Go Back

2 Akorintho Chapter 10

• 1. NA rĩu niĩ Paulo, niĩ mwene, nĩndamũthaitha tondũ wa ũrĩa Kristo arĩ mũhoreri na mũcayanĩrĩri, - o niĩ njĩragwo atĩ rĩrĩa tũrĩ hamwe na inyuĩ nĩ kwĩnyihia ndĩĩnyihagia, no rĩrĩa itarĩ ho ngakorũo ndĩĩting’ũrĩtie harĩ inyuĩ, -
• 2. ndakĩmũhoya mũtigatũme atĩ hĩndĩ ĩrĩa ngakorũo ndĩ hamwe na inyuĩ, ngorũo ndĩĩting’ũrĩtie, ndĩ na ũũmĩrĩru ũrĩa ndĩĩciragia ngomĩrĩria naguo harĩ andũ amwe, arĩa meciragia atĩ mĩthiĩre iitũ no ĩrĩa ĩtwaranĩte na ũhoro wa ũmwĩrĩ.
• 3. Tondũ-rĩ, o na tũtũire tũthiaga na mwĩrĩ ũyũ-rĩ, ti atĩ tũrũaga mbaara na mĩrũĩre ĩrĩa ĩtwaranĩte na ũhoro wa ũmwĩrĩ;
• 4. (nĩ gũkorũo indo iria tũrũaga mbaara nacio ti iria cia mũthemba wa ũmwĩrĩ, no nĩ iria irĩ na ũhoti nĩ ũndũ wa Ngai wa gũtharũria ihingo iria ciakĩtwo cia hinya).
• 5. Nĩ gũtharũria tũtharũragia maũndũ ma mwĩĩro ma ngoro, o na kĩndũ o gĩothe kĩrĩa gĩĩtũũgĩrĩtie na igũrũ gĩtuĩke ta rũgiri rũa kũgiria ũhoro wa Ngai ũmenyeke, na tũgataha meciria o mothe matuĩke mĩgwate ya gwathĩkĩra Kristo;
• 6. ningĩ nĩtwĩthagathagĩte tũcoke tũrĩhanie ũremi o wothe, rĩrĩa inyuĩ mũgakorũo mũtuĩkĩte a gwathĩka wega.
• 7. Rorani maũndũ marĩa marĩ o mbere ya maitho manyu. Akorũo kũrĩ mũndũ wĩĩhokaga we mwene atĩ nĩ wa Kristo-rĩ, ũcio nĩacoke ecirie na ngoro yake atĩrĩ, atĩ o ta ũrĩa we arĩ wa Kristo, ũguo noguo na ithuĩ tũtariĩ.
• 8. Amu-rĩ, o na ingĩĩraha ngĩrĩrĩirie hanini nĩ ũndũ wa wathani ũrĩa tũrĩ naguo, (o ũrĩa Mwathani aatũheire wa kũmuongerera hinya naguo, na ti wa kũmũhinyĩrĩria-rĩ), ndigaconorithio:
• 9. nĩguo ndige kuonwo ta nyendaga kũmwĩkĩra guoya na marũa makwa.
• 10. Tondũ kũrĩ moigaga ũũ: Marũa make me bata, na me na maũndũ ma hinya, no rĩrĩa e ho na mwĩrĩ-rĩ, ti mũndũ ũngĩtĩĩka, naguo mwarĩrie wake ndũrĩ tibĩri.
• 11. Mũndũ wa kuuga ũguo nĩamenye atĩrĩ, atĩ o ũrĩa ũhoro witũ ũkoragwo ũtariĩ ũrĩa twandĩkĩte marũa-inĩ rĩrĩa tũtarĩ ho, ũguo noguo tũkoragwo tũtariĩ tũgĩĩka maũndũ, rĩrĩa tũrĩ ho.
• 12. Nĩ gũkorũo tũtingĩeta gwĩtaranĩria na andũ amwe arĩa megathagĩrĩria, kana twĩgerekanie nao. Andũ acio-rĩ, o acio megeraga na ũrĩa mahaana o ene, na makegerekania na ũhoro wao ene-rĩ, matirĩ ũndũ moĩ.
• 13. No ithuĩ-rĩ, tũtingĩĩtĩkĩra kwĩrahĩra maũndũ gũkĩra marĩa tũgereirũo, tiga o twĩrahagĩre maũndũ ma nginya mũhaka wa rũere rũrĩa Ngai aatwatũrĩire rũtuĩke rũthanju ruitũ, naruo rũtuĩke rũa kũmũkinyĩra o na inyuĩ.
• 14. Nĩ gũkorũo ti kwĩaramia twĩaramĩtie tũhĩtũke harĩa tũgereirũo, ta atarĩ ũhoro witũ kũmũkinyĩra inyuĩ, amu no ithuĩ twakĩambĩrĩirie gũkinya o kũu kwanyu tũkĩhunjia Ũhoro-ũrĩa-Mwega wa Kristo.
• 15. Hakĩrĩ ũguo-rĩ, tũtiĩrahagĩra maũndũ makĩrĩte harĩa tũgereirũo, ta arĩ kwĩraha tũkwĩrahĩra maũndũ marĩa marutĩirũo wĩra wa hinya nĩ andũ angĩ; no rĩrĩ, ũndũ ũrĩa twĩrĩgĩrĩire nĩ atĩ, tondũ wa ũrĩa wĩtĩkio wanyu ũrĩongererekaga-rĩ, naruo rũere rũrĩa twatũrĩirũo kũu kwanyu nĩrũkaaramio o makĩria,
• 16. nĩguo tũgakĩhota kũhunjia Ũhoro-ũrĩa-Mwega o na nginya kũndũ kũrĩa kwĩ mbere ya kwanyu, na tũtiĩrahĩre maũndũ ma rũere rũa mũndũ ũngĩ marĩa marĩkĩtie gwĩkĩka kuo.
• 17. No rĩrĩ, mũndũ ũrĩa ũkwĩraha-rĩ, nĩerahage no ũndũ wa Mwathani.
• 18. Tondũ-rĩ, mũndũ ũrĩa wonagwo arĩ mwega, ti ũrĩa wĩgathagĩrĩria we mwene, no nĩ ũrĩa ũgathagĩrĩrio nĩ Mwathani.

Home