Go Back

2 Akorintho Chapter 13

• 1. RĨRĨ nĩrĩo ihinda rĩa gatatũ ngoretwo ngĩũka kwanyu. Ũhoro wothe ũrĩa uugĩtwo no mũhaka ũgekĩrũo kĩhooto na tũnua twa aira erĩ kana atatũ.
• 2. Nĩndoigire ũhoro ũyũ o rĩa mbere, na rĩu ndacoka ndoiga o ũguo rĩngĩ, - o rĩu itarĩ ho - o ta ũrĩa ndoigire rĩrĩa ndaarĩ ho hĩndĩ ya kerĩ, ndakĩĩra acio matũire o mehagia kuuma tene, o na arĩa angĩ othe atĩrĩ, atĩ ndoka rĩngĩ-rĩ, ndirĩ mũndũ ngacaĩra;
• 3. tondũ mũkwenda kĩhooto gĩa kũmenyithania atĩ nĩ Kristo waragia na kanua gakwa. Nake ndamwĩkaga maũndũ make ta atarĩ na hinya, no nĩ ũhoti atũũraga naguo thĩinĩ wanyu.
• 4. Amu-rĩ, kwambwo nĩaambirũo mũtĩ igũrũ nĩ ũndũ wa kwaga hinya, no gũtũũra nĩatũũraga muoyo nĩ ũndũ wa ũhoti wa Ngai. Nĩ gũkorũo o na ithuĩ nĩtwagĩte hinya tondũ wa ũrĩa tũnyitaine nake, no ha ũhoro wanyu-rĩ, nĩtũgakorũo tũtũũrainie muoyo nake, nĩ ũndũ wa ũhoti wa Ngai.
• 5. Wĩgeriei ũhoro wanyu inyuene, mũmenye kana no mũtũire o mwĩtĩkĩtie; ta ĩtuĩriei inyuene. Anga mũtiũĩ ũhoro wanyu inyuene, atĩ Jesu Kristo arĩ thĩinĩ wanyu? Tiga hihi mũkorirũo mũregetwo nĩwe.
• 6. No rĩrĩ, ngwĩhoka atĩ nĩmũkamenya atĩ tũtiregetwo ithuĩ.
• 7. Na rĩu, ũrĩa tũhoyaga Ngai nĩ atĩ mũtikae gwĩka ũndũ o na ũmwe mũũru; na gĩtũmi ti getha ithuĩ tuonagwo atĩ nĩtwĩtĩkĩrĩtwo nĩwe, no nĩ getha inyuĩ mũkoragwo mũgĩĩka ũndũ ũrĩa mwega, o na tũngĩgĩkorũo ithuĩ ta tũregetwo.
• 8. Nĩ gũkorũo tũtingĩhota gwĩka ũndũ o na ũmwe ũregaine na ũhoro-wa-ma, tiga o tũtiiragĩrĩre ũhoro-wa-ma.
• 9. Tondũ atĩrĩ, rĩrĩa ithuĩ twagĩte hinya, na inyuĩ mũkagĩa naguo, nĩrĩo tũkenaga; o na ũndũ ũyũ nĩguo tũhoyaga, atĩ mũtuĩke andũ aagĩrĩru kũna.
• 10. Ũndũ ũcio nĩguo ũratũma nyandĩke maũndũ maya rĩu itarĩ ho, nĩ getha rĩrĩa ngakorũo ho ndikaneke ũndũ ndĩ na wĩĩ, ta ũrĩa ’heetwo wathani nĩ Mwathani njĩkage, ndũmage andũ mongererũo hinya, na ti atĩ ndĩmagũithie.
• 11. Na rĩu, ariũ a Ithe witũ, tigwoi na ũhoro. Gĩai na mĩthiĩre mĩagĩrĩru; mũũmĩrĩrie, na mũtuĩke a ngoro o ĩmwe, na ningĩ mũtũũranie na thayũ. Nake Ngai mwene wendani o na thayũ nĩarĩikaraga hamwe na inyuĩ.
• 12. Geithaniai inyuene, o mũndũ akĩgeithia ũrĩa ũngĩ na ngeithi theru ya kũmumunyana.
• 13. Nĩmwageithio nĩ andũ arĩa aamũre othe.
• 14. Wega wa Mwathani Jesu Kristo, naguo wendani wa Ngai, nayo ngwatanĩro ya Roho Mũtheru, iroikaraga na inyuĩ inyuothe.

Home