Go Back

2 Akorintho Chapter 1

• 1. NĨ niĩ Paulo, mũtũmwo wa Kristo Jesu nĩ ũndũ wa kwenda kwa Ngai, tũrĩ na Timotheo mũrũ wa Ithe witũ, twatũma marũa maya kũrĩ kanitha wa Ngai ũrĩa ũrĩ Korintho, o na andũ arĩa aamũre othe marĩ kũrĩa Akaia guothe:
• 2. Mũrogĩa na Wega, o na thayũ ciumĩte kwĩ Ngai Ithe witũ, o na Mwathani Jesu Kristo.
• 3. We ũrĩa ũrĩ Ngai na Ithe wa Mwathani Jesu Kristo arogathwo, o we Ithe witũ mwene tha, na Ngai mwene ũhoro wothe wa kũũmanĩrĩria,
• 4. o we ũtũũmagĩrĩria mathĩna-inĩ maitũ mothe, nĩ getha ithuĩ tũhotage kũũmĩrĩria andũ arĩa angĩ makoragwo marĩ na thĩna o na ũrĩkũ, nĩ ũndũ wa kũũmĩrĩrio kũu ithuĩ ithuene tũũmagĩrĩrio nakuo nĩ Ngai.
• 5. Nĩ ũndũ atĩrĩ, o ta ũrĩa kũnyamarĩka gwa Kristo gũtũkinyagĩra na gũkaingĩha, no taguo kũũmanĩrĩria nakuo kũingĩhaga kũrĩa twĩ nakuo nĩ ũndũ wa Kristo.
• 6. No rĩrĩ, o na twathĩnio, tũgũthĩnio nĩ getha inyuĩ mũũmĩrĩrio na mũhonokio; o na kana twomĩrĩrio, tũkũũmĩrĩrio nĩ getha inyuĩ mũgĩe na ũũmĩrĩru, o ũrĩa wa gũtũma mũhote gũkirĩrĩria mũkĩnyariragwo na maũndũ o ro marĩa ithuĩ na ithuĩ tũnyariragwo namo.
• 7. Naguo wĩrĩgĩrĩro ũrĩa twĩ naguo nĩ ũndũ wanyu ũgagĩkorũo wĩ mũrũmu, tondũ wa ũrĩa tũmenyete atĩ, o ta ũrĩa mũgwatanĩire maũndũ macio manyariranagwo namo, no taguo mũgwatanĩire ũhoro wa kũũmanĩrĩrio o naguo.
• 8. Amu rĩrĩ, ariũ a Ithe witũ, tũtingĩenda mwage kũmenya ũhoro wa thĩna ũrĩa watũkorire kũrĩa Asia, mũmenye atĩ nĩtwahihinyĩtwo nĩ mathĩna o mũno ma, o gũkĩra ũrĩa hinya witũ waiganaga, naguo ũhoro witũ wa gũtũũra muoyo tũkĩya kũũmĩra tha.
• 9. Tũgĩkĩigua thĩinĩ wa ngoro ciitũ ta arĩ ituĩro twatuĩrĩirũo rĩa gũkua, nĩ getha tũtikae gũikara twĩhokete ũhoro witũ ithuene, tiga o tũikarage twĩhokete Ngai ũrĩa ũriũkagia arĩa akuũ:
• 10. o we watũhonokirie kũrĩ ũhoro wa gĩkuũ mũnene ũũ, na nowe ũrĩtũhonokagia; nake nĩwe twĩrĩgĩrĩire atĩ ndarĩ hingo agatiga gũtũhonokia,
• 11. inyuĩ na inyuĩ mũgĩtũteithagia na gũtũthaithanĩrĩra kũrĩa mũrĩtũthaithanagĩrĩra: nĩ getha, tondũ wa kĩheo kĩu kĩega kiumanĩte na Wega wa Ngai tũkinyĩirio nĩ ũndũ wa mahoya ma andũ aingĩ-rĩ, andũ aingĩ nao macokie ngatho nĩ ũndũ witũ.
• 12. Tondũ atĩrĩ, ũndũ ũrĩa ũtũmaga twĩrahe nĩ ũyũ, atĩ thamiri ciitũ nĩcio itũmenyithagia atĩ mĩthiĩre ĩrĩa twaikaraga nayo kũrĩ andũ a thĩ, na makĩria kũrĩ inyuĩ-rĩ, no ĩrĩa ya ũtheru na ya ũhoro ũtarĩ na ũhinga o ũrĩa uumaga kũrĩ Ngai, ti ĩrĩa ya ũũgĩ ũrĩa uumanĩte na ũmwĩrĩ, tiga ĩrĩa yumanĩte na Wega wa Ngai.
• 13. Nĩ gũkorũo tũtirĩ na mohoro mangĩ tũkũmwandĩkĩra tiga o marĩa mũiguaga mũkĩmathoma, o na mũkametĩkĩra atĩ no ma ma, namo nĩmo tũkwĩrĩgĩrĩra atĩ mũgũtũũra mũmetĩkĩrĩte wega hĩndĩ ciothe;
• 14. o ta ũrĩa mwatwĩtĩkĩrire amwe anyu, atĩ nĩ ithuĩ gĩtũmi gĩa gũtũma mwĩrahe, o na ta ũrĩa inyuĩ na inyuĩ mũrĩ gĩtũmi giitũ gĩa gũtũma twĩrahe mũthenya ũrĩa wa Mwathani witũ Jesu.
• 15. Na tondũ wa ũrĩa ndehokete ũguo, nĩndendete nyambe njũke kwanyu nĩ getha mũkaheo ũteithio ũngĩ wa kerĩ;
• 16. njũkĩre kũu kwanyu ngĩthiĩ Makedonia, ningĩ ngiuma Makedonia njokere kwanyu rĩngĩ, na ngoimagario nĩ inyuĩ ngĩthiĩ Judea.
• 17. Rĩu-rĩ, rĩrĩa ndeciragia ngeke ũguo, kaĩ ndakĩhaanaga ta mũgarũ? Maũndũ marĩa nduaga atĩ nĩngwĩka-rĩ, githĩ ndĩmatuaga na ũhoro wa ũmwĩrĩ, atĩ nĩguo ngoragwo rĩmwe ndĩ wa kuuga Ĩĩ-ni, ĩĩ-ni, na rĩngĩ Aca, aca?
• 18. O ta ũrĩa Ngai atũũraga arĩ o wa kwĩhokeka-rĩ, ũhoro ũrĩa tũtũire tũmũheaga ti wa kuuga rĩmwe, Ĩĩ, na rĩngĩ Aca.
• 19. Amu-rĩ, Mũrũ wa Ngai, Jesu Kristo, ũcio mwahunjĩirio ũhoro wake nĩ ithuĩ, niĩ na Silivano na Timotheo, ũhoro wake-rĩ, ndwarĩ wa kuuga Ĩĩ, ũgacoka kuuga Aca, no rĩrĩ, thĩinĩ wake no wa kuuga Ĩĩ.
• 20. Amu ciĩranĩro cia Ngai-rĩ, o na ciigana atĩa, Ĩĩ-ni yacio yugagwo no ũndũ wake we; na tondũ ũcio Amen yacio o nayo yugagwo no ũndũ wake, nĩ getha Ngai akĩgoocagwo nĩ ũndũ witũ.
• 21. Na rĩrĩ, ũrĩa ũtũrũmagia hamwe na inyuĩ tũikarage thĩinĩ wa Kristo, o na agĩtũitĩrĩria maguta, nĩ Ngai;
• 22. nake nĩwe watwĩkĩrire rũũri rũake, na agĩtũhe Roho ngoro-inĩ ciitũ atuĩke mũtũrio wa Wega wake.
• 23. No rĩrĩ, Ngai nĩwe ndatua mũira wa ngoro yakwa ũrĩa yatariĩ, atĩ ũndũ ũrĩa watũmire njage gũũka Korintho no kũmũiguĩra tha inyuĩ.
• 24. Na ti atĩ tũrĩ a kũmwatha ũhoro-inĩ wa ũrĩa mwĩtĩkĩtie, tiga o atĩ tũkĩrĩ a kũrutithania wĩra na inyuĩ nĩguo mũkenage, amu ũhoro-inĩ wa gwĩtĩkia-rĩ, mũtũire mwĩhandĩte wega.

Home