĩmakuhagĩrĩrie ho marĩe o nginya makahũne; nĩ getha Jehova Ngai waku akũrathimage mawĩra-inĩ mothe marĩa ũkaruta na moko maku.

Home